ءىس-شارانى جۇرگىزگەن كىتاپحانا ديرەكتورى جىلدىز باكاشوۆا ۇلى وقىمىستى ءال-ءفارابيدىڭ ءومىر جولىنا, ەڭبەكتەرىنە قىسقاشا شولۋ جاساپ, ءسوز كەزەگىن قازاقستان رەسپۋبليكاسىنىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى قايرات نۇرپەيىسوۆكە بەردى.
– ءال-ءفارابيدىڭ مەرەيتويى قازاقستاندا مەملەكەتتىك دەڭگەيدە ءوتىپ جاتىر. يۋنەسكو عۇلاما عالىمدى «اتاۋلى داتالاردىڭ جانە وقيعالاردىڭ كۇنپاراعىنا» كىرگىزدى. سونداي-اق مەرەيتوي يسلام ىنتىماقتاستىعى ۇيىمى, تۇركى مادەنيەتىنىڭ حالىقارالىق ۇيىمى, ءبىلىم بەرۋ, عىلىم جانە مادەنيەت ماسەلەلەرى بويىنشا يسلامدىق ۇيىمنىڭ جانە باسقا حالىقارالىق مەكەمەلەردىڭ قولداۋىمەن كەڭ ايادا, الەمنىڭ تۇكپىر-تۇكپىرىندە اتالىپ وتۋدە. پرەزيدەنت قاسىم-جومارت توقاەۆ عۇلاما ويشىل تۋرالى: «مادەنيەتتىڭ, ءبىرىنشى كەزەكتە شىعىس, ورتالىق ازيا حالىقتارىنىڭ, تۇركى, ونىڭ ىشىندە قازاق ەلىنىڭ مادەنيەتىنىڭ ودان ءارى دامۋىنا ءال-ءفارابيدىڭ ىقپالى ءار تاراپتى جانە ۇزاق مەزگىلدى قامتىدى» دەپ ايتقانىنداي, ۇلى ويشىلدىڭ ەڭبەكتەرى بۇگىنگى كۇندە دە ماڭىزدى», دەگەن ەلشى ءال-ءفارابيدىڭ قايىرىمدى قالا تۇرعىندارىنىڭ كوزقاراستارى جايىنداعى تراكتاتىنان «باقىتقا جەتۋ جولىندا ادامدار ءبىر-بىرىنە جاردەم بەرەتىن بولسا, جەر ءجۇزى ىزگىلىكتى بولادى» دەگەن ءسوزىن مىسالعا تارتتى.
عۇلامانىڭ وسى ءسوزى ونلاين-كونفەرەنتسيانىڭ وزەگىنە ارقاۋ بولعانداي. پىكىر بولىسكەندەر ءال-ءفارابيدىڭ گۋمانيستىك كوزقاراستارىنا باسا نازار اۋدارىپ, ونى ءار قىرىنان باياندادى. ءىس-شاراعا تىكەلەي قاتىسقان يشەنالى اراباەۆ اتىنداعى قىرعىز مەملەكەتتىك ۋنيۆەرسيتەتىنىڭ پروفەسسورى, تاريح عىلىمدارىنىڭ دوكتورى نازيرا ۋسۋپوۆا «مەن ءال-ءفارابيدىڭ ەڭبەكتەرىن وقىتۋ قىرعىزستاننىڭ جوعارعى وقۋ ورىندارىنىڭ, مەكتەپتەردىڭ, ءتىپتى بالاباقشالاردىڭ باعدارلامالارىنا كىرگىزىلسە تۋرا بولار ەدى دەپ ەسەپتەيمىن» دەگەن ۇسىنىسىن ايتتى. كونفەرەنتسيادا ارىپتەسىنىڭ ۇسىنىسىن قۋاتتاعان وسى ۋنيۆەرسيتەتتىڭ تاريح جانە الەۋمەتتىك-قۇقىقتىق ءبىلىم فاكۋلتەتىنىڭ دەكانى, تاريح عىلىمدارىنىڭ دوكتورى, پروفەسسور نازيرا قۇربانوۆا ء«ال-فارابي جانە ءجۇسىپ بالاساعۇن ادامنىڭ ادەپ-اقلاقتىق جەتىلۋى جونىندە» اتتى بايانداماسىندا ءال-فارابي مەن ورتاعاسىرلىق تۇركى عالىمىنىڭ ەڭبەكتەرىندەگى ساباقتاستىققا تالداۋ جاسادى.
ونلاين-كونفەرەنتسياعا قاشىقتان قاتىسقان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پرورەكتورى, ساياسي عىلىمدار كانديداتى, پروفەسسور اقبوتا جولداسبەكوۆا, وسى وقۋ ورنىنىڭ شىعىستانۋ كافەدراسىنىڭ پروفەسسورى, فيلولوگيا عىلىمدارىنىڭ دوكتورى سامال تۇلەۋباەۆا, م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ فيلوسوفيا جانە ساياساتتانۋ كافەدراسىنىڭ اعا وقىتۋشىسى رەجەپ باياريسوۆ, قىرعىز ۇلتتىق عىلىم اكادەمياسىنىڭ فيلوسوفيا, قۇقىق جانە الەۋمەتتىك-ساياسي زەرتتەۋلەر ينستيتۋتىنىڭ ديرەكتورى, فيلوسوفيا دوكتورى نۇر سارالاەۆ, بىشكەكتەگى ەڭبەك اكادەمياسىنىڭ رەكتورى, فيلوسوفيا دوكتورى اسقاربەك بەكبوەۆ ۇلى وقىمىستىنىڭ ەڭبەكتەرى, ونىڭ ومىرشەڭدىگى تۋرالى ويلارىن ورتاعا سالدى.
كىتاپحانا زالىندا كىتاپحانا قورىندا ساقتالعان ءال-ءفارابيدىڭ ءار جىلدارى جارىق كورگەن كىتاپتارى, ول تۋرالى عىلىمي ەڭبەكتەردىڭ جانە ماقالالاردىڭ كورمەسى ۇيىمداستىرىلدى, ءال-فارابي تۋرالى فيلم كورسەتىلدى.
نازاربەك بايجىگىتوۆ,
قىرعىز رەسپۋبليكاسىنىڭ ۇكىمەتتىك «قىرعىز تۋى» گازەتىنىڭ جاۋاپتى حاتشىسى,
ارنايى «Egemen Qazaqstan» ءۇشىن
