كوروناۆيرۋس • 30 ماۋسىم، 2020

اۋا جايىلعاندا اۋرۋ جويىلمايدى

288 رەت كورسەتىلدى

«جامان تۇماۋدىڭ» ارقا توسىندەگى ارىنىنىڭ باسىلاتىن ءتۇرى كورىنبەيدى. قولداعى دەرەككە سۇيەنىپ ايتار بولساق، ىندەتكە قاتىستى اۋرۋشاڭدىقتىڭ ەلىمىز بويىنشا ءوسىمى 2،4 پايىز بولسا، قاراعاندى وبلىسىنداعى كورسەتكىش 4،4 پايىزدى قۇرايدى ەكەن. سول سەبەپتى دە، تىعىرىققا تىرەگەن مۇنداي جاعدايدىڭ جەرگىلىكتى اتقارۋشى بيلىكتى قاتتى الاڭداتىپ وتىرعان جايى بار.

كەنشىلەر استاناسىندا Saryarqa تەلەار­ناسىنىڭ ەفيرىندە وتكەن بريفينگتە ءوڭىردىڭ باس مەملەكەتتىك سانيتارلىق دارىگەرى قانات اسقاروۆ قاراعاندى وبلىسىندا 27 ماۋ­سىمنان باستاپ كارانتيندىك شەكتەۋلەردىڭ كۇشەيتىلەتىنىن مالىمدەگەن بولاتىن.

بريفينگ بارىسىندا ول بۇل شەشىمنىڭ قانداي سەبەپتەرمەن  قابىلدانعانىن ەگجەي-تەگجەيلى ءتۇسىندىردى. ىندەتتىڭ ورشۋى­نە ماسكالىق رەجىم مەن الەۋمەتتىك قاشىق­تىقتىڭ ساقتالماۋى بىردەن-ءبىر سەبەپكەر بولعان. ياعني تۇرعىندار كارانتين جاع­دايىندا قويىلاتىن تالاپتاردى ءتىپتى دە ەلەڭ قىلمايدى ەكەن. قاۋىپسىزدىك ەرەجەلەرىن ادامداردىڭ وزدەرى دە، كاسىپورىنداردىڭ اكىمشىلىگى دە ساقتامايتىن كورىنەدى.

– ارنايى قۇرىلعان موبيلدىك توپ قىزمەتىن قايتا باستاعان 153 نىساندى تەكسەرگەندە، ول جەرلەردە باس مەملەكەتتىك سانيتارلىق دارىگەرى قاۋلىسىنىڭ تالاپتارى بۇزىلعانىن انىقتادى. نەگىزىنەن، مۇنداي جاعدايلار  قوعامدىق تاماقتانۋ، ساۋدا، قوعامدىق كولىك نىساندارىندا انىقتالدى، – دەدى ق.اسقاروۆ.

مىنە، وسىنداي كۇردەلى جاعدايدا كوروناۆيرۋس ينفەكتسياسىنىڭ ءارى قاراي  تارالۋىنا جول بەرمەۋ ماقساتىندا بۇگىن­نەن باستاپ قوسىمشا شارالار ەنگىزى­لەتىن بولدى. ءبىر سوزبەن ايتقاندا، قاراعان­دى وبلىسى بويىنشا كارانتين رەجىمى قاتاڭدا­تىلادى. اتاپ ايتقاندا، حالىققا قىزمەت كور­سەتۋ ورتالىقتارى قىسقارتىلعان جۇ­مىس كۇنى تارتىبىنە كوشىپ، ساعات 09.00-دەن 14.00-گە دەيىن عانا جۇمىس ىستەيدى. مەملەكەتتىك قىزمەتتەردىڭ باسىم بولىگى ونلاين رەجىمىندە ۇسىنىلادى. قالا ىشىندە قوعامدىق كولىكتەردىڭ ءجۇرۋ ۋاقىتى شەكتەلىپ، ەندى ولار ساعات 06.00-دەن 21.00-گە دەيىن عانا تۇرعىندارعا قىزمەت كورسەتە الادى. جولاۋشىلار سالونعا الدىڭعى ەسىك ارقىلى عانا كىرەتىن بولادى. ال شىعار كەزدە بارلىق ەسىكتەر ءبىر مەزەتتە اشىلۋى ءتيىس. بۇل تالاپتاردىڭ ساقتالۋى قاتاڭ تۇردە باقىلاۋعا الىنادى. تاكسيلەرگە تەك ءبىر جولاۋشىنى نەمەسە كامەلەتكە تولماعان ەكى بالانى ەرتىپ جۇرگەن ءبىر ەرەسەك ادامدى عانا تاسۋعا رۇقسات بەرىلەدى.

اۋرۋدىڭ ايىلىن جيماي تۇرعانىنا وت­با­سىلىق ءتۇرلى جيىندار، توي-تومالاق، ەسكە الۋ ءىس-شارالارىنىڭ تىيىلماي تۇر­عانى دا تۇرتكى بولىپ وتىر، دەيدى وبلىستىڭ باس مەم­لەكەتتىك سانيتارلىق دارىگەرى. مۇ­نىڭ ءبارى كوروناۆيرۋس ينفەكتسياسى جاع­داي­لارىنا تالداۋ جۇرگىزۋ بارىسىندا ءمالىم بولعان.

