تەستىلەۋدىڭ اشىقتىعى مەن وبەكتيۆتىلىگىن قامتاماسىز ەتۋ ءۇشىن ءبىلىم جانە عىلىم مينيسترلىگىنىڭ بۇيرىعىمەن ەلىمىزدىڭ بارلىق ايماقتارىندا جۇمىس توبى قۇرىلدى. ونىڭ قۇرامىنا ارنايى مونيتورينگ توپ, "ادالدىق الاڭى" جوبالىق كەڭسەسىنىڭ وكىلدەرى جانە اگەنتتىك قىزمەتكەرلەرى كىردى.
بۇل توپتىڭ نەگىزگى ماقساتى تەستىلەۋدىڭ "تازالىعىن" باقىلاۋ بولىپ تابىلادى. قانداي دا ءبىر سايكەسسىزدىكتەر نەمەسە تەستىلەۋ ەرەجەلەرى بۇزىلعان جاعدايلار انىقتالعاندا, ولار بۇل تۋرالى جاۋاپتى تۇلعالارعا حابارلاۋعا مىندەتتى.
ماڭعىستاۋ وڭىرىندە اقتاۋ, جاڭاوزەن قالالارىندا جانە ماڭعىستاۋ, بەينەۋ اۋداندارىنداعى پۋنكتتەردە ۇبت وتكىزىلۋدە. ماڭعىستاۋ اۋدانى بويىنشا ۇبت شاراسى ءوز مارەسىنە جەتىپ, قالعان پۋنكتتەردە ودان ءارى تەست جالعاسۋدا. قوعام بەلسەندىلەرىنەن قۇرالعان باقىلاۋشىلار وسى اتالعان پۋنكتتەردە تەست سۇراقتارى سالىنىپ كەلگەن قاپتاردىڭ اشىلۋ ساتىنەن باستاپ, تالاپكەرلەردىڭ جاۋاپتارى سكانەرلەنۋىنە دەيىنگى بارلىق پروتسەستى باقىلاۋدا ۇستايدى.
21-24 ماۋسىم ارالىعىندا ۇبت قاتىسۋعا نيەت بىلدىرگەن 2603 تالاپكەرلەردىڭ مەتالىزدەگىش قۇرىلعىسىنىڭ كومەگىمەن انىقتالعان رۇقسات ەتىلمەگەن قۇرىلعىلاردى وزىمەن بىرگە الىپ كىرمەك بولعان 50 تالاپكەر تەستىلەۋدەن شەتتەتىلسە, تەستىلەۋ ەرەجەسىن بۇزعانى ءۇشىن اۋديتوريادان 56 تالاپكەر شىعارىلىپ, ناتيجەلەرى جويىلدى.
سونىمەن قاتار, تەستىلەۋ وتكىزىلگەن ءاربىر اۋديتوريانىڭ بەينەجازبالارى ۇلتتىق بىرىڭعاي تەستىلەۋ ورتالىعىنا جولدانىپ, ساراپشىلار جازبالاردى اعىمداعى جىلدىڭ 25 تامىزىنا دەيىنگى ارالىقتا قايتا تالداپ قارايتىن بولادى. ەگەر قانداي دا ءبىر ەرەجە بۇزۋشىلىقتار مەن رۇقسات ەتىلمەگەن قۇرىلعىلار انىقتالعان جاعدايدا تالاپكەردىڭ تەستىلەۋ قورىتىندىلارى جويىلادى. وسىعان بايلانىستى اگەنتتىك وقۋشىلاردى تەك ءوز بىلىمدەرىنە عانا سۇيەنە وتىرىپ, تەست تاپسىرۋعا شاقىرادى, ال اتا-انالاردى تەستىلەۋ قورىتىندىسى بويىنشا وڭ باعا الۋ ماقساتىندا پارا بەرگەنى ءۇشىن قىلمىستىق جاۋاپكەرشىلىك جانە باس بوستاندىعىنان ايىرۋ كوزدەلگەنىن ەسكەرتەدى.
