مۇنداي كورىنىستەر كەڭەستە اتالىپ وتكەندەي, اقتوبە وبلىسىندا دا ورىن الدى. مۇنىڭ سەبەبى نەدە؟! وڭىردەگى 573 دارىحاناعا ءدارى-دارمەكتەر بەلگىلەنگەن كولەمدە ءارى دەر ۋاقىتىندا جەتكىزىلسە دە, بۇگىنگى وراسان اۋقىمداعى سۇرانىستى قاناعاتتاندىرا الماي وتىر. ويتكەنى ىندەت كۇن سايىن ءورشىپ بارادى. سوڭعى اپتادا ۆيرۋستىڭ ءبىر تارماعى – پنەۆمونيامەن اۋىرعانداردىڭ سانى 6-7 پايىزعا دەيىن كۇرت ءوستى. مۇنداي سىني شاقتا ءدارىحانا يەلەرى قوردى سۇرانىستى تولىق قامتاماسىز ەتەتىندەي دەڭگەيدە تولىقتىرىپ وتىرۋى قاجەت. ولاردىڭ اراسىندا كۇردەلى كەزەڭدى جەكە مۇددەسىنە پايدالانىپ, باعانى وسىرۋگە ۇمتىلعاندارى دا بار.
سونداي-اق ايماقتا اۋرۋحاناعا جاتقىزىلۋشىلار قاتارى كۇن سايىن ارتىپ كەلەدى. وتكەن ماۋسىم ايىندا 464 ادام ساۋىعىپ شىقتى. ايتسە دە بۇگىندە قوس وكپەنىڭ بىردەي قابىنۋى سالدارىنان ادام ءولىمى كوبەيدى. اتاپ ايتقاندا, ايماقتا 62 ادامنىڭ ءولىمى پنەۆمونيانىڭ اسقىنىپ كەتكەن جاعدايىندا تىركەلگەن. وسى ورايدا باسىم بولىگىنىڭ قان قىسىمى, جۇرەك اۋرۋى جانە قانت ديابەتى سياقتى قوسىمشا سىرقاتى بولعان. بۇگىندە اۋرۋحاناعا پنەۆمونيامەن تۇسكەندەردىڭ دەنى اۋرۋىن اسقىندىرىپ العاندار. ەكىنشىدەن, قازىر وبلىستا زەرتحانالىق تەكسەرۋلەر ۆيرۋس جۇقتىرعانىن كورسەتپەسە دە, ولارعا كۆي سىناماسى بويىنشا ەم جاسالۋدا. مەديتسينالىق مەكەمەلەرگە اۋىر جۇك ءتۇستى.
كۇردەلى جاعدايعا بايلانىستى سوڭعى اپتادا اقتوبەدە جەرگىلىكتى اتقارۋشى ورگاندار تاراپىنان قوسىمشا شارالار قابىلداندى. ءسويتىپ كارانتيندىك ستاتسيونارلارعا قوسىمشا 2 مىڭنان استام كەرەۋەت ازىرلەندى. سونىڭ ىشىندە تۋبەركۋلەز اۋرۋحاناسىندا 500 ورىن پروۆيزورلىق ەمدەۋ ورنى رەتىندە جاساقتالدى. الداعى كۇندە تاعى دا قوسىمشا 150 ورىن قوسىلماق. وعان قوسا تامىزعا دەيىن 200 ورىن جاساقتالماق. وسىلايشا وبلىستا نەگىزگى كۇشتى پروۆيزورلىق گوسپيتالدارعا جۇمىلدىرۋ كوزدەلگەن. سونىمەن بىرگە بارلىق ەمحانا جانىنان كۇندىزگى ستاتسيونارلار اشىلدى. وندا تاۋلىگىنە 200-دەن استام ادام ەم قابىلدايدى. ۇشىنشىدەن, وڭىردە 4800 دارىگەردىڭ قاتارىنا قوسىمشا ەم جاساۋ مەن دارىگەرلىك كومەك كورسەتۋ ءۇشىن م.وسپانوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ رەزيندەنتتەرى مەن وقىتۋشى پروفەسسورلار قۇرامى تارتىلدى. سونداي-اق جەدەل جاردەم قىزمەتى مەن پروۆيزورلارعا قوسىمشا كومەككە اقتوبە مەديتسينا كوللەدجىنىڭ 100-دەن استام تۇلەگى شاقىرىلدى. تورتىنشىدەن, وڭىردە بۇگىننەن باستاپ بارلىق ەمدەۋ مەكەمەلەرىن «سك-فارماتسيا» قۇرىلىمى ارقىلى ءدارى-دارمەكتەرمەن تولىق قامتۋ شارالارى بەلگىلەندى.
ەلىمىز بۇعان دەيىن قانداي دا ءبىر جۇقپالى ينفەكتسيالىق جانە ەپيدەميالىق اۋرۋلاردىڭ وشاعى بولىپ ەسەپتەلمەگەندىكتەن ينفەكتسيونيست دارىگەرلەردىڭ سانى شەكتەۋلى بولىپ كەلدى. سونىڭ سالدارىنان بارلىق جەردەگىدەي اقتوبە وبلىسىندا دا بۇگىندە كۆي-ءدىڭ ەسەبىنە شىعاتىن پنەۆمونيا دەرتى ورشۋدە. مۇنداي جاعدايدا ءاربىر ينفەكتسيونيست دارىگەرگە تۇسكەن جۇكتەمە 5-6 ەسەگە دەيىن ءوسىپ وتىر. بۇل جونىندە اقتوبە وبلىسىنىڭ باس ينفەكتسيونيست دارىگەرى مەيرامبەك قۇرمانعازين ايتىپ بەردى. ولار مۇنداي التى ەسەلەنگەن جۇكتەمەنى كوتەرە المايدى. سوندىقتان دا سانى وسپەگەن بۇرىنعى قۇرامداعى ينفەكتسيونيست دارىگەرلەر قازىر نەگىزىنەن كەڭەس بەرۋشى, كونسيليۋمدارعا قاتىسىپ وي قورىتۋشى جانە اۋرۋدى ەمدەۋگە قاتىستى باعىت-باعدار, جول سىلتەۋشى مىندەتىن اتقارۋىنا تۋرا كەلىپ وتىر. بۇدان باسقا جول جوق دەپ تۇجىرىمدادى وي-پىكىرىن ءوڭىردىڭ باس ينفەكتسيونيسى. مىنە, وسىنىڭ بارىنە باعىت-باعدار, كەڭەس بەرۋشى وڭىردەگى سانى شەكتەۋلى ينفەكتسيونيست ماماندار.
ءتۇيىپ ايتقاندا, مەملەكەت باسشىسى قاسىم-جومارت توقاەۆ وتكىزگەن ارنايى جيىندا اقتوبە وبلىسىندا ىندەتپەن كۇرەس جانە ونى اۋىزدىقتاۋ ماسەلەلەرى ءوز دەڭگەيىندە ەمەس ەكەندىگى جونىندە وتكىر سىن ايتىلعان كەزگە دەيىن ءارى ودان كەيىن وبلىستا بۇل ماسەلەنى جولعا قويۋ جونىندە شۇعىل ءىس-شارالار كەشەنى جاساقتالدى. بۇعان بىرقاتار دەرەك پەن مىسال جوعارىدا ايتىلدى دا.
اقتوبە
