دەنساۋلىق ساقتاۋ باسقارماسىنىڭ مالىمەتىنشە, وبلىستا كوروناۆيرۋس ينفەكتسياسىن جۇقتىرعان 740 ادام انىقتالعان, 370 ادام ىندەتتەن جازىلدى. قازىر بارلىق ەمحانا مەن اۋرۋحانا, جەدەل جاردەم ستانساسى قالىپتى رەجىمدە جۇمىس ىستەۋدە. سوڭعى كۇندەرى ناۋقاستانعان 30 ادام وبلىس ورتالىعىنان بولسا, 1 ادام – ەكىباستۇز قالاسىنىڭ تۇرعىنى. ناۋقاستار قالالىق ينفەكتسيالىق اۋرۋحانالارعا جاتقىزىلعان, جاعدايلارى قالىپتى, حاتتاماعا سايكەس ەم تاعايىندالدى, بايلانىستا بولۋى مۇمكىن ادامدار توبى انىقتالدى.
ال اۋداندارداعى ەمدەۋ ورىندارىندا 2 مىڭ ادام ورنالاستىرىلعان. قوسىمشا ورىندار اۋداندىق ورتالىق اۋرۋحانالاردا اشىلدى. وتكەن تاۋلىكتە وڭىرلىك ستاتسيونارلارعا 531 ادام مەديتسينالىق كومەككە جۇگىندى. 285 پاتسيەنتتە پنەۆمونيا, 180 ادامدا جرۆي انىقتالعان. بارلىعى 1429 ادام پنەۆمونيا جانە 196 ادام جرۆي دياگنوزىمەن جاتىر. اۋداندىق اۋرۋحانالاردا مەديتسينالىق پەرسونالعا جۇكتەمە از بولعاندىقتان, كادرلار تارتۋ بويىنشا ءتيىستى شارالار قابىلداندى. جەرگىلىكتى بيۋدجەت ەسەبىنەن قوسىمشا قوناقۇيلەردە تاماقتانۋ جانە تۇرۋ ءۇشىن ءتيىستى قاراجات ءبولىندى.
پاندەميا باستالعان ساتتە پاۆلودار قالالىق №3 اۋرۋحاناسىندا ۋاقىتشا قاراۋ مەكەمەسى رەتىندە 385 ورىن اشىلدى. سونداي-اق كارديوورتالىق عيماراتىندا 135 ورىن اشىلدى. گ.سۇلتانوۆ اتىنداعى وبلىستىق اۋرۋحانادا 282 ورىن دايىندالدى. كەشە قالالىق №1 اۋرۋحانادا قوسىمشا 200 ۋاقىتشا قاراۋ ورنى ازىرلەندى. دارىلەردىڭ قاي ءدارىحانالاردا بار ەكەنى جونىندەگى اقپارات قالالىق اكىمدىكتىڭ Instagram پاراقشاسىندا جاريالانادى.
– قوسىمشا ورىندار اشۋ ارقىلى پروۆيزورلىق توسەك سانى 1232-دەن 1672-گە دەيىن ءوستى. ەگەر بۇرىن سيمپتومدارى كوروناۆيرۋس ينفەكتسياسىن جوققا شىعارمايتىن بارلىق پاتسيەنت پاۆلودار, ەكىباستۇز جانە اقسۋ قالالارىنداعى پروۆيزورلىق ستاتسيونارلارعا جاتقىزىلسا, ەندى اۋىل تۇرعىندارى COVID-19 كۇدىگى بولعان جاعدايدا ورتالىق اۋداندىق اۋرۋحانالارعا ورنالاسادى. ءار اۋداندا پروۆيزورلىق توسەك-ورىندار اشىلدى نەمەسە پروۆيزورلىق كارانتيندىك توسەك-ورىن رەتىندە قايتا بەيىمدەلدى. مىسالى, شارباقتى اۋداندىق اۋرۋحاناسىندا 100 توسەك-ورىن اشىلدى. تاعى ءبىر 160 ورىندىق پروۆيزورلىق گوسپيتال بالالاردىڭ تۋبەركۋلەزگە قارسى شيپاجايىندا دايىندالدى.
وبلىس اكىمى ابىلقايىر سقاقوۆ ءوڭىر تۇرعىندارىنا جەكە پاراقشاسىندا ءجيى ۇندەۋ جاريالاپ, كارانتين شارالارىن بەرىك ۇستانۋعا جانە دارىگەرلەردى قولداۋعا شاقىرادى. سونداي-اق وبلىستىق دەنساۋلىق ساقتاۋ باسقارماسى باسشىلىعىمەن جانە اۋرۋحانالاردىڭ باس دارىگەرلەرىمەن ونلاين رەجىمدە ەپيدەميالىق جاعدايدى تالقىلاپ, قاجەتتى شارالار جوسپارىن قابىلدادى.
«ارقايسىمىز سەبەپسىز دالاعا شىعا بەرمەي, ادامدار كوپ شوعىرلانعان جەردەن اۋلاق بولىپ, بارلىق قاۋىپسىزدىك شارالارىن ۇستاناتىن بولساق, اۋرۋدىڭ تارالۋىن باسەڭدەتەمىز. ۇيدە قالعان ءبىر كۇن ءسىزدى اۋرۋحاناداعى ەكى اپتادان ساقتاي الادى. كارانتيندى كۇشەيتۋ – بۇل قاجەتتى شارا. كارانتيندى كۇشەيتۋ ادامداردىڭ كوپتەپ جينالۋىن بولدىرماۋدىڭ جالعىز جولى بولىپ كورىنەدى. كارانتين شارالارىن ادامدار ءوز دەنساۋلىقتارىنا نەمقۇرايلى قاراماي, بارلىعىنا تۇسىنۋشىلىك تانىتقان جاعدايدا عانا توقتاتۋعا بولادى», دەدى وبلىس اكىمى ءا.سقاقوۆ.
پاۆلودار وبلىسى
