«مينيسترلىك ءتىل سالاسىنىڭ ۇيلەسىمدى دامۋىن كوزدەيتىن مەملەكەتتىك ساياساتتى ىسكە اسىرادى. وزەكتى ماسەلەلەردىڭ ءبىرى قازاق ءالىپبيىن لاتىن گرافيكاسىنا كوشىرۋ. بۇل جۇمىس قالىڭ جۇرتشىلىق پەن ساراپشىلار قوعامداستىعىنىڭ قاتىسۋىمەن جۇرگىزىلۋدە. بۇگىندە عالىمدار, ازاماتتار تاراپىنان 40-قا جۋىق ءالىپبي جوباسى ۇسىنىلدى. اتالعان جوبالاردىڭ اۆتورلارىن, جەتەكشى عالىمداردى, فيلولوگتار مامانداردى, تاۋەلسىز ساراپشىلاردى تارتا وتىرىپ, بىرقاتار كەزدەسۋلەر وتكىزىلۋدە», - دەدى اقتوتى رايىمقۇلوۆا.
ءمينيستردىڭ ايتۋىنشا, مەملەكەت باسشىسىنىڭ لاتىن گرافيكاسىنا نەگىزدەلگەن ءالىپبيىن جەتىلدىرۋگە قاتىستى تاپسىرماسىنا سايكەس كەڭىنەن رەسپۋبليكالىق اشىق تالقىلاۋلار, عىلىمي ساراپتامالار ۇيىمداستىرىلدى. IT ماماندارىنىڭ پىكىرلەرى تىڭدالىپ, ارىپتەردىڭ Unicode ستاندارتتارىنا سايكەس ەسكەرىلگەن پەرنەتاقتا جوبالارى ازىرلەندى.
«كۇنى كەشە عانا مەملەكەت باسشىسى «كومسومولسكايا پراۆدا» گازەتىنە بەرگەن سۇحباتىندا اتاپ وتكەندەي نەگىزگى اقپاراتتار لاتىن گرافيكاسىنا نەگىزدەلگەندىكتەن, ءبىزدىڭ بالالارىمىز جاڭا جاعدايعا بەيىمدەلۋ كەرەك. قازاق ءالىپبيىن جاڭعىرتۋ قازاق ءتىلىنىڭ كوممۋنيكاتسيالىق مۇمكىندىكتەرىن ارتتىرۋ نيەتىنەن تۋىنداعان», - دەدى ا. رايىمقۇلوۆا.
