وسى ءۇش ايدا بازالىق مولشەرلەمە شۇعىل تۇردە 9,25% -دان 12% -عا كوتەرىلدى, پايىزدىق ءدالىز +/- 1,5 پايىزدىق تارماققا دەيىن ۇلعايتىلدى. سودان كەيىن كۇتپەگەن جەردەن - 9,5% دەيىن تومەندەدى, بىراق سونىمەن بىرگە پايىزدىق مولشەرلەمە +/- 2 پ.پ. دەيىن كەڭەيتىلدى.
مامىر ايىنىڭ سوڭىندا ۇلتتىق بانكتىڭ توراعاسى ەربولات دوساەۆ بازالىق مولشەرلەمەنى ودان ءارى ەداۋىر تومەندەتۋ ۇزاق مەرزىمدى پەرسپەكتيۆادا ەكونوميكاعا جاعىمسىز سالدارعا اكەلەتىنىن ايتتى. بۇل سونىمەن قاتار بانكتەردىڭ رەسۋرستىق بازاسىنىڭ تومەندەۋىنە اكەلۋى مۇمكىن. بۇل فاكتور بانكتەردە جەكە تۇلعالاردىڭ دەپوزيتتەرىنىڭ اعىپ جىلىستاپ كەتۋىنە الىپ كەلەدى.
بۇل ماسەلە كەزىندە پارلامەنتتە كوتەرىلدى, دەپۋتاتتىڭ سۇراۋىنا ۇلتتىق بانك جاۋاپ بەردى: ۇلتتىق بانكتىڭ ەكونوميكانى 3-4%-دان باستاپ نەسيەلەندىرۋدى باستاۋ ءۇشىن بازالىق مولشەرلەمەنى تومەندەتۋگە بارلىق جاعدايلارى بار ەكەندىگى جانە بۇل ماسەلەگە قاجەت كەزدە قايتا ورالاتىنى ايتىلعان. ساراپشىلار بولسا, ۇلتتىق بانك بازالىق مولشەرلەمە تۋرالى شەشىم قابىلدار كەزدە اسىعىستىققا جول بەرمەۋى قاجەتتىگىن, نارىقتىڭ ەركىنە سالۋعا, نارىقتىڭ ءوزى رەتتەۋىنە مۇمكىندىك بەرۋ كەرەكتىگىن ايتادى.
ال بۇگىن «ۇلتتىق بانك قانداي شەشىم قابىلداۋى مۇمكىن؟» دەگەن سۇراققا ساراپشىلاردىڭ باسىم كوپشىلىگى «وزگەرمەيدى, وسىعان دەيىنگى دەڭگەيدە قالادى» دەپ جاۋاپ بەردى. سەبەبى ىشكى نارىقتا وزگەرىستەرگە باستايتىن بەتبۇرىستار بايقالمايدى. قازىر دۇرىسى سوڭىن كۇتۋدەن وزگە جول جوق. ءبىز الەمدىك ەكونوميكاعا ىقپال ەتەتىن كەزگە جەتكەن جوقپىز. قازىر ءبىز ءۇشىن وزگە نارىقتارعا قاراپ, ىشكى نارىقتىڭ بەتالىسىن سولارعا قاراپ ۇيلەستىرۋدەن وزگە جول جوق. قارجىگەر ءىلياس يساەۆتىڭ پايىمداۋىنشا, تەڭگەنىڭ كۇش الۋى پايىزدىق مولشەرلەمە دەڭگەيىن وزگەرتە المايدى. باس بانك بۇل جەردە تەڭگەنىڭ باعامىنا ەمەس, ينفلياتسيانى تارگەتتەۋگە عانا باسىمدىق بەرىپ تۇر. بۇل تۇستا ۇلتتىق بانكتىڭ ءرولى رەتتەۋشى ەمەس, پايىزدىق شەشىمدى قابىلدايتىن تريگگەردىڭ رولىنە كوبىرەك ۇقسايدى.
«قازىر ينفلياتسيا دەڭگەيى 6.4 پايىز. ول سول شەكتەن اسىپ كەتپەۋ ءۇشىن پايىزدىق مولشەرلەمە دەڭگەيىن كوتەرۋ كەرەك. ءبىز پاندەميانىڭ قىسپاعىنان ەندى بوساپ كەلە جاتىرمىز. ءدال قازىر پايىزدىق مولشەرلەمەنى كوتەرۋ جاعدايدى قيىنداتىپ جىبەرەدى. قازىر ونى وزگەرتۋگە سەبەپ كورىپ تۇرعان جوقپىن» دەيدى ءىلياس يساەۆ.
