سولتۇستىك قازاقستان وبلىسىنىڭ پەتروپاۆل قالاسىندا بيزنەسمەندى ولتىرگەن ايىپكەرگە قاتىستى سوت ۇكىمى شىقتى. بۇل تۋرالى Tengrinews.kz حابارلادى.
سوتتالۋشى ا.ابدۋللاەۆقا قاتىستى ءىس ءبىر جىلعا سوزىلعان بولاتىن. ەندى ول 11 جىل ءومىرىن تۇرمەدە وتكىزەدى. سونداي-اق ايىپتالۋشى جابىرلەنۋشىگە ماتەريالدىق, مورالدىق شىعىندى وتەۋى ءتيىس. «ەسكەندىروۆتىڭ ابدۋللاەۆقا قاتىستى تالاپ ارىزى ءىشىنارا قاناعاتتاندىرىلسىن. ايىپتالۋشىدان ماتەريالدىق شىعىن ءۇشىن 2 ملن. 125 مىڭ تەڭگە, ال مورالدىق شىعىن ءۇشىن 1 ملن. تەڭگە ءوندىرىلسىن», -دەپ جازىلعان پەتروپاۆل قىلمىستىق ىستەر جونىندە مامانداندىرىلعان اۋدانارالىق سوتىنىڭ ۇكىمىندە. الايدا, جابىرلەنۋشىنىڭ ادۆوكاتى سۋديا تاعايىنداعان جازا مەرزىمىنە كەلىسپەيتىنىن ايتىپ,وبلىستىق سوتقا شاعىم تۇسىرەتىنىن مالىمدەدى.
وتكەن جىلدىڭ قاراشا ايىندا جەرگىلىكتى جەردەگى «وكەان» دۇكەنى جانىندا Mercedes كولىگى ىشىندە بولعان بيزنەسمەن سەيدۋللا ەسكەندىروۆتى بەلگىسىز بىرەۋ باسىنان اتىپ كەتەدى. ارتىنان بيزنەسمەندى ولتىرگەن كۇدىكتى ءوز اياعىمەن پوليتسيا بولىمىنە كەلىپ, بولعان جايدى باياندايدى. بيزنەسمەن بيداي تاسىمالى ءۇشىن ا. ابدۋللاەۆقا 30 ملن. تەڭگە قارىز بولعان كورىنەدى. ول وسى قارىزىن كولىك ىشىندە سۇراعان كەزىندە بيزنەسمەن قارسىلىق كورسەتكەن. سوسىن قىزبالىققا سالىنعان ايىپتالۋشى اڭشى مىلتىعىمەن بيزنەسمەن باسىنان اتقان.
باقىتبەك كەنەش ۇلى.
