اپتانىڭ سوڭعى كۇنى وسى تۇيتكىلدى ماسەلە بويىنشا شىمكەنت قالاسىنىڭ اكىمى مۇرات ايتەنوۆ, قالالىق دەنساۋلىق ساقتاۋ باسقارماسىنىڭ باسشىسى رۋستام الباەۆ, قالالىق جەدەل جاردەم كورسەتۋ ستانساسى باس دارىگەرىنىڭ ورىنباسارى شولپان وسپانوۆا جانە جەدەل جاردەم دارىگەرى ارمان حامزين ارنايى بريفينگ بەردى.
شاھار باسشىسى قالاداعى ەپيدەميالىق جاعداي جانە ونى قالىپقا كەلتىرۋ بارىسىنداعى جۇمىستار جونىندە مالىمدەمە جاسادى.
«رەسپۋبليكالىق دەڭگەيدە شىمكەنت قالاسى بويىنشا قازنەتتە «ناۋقاستار اۋرۋحانا قاقپاسىنا جەتپەي قايتىس بولىپ جاتىر جانە ناۋقاستارعا ورىن جوق» دەگەن سەكىلدى اقپاراتتار تاراۋدا. وسى جونىندە ارنايى تۇسىندىرمە بەرسەم, بۇگىندە قالادا 650 ينفەكتسيالىق توسەك-ورىن بار. ونىڭ ىشىندە جۇقپالى اۋرۋحانالاردا 350, جاڭا سالىنعان گوسپيتالدا 200 جانە اتامەكەن پروۆيزورلى ستاتسيونارىندا 100 ورىن بار. اتالعان ەسكى جۇقپالى اۋرۋحانالار اۋرۋحاناسىندا 321 ناۋقاس جاتىر, گوسپيتالدا 172 جانە اتامەكەن پروۆيزورلى ستاتسيونارىندا 42 ناۋقاس ەمدەلۋدە. ال جالپى 115 ورىن بوس. ودان بولەك, قالادا 1690 پروۆيزورلى ورىن بار. ونىڭ ىشىندە 1315-ىندە ناۋقاستار ەم الۋدا, قالعانى بوس. ياعني پروۆيزورلى ورىنداردىڭ 77 پايىزى تولىپ تۇر. سول سەبەپتى بۇگىن 500 پروۆيزورلى ورىن اشامىز. ال جەكسەنبى كۇنى 200, دۇيسەنبى كۇنى 500 پروۆيزورلى ورىن اشىلادى. سونداي-اق 51 مەكەمەدە 628 توسەك-ورىندىق كۇندىزگى ستاتسيونار اشتىق. ونىڭ 248-ءى بوس. اتالعان كۇندىزگى ستاتسيونارداعى ءبىر ورىن كۇنىنە 5 ادامدى قابىلداي الادى. ال جۇمىس ۋاقىتى تاڭعى ساعات 08:00-دەن كەشكى 20:00-گە دەيىن (دەمالىسسىز) ىستەيدى. ايتا كەتەيىن, كۇندىزگى ستاتسيونارلاردا ناۋقاستار تىركەلگەن ەمحاناسى بويىنشا تەگىن ەمدەلەدى. حالىققا دەر كەزىندە مەديتسينالىق كومەك كورسەتۋ ءۇشىن ەمحانالاردىڭ جۇمىسىن ەكى ەسە كۇشەيتەمىز», دەدى قالا اكىمى.
انىعىندا, قالادا كوروناۆيرۋس ىندەتىمەن قاتار جاز ايلارىندا پنەۆمونيا دياگنوزىمەن اۋىرعانداردىڭ قاتارى كۇن وتكەن سايىن كوبەيىپ كەلەدى. كەيىنگى ۋاقىتتا قالاداعى اۋرۋحانالاردا وسىعان بايلانىستى توسەك-ورىن جەتىسپەۋشىلىگى ورىن العان بولاتىن.
