وسى ورايدا ءوز ىسىنە قالتقىسىز بەرىلگەن, ناۋقاستاردىڭ ساۋىعىپ كەتۋىنە جانىن سالا جۇگىرىپ جۇرگەن مەديتسينا سالاسىنىڭ قىزمەتكەرلەرىنە قولداۋ كورسەتەيىك. ويتكەنى ولاردىڭ جۇمىسى ونسىز دا قيىن. ءبىزدىڭ كومەگىمىز اۋا جايىلۋشىلىقتان ارىلىپ, كارانتين كەزىنىڭ قاتاڭ تارتىبىنە باعىنۋ. بۇل ءوزىمىز ءۇشىن عانا ەمەس, وزگەلەردىڭ دە امان-ساۋلىعى ءۇشىن اۋاداي قاجەت. مەن ادامزاتتىڭ وسىناۋ ىندەتتى جەڭىپ شىعاتىنىنا سەنىمدىمىن. ال ونىمەن كۇرەستە قانداي جاعداي بولماسىن ءوزىمىزدى, ءوزىمىز ارقىلى اينالامىزداعى ادامدارعا قامقورلىق كورسەتە الامىز. ارقايسىمىز جان-جاعىمىزعا جاناشىرلىق تانىتقاندا عانا ادامزات باسىنا تونگەن اۋىر كۇندەر ارتتا قالادى.
ەلىمىزدىڭ بولاشاعى جولىندا بارشامىز امان بولايىق, اعايىن.
تاريحتىڭ تالاي تار جول, تايعاق كەشۋىنەن وتكەن قازاق كورمەگەن قاسىرەت بار ما؟ تورتكۇل دۇنيەنىڭ توبەسىندە اڭگىر تاياق ويناتقان مىنا كوروناۆيرۋس تا سونىڭ ءبىرى بولسا كەرەك. الەمنىڭ ءار شالعايىنداعى عۇلاما عالىمداردىڭ قايرات قىلا الماي وتىرعانىنا قاراعاندا, بۇل وڭاي جاۋ ەمەس. ايتسە دە ادامزاتتىڭ اقىل-ويى تۇبىندە جەڭىسكە جەتەتىنىنە ءوز باسىم ءشۇبا كەلتىرمەيمىن. ەندەشە, الدان تۋار اق كۇننەن ءۇمىتىمىزدى ۇزبەيىك. ءبارىمىز جاقسىلىقتىڭ اتى وزۋىنا جان-تانىمىزبەن تىلەكشى بولا بىلەيىك.
باقىتجان قاناپيانوۆ,
اقىن, قازاقستاننىڭ ەڭبەك سىڭىرگەن قايراتكەرى
