بازاردىڭ كىرە بەرىس قاقپاسىنداعى قاراۋىل دا «بەتپەردە تاعىپ, ارا قاشىقتىق ساقتاپ جۇرىڭدەر» دەگەن جاتتاندى ءسوزدى ايتا-ايتا شارشاعان سەكىلدى. ال بەتى اشىق-شاشىق ازىق-ت ۇلىكتى, بەيعام حالىقتى كورىپ كوڭىلگە سەكەم كىرەدى.
قالادا ىندەت جۇقتىرعانداردىڭ سانى 3151 بولدى. ءسات ساناپ وسكەن كورسەتكىش, الەۋمەتتىك جەلىدەگى قارالى حابارلار, ەمحانالارداعى توسەكتىك ورىن تاپشىلىعى, ءدارىحانا الدىنداعى ۇزىن سونار كەزەك, ۋاقىتشا اشىلعان ەمدەۋ ورتالىقتارى وتاندىق مەديتسينا سالاسى ماماندارىنىڭ جۇيكەسىنە اۋىر سالماق سالىپ جاتىر.
شىمكەنتتىك جەدەل جاردەم دارىگەرى ارمان ءحامزيننىڭ كوڭىل كۇيگە ەرىك بەرگەن بەينە جازباسىنان-اق شىمكەنتتەگى دارىگەرلەر قاۋىمىنىڭ جۇمىسى اۋىر ەكەنىن اڭعارۋعا بولادى.
جەرگىلىكتى اكىمدىك تاراپىنان تەكسەرۋ جۇمىستارى جۇرگىزىلگەنىمەن, كاسىپكەرلىك نىساندار جۇمىسىن ۋاقتىلى توقتاتا قويعان جوق. اباي اۋدانى بويىنشا قۇرىلعان 4 موبيلدىك توپ كەشكى مەزگىلدە دۇكەندەر مەن ءدامحانالاردىڭ ۋاقتىلى جابىلۋىنا كۇندەلىكتى مونيتورينگ جۇمىستارىن جۇرگىزۋدە. دەيتۇرعانمەن, تەكسەرۋ توبى كەتىسىمەن قايتا جۇمىسىن جالعاستىرىپ, نەمەسە «جابىق» رەجىمدە جۇمىس ىستەپ جاتقانى تاعى بار.
مۇنداي تەكسەرۋ جۇمىستارى ناتيجەسىندە ەڭبەكشى اۋدانىنا قاراستى تاۋكە حان داڭعىلى, ەلشىبەك باتىر جانە ش.ءۋاليحانوۆ كوشەلەرى بويىندا ورنالاسقان 187 كوممەرتسيالىق نىسانعا رەيدتىك ءىس-شارا جۇرگىزىلگەن. اتالعان اۋداندا 38 كوممەرتسيالىق قۇرىلىمعا ەسكەرتۋ بەرىلدى. ال, اباي اۋدانى اۋماعىندا كارانتين رەجىمىن ساقتالماعان 4 كاسىپكەرلىك نىسانعا حاتتاما تولتىرىلدى. جالپى, قالا بويىنشا كارانتين تالابىنا باعىنباي, كەشكى مەزگىلدە جۇمىس ىستەپ جاتقان 50-گە جۋىق مەكەمەگە حاتتاما تولتىرىلعان. سانيتارلىق نورمالاردى ساقتاماعان 7 كاسىپكەرلىك نىسان ۋاقىتشا جابىلدى. «تارتىپكە باعىنعان قۇل بولمايدى», دەگەندەي, ىندەتتىڭ ىرگەسىن كەڭگە جايماس ءۇشىن حالىققا ءبىرىنشى كەزەكتە قاتاڭ ساقتانۋ قاجەت. الايدا حالىق كۇنكورىستىڭ قامى ءۇشىن كوشەگە شىعىپ كەتۋدە. كەيبىر جەكەمەنشىك كاسىپكەرلىك نىساندار قالتاسىن ويلاپ, باس سانيتار شىعارعان قاۋلىدان اينالىپ وتۋدە.
ىندەت ءورشىپ تۇرعان شاقتا دا قالاداعى «گارانت» ساۋدا ورتالىعى اۋماعىندا جابايى ساۋدا قىزىپ تۇر. سمارتفون ساۋدالاۋشىلار جاياۋ جۇرگىنشىنىڭ جولىن كەس-كەستەيدى. «بەتپەردە تاعىپ المايسىڭدار ما؟», دەگەن جاناشىرلىققا قابا ساقالدى جاس جىگىت: «اللا ساقتايدى», دەپ جاۋاپ قاتتى... بەتپەردە كيمەگەنى بىلاي تۇرسىن, بەتى اشىق ىدىستا ءبالىش پەن پىسكەن جۇگەرى ساتىپ جۇرگەن ازاماتتاردى كەزدەستىردىك. ەل تۇرعىندارى ءجيى شوعىرلانعان وڭتۇستىك شاھارداعى جاعداي وسىلاي. ىندەت تۇرعىنداردىڭ دەنساۋلىعىنا جەتكەنىمەن, سانالارىنا ءالى جەتە قويماعانداي...