قالالىق دەنساۋلىق ساقتاۋ باسقارماسىنىڭ باسشىسى رۋستام الباەۆتىڭ ايتۋىنشا, قالادا كوروناۆيرۋس ينفەكتسياسىمەن اۋىرىپ جاتقان 2084 ناۋقاس تىركەلگەن. ونىڭ 45 پايىزى – سيمپتومسىز. پروۆيزورلى ستاتسيونارلاردىڭ توسەك قورى 89 پايىزعا جۇكتەلگەن.
«قالاداعى ءدارىحانالاردا ءتىپتى اسكوربين, پاراتسەتامول قالمادى. بارىنىڭ وزىندە باعاسى اسپانداپ كەتتى», دەگەن الىپقاشپا اڭگىمەگە شاھاردىڭ باس دارىگەرى «شىمكەنتتە ءدارى-دارمەكتىڭ ەكى ايلىق قورى بار», دەپ كەسىپ ايتتى. سونداي-اق باعا تۇراقتىلىعىن قاتاڭ باقىلاۋعا الىپ, ءدارى باعاسىن قىمباتتاتقان دارىحانالارعا ايىپپۇل سالىناتىنىن جەتكىزدى. باسقارما باسشىسىنىڭ ايتۋىنشا, اۋرۋحانالار مەن ءدارىحانالار دەمالىسقا قاراماستان ءدارى-دارمەكپەن قامتىلۋدا.
پنەۆمونيا جانە جرۆي دەرتىنە شالدىققان ناۋقاستار ەمحانالاردا ەم قابىلداۋدا. كۇندىزگى ستانتسيوناردا مەديتسينا ماماندارى دەمالىس كۇندەرىنە قاراماستان, اپتاسىنا جەتى كۇن, تاڭعى ساعات 08:00-دەن باستاپ 20:00-گە دەيىن جۇمىس ىستەۋدە. ال ولارعا قاجەتتى دارىلەر ءوز ۋاقىتىندا جەتكىزىلىپ وتىر. سونىمەن قاتار ءدارىحانالار مەن اۋرۋحانالار دا ءدارى-دارمەكپەن قامتىلۋدا.
ايتا كەتەيىك, حالىق دەنساۋلىعىن نىعايتۋ ماقساتىندا پنەۆمونيا, جرۆي دەرتىنە شالدىققان ناۋقاستاردى ەمدەۋ ءۇشىن مەملەكەتتىك 26 ەمحانادا 314 توسەك-ورىندىق كۇندىزگى ستاتسيونار اشىلدى. ءبىر توسەك-ورىن كۇنىنە كەمىندە 5 ادامعا قىزمەت كورسەتۋگە مۇمكىندىگى بار. ياعني 1570 تۇرعىندى ەم-دوم شارالارىمەن قامتيدى. بۇل ءۇشىن 39 دارىگەر, 57 مەدبيكە قىزمەت كورسەتۋدە.
قالا باسشىسى قازىر مەديتسينا قىزمەتكەرلەرىنە جۇكتەلگەن مىندەتتىڭ اۋىر ەكەنىن العا تارتىپ, تىنىمسىز ەڭبەك ەتىپ جاتقان مامانداردىڭ جۇمىسىنا تۇسىنىستىكپەن قاراۋعا شاقىردى. ەڭ باستىسى, قولايسىز ەپيدەميالىق جاعدايعا بايلانىستى تۇرعىندارعا ساقتىق شارالارىن قاتاڭ ۇستانۋ قاجەت ەكەنىن ەسكەرتتى.
شىنىندا, دۇنيەنى دۇربەلەڭگە سالعان ىندەت اق جەلەڭدى ابزال جانداردىڭ دا جۇيكەسىن جۇندەي ءتۇتىپ بارادى. جۋىردا قازنەتتە تارالعان شىمكەنت قالاسىنداعى ينفەكتسيالىق اۋرۋحانا ماڭىندا بولعان جاعداي بويىنشا جەدەل جاردەم دارىگەرى ارمان حامزين تۇسىرگەن ۆيدەو قىزۋ تالقىلانعان بولاتىن.
