America’s Got Talent شوۋىنداعى دانەليانىڭ تىڭدالىمى 3 ەپيزودتا كورسەتىلدى. 13 جاسار قازاقستاندىق ونەرپاز كانادالىق ءانشى Faouzia-نىڭ "Tears of Gold" ءانىن ورىندادى. قازىلار القاسى مەن شوۋ قوناقتارى دانەليانىڭ ونەرىن جوعارى باعالاپ, وتانداسىمىزعا تىك تۇرىپ قوشەمەت كورسەتتى.
"مەن ايگىلى America's Got Talent اتتى بايقاۋدا باعىمدى سىناپ كورەمىن. مەنىڭ ويىمشا, بۇل كەز كەلگەن ءارتىس ءۇشىن قاتىسۋدى ارماندايتىن وتە جوعارى دەڭگەيدەگى كونكۋرس. وتە قىزىقتى بولاتىنىنا سەنىمدىمىن. ءاربىر كەزەڭدە ءوزىمدى 150% كورسەتۋگە تىرىسامىن. ەگەر ءسىز ءۇشىن قىزىقتى بولسا, بايقاۋدى تاماشالاۋدى باستاڭىز", - دەپ دانەليا شوۋ الدىندا ءوزىنىڭ پىكىرىمەن ءبولىستى.
15-ءشى رەت ۇيىمداستىرىلىپ جاتقان ايگىلى بايقاۋ 26 مامىر كۇنى NBC تەلەارناسىندا, ال 29 مامىردا Netflix پلاتفورماسىندا باستالدى. قازىلار القاسىنىڭ قۇرامىندا America’s Got Talent شوۋىنىڭ نەگىزىن قالاۋشى جانە جوبانىڭ پروديۋسەرى سايمون كوۋەلل, تالانتتى ءارتىس سوفيا ۆەرگارا, ءسان الەمىنىڭ جۇلدىزى حايدي كلۋم, كوپشىلىكتىڭ سۇيىكتى ازىلقويى حوۋي مەندەل بار. شوۋدىڭ جۇرگىزۋشىسى - تەرري كريۋس.
تەلەجوبا 2006 جىلدىڭ 21 ماۋسىمىنان باستاپ ءداستۇرلى تۇردە وتكىزىلىپ كەلەدى. تالانتتار شوۋىندا انشىلەر, بيشىلەر, سيقىرشىلار, ازىلقويلار جانە بارلىق جاستاعى باسقا دا تالانتتى ادامدار ونەر كورسەتەدى. America ' s Got Talent شوۋىنىڭ باس جۇلدەسى - 1 ميلليون دوللار.
ايتا كەتۋ كەرەك, دانەليا تولەشوۆا بۇعان دەيىن "گولوس ۋكراينا", "Junior Eurovision" جانە "The World's Best" جوبالارىنا قاتىسقان ەدى.
