بۇگىن, «قازمەديا» ورتالىعىندا پرەزيدەنت جانىنداعى ورتالىق كوممۋنيكاتسيالار قىزمەتىنىڭ ۇيىمداستىرۋىمەن اتىراۋ وبلىسىنىڭ اكىمى باقتىقوجا ىزمۇحامبەتوۆ ءباسپاسوز ءماسليحاتىن وتكىزدى. بۇل تۋرالى Bnews.kz حابارلادى.
ءباسپاسوز ءماسليحاتىندا وبلىس باسشىسى ءوڭىردىڭ الەۋمەتتىك-ەكونوميكالىق دامۋىنا, مەملەكەتتىك باعدارلامالاردىڭ جۇزەگە اسىرىلۋ بارىسىنا كەڭىنەن توقتالدى. «وبلىسىمىز الەمنىڭ 50 ەلىمەن ىنتىماقتاستىق ورناتتى. بۇگىندە وڭىردە 400-دەي شەتەل كومپانيالارى جۇمىس ىستەيدى. بيىل ءبىز سونىڭ 25-ىنە كەزەكتەن تىس تەكسەرۋ جۇرگىزدىك. ونىڭ ناتيجەسى بويىنشا شەتەل ەڭبەككەرلەرى مەن ءوزىمىزدىڭ ماماندار اراسىنداعى جالاقى الشاقتىعى انىقتالدى. قازىرگى كەزدە ورىن العان بۇل ولقىلىق تۇزەتىلدى», دەدى ول.
باسقا ايماقتار سەكىلدى اتىراۋ وبلىسىندا دا سوڭعى ءۇش جىل ىشىندە 8 مەديتسينالىق نىسان بوي كوتەرگەن. ال اپاتتى جاعدايدا تۇرعان 11 مەكتەپتىڭ ورنىنا 5 مەكتەپتىڭ قۇرىلىسىن سالۋ ماسەلەسى شەشىمىن تاپتى. الداعى ۋاقىتتا جەرگىلىكتى بيلىك قالعان ءبىلىم وشاعىن سالۋ ماسەلەسىن رەتتەيتىن بولادى.«وبلىستا قامقورلىقتى قاجەت ەتەتىن بالالاردى اسىراپ الۋشى وتباسى سانى ارتتى. سونىڭ نەگىزىندە ءبىر بالالار ءۇيىن جاپتىق, تاعى بىرەۋىندەگى بالالاردىڭ سانى ازايدى. بۇل ايتا كەتەرلىكتەي وتە جاقسى جاعداي. ەكىنشى جاعىنان, ادامداردىڭ تۇرمىس جاعدايىنىڭ جاقسارعانىن كورسەتەدى», - دەدى ءسوز ورايىندا وبلىس اكىمى.
ايماق باسشىسىنىڭ مالىمدەۋىنشە, 9 اي قورىتىندىسى بويىنشا «قولجەتىمدى باسپانا-2020» باعدارلاماسىنا بولىنگەن قاراجات تولىق يگەرىلگەن جانە جىل سوڭىنا دەيىن 22 ءۇي پايدالانۋعا بەرىلەدى. مۇنان وزگە ۇدەمەلى يندۋستريالىق-يننوۆاتسيالىق دامۋ باعدارلاماسى شەڭبەرىندە قۇنى 1,4 ترلن. تەڭگە بولاتىن 34 جوبا ىسكە اسىرىلۋدا. ونىڭ اياسىندا 4,5 مىڭنان اسا جاڭا جۇمىس ورنى اشىلادى دەپ كۇتىلۋدە. بيىل پايدالانۋعا بەرىلگەن ارماتۋرا شىعارۋ زاۋىتى قۇرىلىسقا قاجەتتى ماتەريالدى شىعارسا, الدا ىسكە قوسىلاتىن گاز-حيميا زاۋىتى مەن كومىرسۋتەكتى ءوندىرۋ كەشەنى ەلىمىزگە قاجەتتى ونىمدەردى دايىنداۋدى قولعا الادى.
ءامىرحان الماعانبەتوۆ.