– كوپتەگەن جاعدايلاردا ناۋقاستار وز­دەرى­نىڭ اۋرۋ جۇقتىرۋىن ءۇي جاعدايىندا، مەيرامحانالاردا، ءدامحانالاردا وتكىزىلەتىن ءتۇرلى جاپپاي سالتاناتتى، وتباسىلىق، ەسكە الۋ ءىس-شارالارىنا قاتىسقانى­مەن بايلانىستىرادى. ىندەت ودان ءارى ورشى­گەن جاعداي­دا، امال جوق، قوعامدىق تاماق­تاندىرۋ نىساندارىنىڭ جۇمىسىن ۇيگە جەتكىزىپ بەرۋ رەجىمىنە اۋىستىرۋ ماسەلەسى قارالادى، – دەدى ق.اسقاروۆ.

بۇدان بولەك، بۇرىن ەنگىزىلگەن كاران­تيندىك شەكتەۋ شارالارى سول بەتى قالادى. ماسەلەن، 65 جاستان اسقان ادامدارعا اسا قاجەتسىز كوشەگە شىعۋ شەكتەلگەن. جاسى 14-كە دەيىنگى بالالاردىڭ ەرەسەكتەرسىز جۇرۋىنە، وتباسى مۇشەلەرىنەن باسقا، ءۇش ادامنان ارتىق ادامداردىڭ جينالۋىنا تىيىم سالىنادى. قوعامدىق تاماقتانۋ نىساندارىندا كەلۋشىلەردىڭ سانى 30 ادامعا دەيىن شەكتەلگەن، الەۋمەتتىك اراقاشىقتىق پەن وتىرعىزۋ جانە جۇمىس ءتارتىبى ساعات 08.00-دەن 22.00-گە دەيىن ساقتالادى. بۇقارالىق (ۇجىمدىق) ءىس-شارالاردى وتكىزۋگە تىيىم سالىنادى. سونداي-اق ساۋدا-ويىن-ساۋىق ورتالىقتارىنىڭ، ساۋدا ۇيلەرىنىڭ (ورتالىقتارىنىڭ)، ازىق-ت ۇلىك جانە ازىق-ت ۇلىك ەمەس بازارلارىنىڭ جۇمىس كۇندەرى مەن دەمالىس كۇندەرى جۇمىس ۋاقىتى شەكتەۋلى. دەمالىس سوو، ساۋدا ۇيلەرى جانە ازىق-ت ۇلىكتىك ەمەس دۇكەندەر ساعات 9.00-دەن 13.00-گە دەيىن جۇمىس ىستەيدى. بازارلار مىندەتتى سانيتارلىق كۇنگە جابىلادى.

وبلىستىڭ باس سانيتارلىق دارىگەرى بەتپەردە تاعۋدىڭ دىم كومەگى جوق دەگەن اعايىننىڭ پىكىرىنە قارسى ناقتى دالەلگە نەگىزدەلگەن ءۋاج ايتتى.

– بەتپەردەنى تاعىپ ءجۇرۋ ىندەت جۇقتىرۋ­دىڭ الدىن الۋعا كومەكتەسەدى، – دەدى ول.  دۇرىس پايدالانعان جاعدايدا بۇل ماسكا ۆيرۋس جۇقتىرعان ادامنىڭ سىلەكەي شاشىراندىلارىن جىبەرمەي ۇستاپ قالادى. سونىمەن قاتار، ول كىرلەنگەن قولدارى بەتىنە ءجيى تيە­تىن ادامداردىڭ اۋىز بەن مۇرىن قۋىسى ىشىن­دەگى شىرىشتى قاباتتارىن قورعايدى. ماسە­لەن، اۋىرماعان ادامنىڭ قولىنا ميكروب توزاڭى جۇعادى دا، ونىڭ بىلعانعان سول قولدارى بەتىنە تيەدى. سودان بارىپ ميك­رو-­­­­

ورگانيزم مۇرىن، اۋىز، كوزدىڭ شى­رىش­تى قاباتتارىنا جۇعىپ، السىرەگەن يممۋ­ني­تەتتىڭ جاعدايىندا اعزاعا تۇگەل تارايدى.

بريفينگ سوڭىندا قاراعاندى وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتا­مەنتىنىڭ باسشىسى ق.اسقاروۆ تۇرعىنداردى كارانتيندىك شەكتەۋ تالاپتارىن قاتاڭ ساقتاۋعا شاقىردى.

وبلىستىڭ باس مەملەكەتتىك سانيتارلىق دارىگەرىنىڭ تۇرعىنداردى ءدال وسىلايشا تارتىپكە شاقىرىپ كەلە جاتقانىنا دا ءبىراتالاي ۋاقىت بولدى. بىراق اششى دا بولسا ايتايىق، اۋا جايىلعان جۇرتتىڭ وعان قۇلاق اسار ءتۇرى كورىنبەيدى. وتكەن جەكسەنبى كۇنى وڭىردە تاعى دا 137 ادامنىڭ كوروناۆيرۋس ينفەكتسياسىن جۇقتىرعانى زەرتحانالىق نەگىزدە راستالدى.

 

قاراعاندى

 

سوڭعى جاڭالىقتار

ۇقساس جاڭالىقتار