بەينەروليك يەسى ارمان حامزين مەديتسينالىق مامان بولعاندىقتان, ناۋقاستاردىڭ جاعدايى ءۇشىن الاڭداپ, وسى بەينەروليكتى تۇسىرگەنىن جەتكىزدى.
«وزدەرىڭىزگە ءمالىم, ءۇش ايدان بەرى العى شەپتە جۇمىس ىستەپ كەلەمىز. بۇل – وتە اۋىر. ناۋقاستاردى كورگەندە, ءتىپتى پسيحوەموتسيالىق جاعدايلار بولادى. وسى ورايدا ءوز دەنساۋلىعىمىز بەن وتباسىمىز ءۇشىن دە الاڭدايمىز. ال كەشە الەۋمەتتىك جەلىدە تاراعان بەينەروليككە توقتالسام, ءدال قازىرگى تاڭدا پنەۆمونيامەن اۋىرعان ناۋقاستاردىڭ سانى ءوستى. بۇل جاعدايدى قالىپتى ۇستاۋ ءۇشىن جان-جاقتى جۇمىستار جۇرگىزىلىپ, ستاتسيونارلىق ورتالىقتار اشىلۋدا. اتالعان وقيعا بولار كەزدە ناۋقاستى ينفەكتسيالىق اۋرۋحاناعا جاتقىزۋ تۋرالى كوورديناتسيا بەرگەن. بىراق ءبىز اۋرۋحانا الدىنا كەلگەندە جەدەل-جاردەم كولىكتەرىنىڭ كوبەيىپ كەتكەنىن كوردىك. ءسويتىپ, ينفەكتسيالىق اۋرۋحانادا ورىن جەتىسپەۋشىلىگى تۋىندادى. ياعني بىزگە ديسپەتچەرلىك ورتالىق دۇرىس باعىت بەرمەگەن. ال ناۋقاس ەكى جاقتى پنەۆمونيانىڭ اۋىر تۇرىمەن اۋىرعان, جاعدايى ناشار ەدى. سول سەبەپتى ناۋقاستى جەدەل ورنالاستىرۋ قاجەت بولاتىن. وسى ۋاقىتتا جاعداي ۋشىقتى. ناۋقاستىڭ ءحالى ناشارلاي بەردى. ونىڭ ومىرىنە الاڭداپ, بەينەروليككە ءتۇسىردىم. سودان كوپ ۇزاماي, ماسەلە شەشىلىپ, ناۋقاستى قايدا ورنالاستىرۋ تۋرالى حابارلاما كەلدى. وسى رەتتە بۇل ءتۇسىرىلىمنىڭ الەۋمەتتىك جەلىدە تاراپ, حالىقتىڭ دۇرلىككەنىن قالاماعانىمدى ايتا كەتەيىن. الداعى ۋاقىتتا مۇنداي ارەكەتتەر قايتالانبايتىنىن جەتكىزە وتىرىپ, كەشىرىم سۇرايمىن», دەدى ارمان سايات ۇلى.
قازىرگى تاڭدا قالاداعى بارلىق دەنساۋلىق ساقتاۋ مەكەمەلەرى شۇعىل تۇردە ناۋقاستارعا مەديتسينالىق كومەك كورسەتۋگە كوشتى. سونداي-اق كەيبىر ناۋقاستاردى ءۇي رەجىمىندە وقشاۋلاپ, ەمدەۋدە. ەپيدەميالىق جاعدايعا بايلانىستى ەم الۋشىلار ەندى ۇيدەن شىقپاي-اق تىركەلگەن مەكەنجايى بويىنشا دارىگەرلەرگە حابارلاسادى. ءارى ءاربىر تۇرعىن ءوزى تىركەلگەن ەمحاناعا بارىپ كۇندىزگى ستاتسيوناردا ەمدەلە الادى. بۇگىندە شاھارداعى جەرگىلىكتى ەمحانالاردىڭ بارلىعىندا توسەك-ورىن مەن دارىلىك زاتتار جەتكىلىكتى.
شىمكەنت
