جان-لۋي توران استاناعا الەمدىك جانە ءداستۇرلى دىندەر كوشباسشىلارى سەزىنىڭ 10 جىلدىق مەرەيتويى اياسىندا سەزد حاتشىلىعىنىڭ ءحىى وتىرىسىنىڭ قۇرمەتتى قوناعى رەتىندە جانە «وركەنيەتتەر ۇنقاتىسۋىنداعى استانا دىنارالىق فورۋمىنىڭ ءرولى» حالىقارالىق عىلىمي-تاجىريبەلىك كونفەرەنتسياسىنا قاتىسۋعا كەلگەن.
ۆاتيكاننىڭ جوعارى دارەجەلى وكىلى كەزدەسۋ بارىسىندا قازاقستان پرەزيدەنتى نۇرسۇلتان نازارباەۆقا ريم پاپاسى فرانتسيسكتىڭ شىنايى ىقىلاسىن جەتكىزدى.
جان-لۋي توران بۇگىنگى كۇندەرى الەمدە ورىن الىپ جاتقان وقيعالار ءارتۇرلى ءدىن وكىلدەرىنىڭ اراسىندا تاباندى ۇنقاتىسۋ بولۋى كەرەكتىگىن دالەلدەي تۇسەتىندىگىنە توقتالدى. قازاقستان دىنارالىق ۇنقاتىسۋدىڭ بولاشاقتا جان-جاقتى قولداۋدى قاجەت ەتەتىن مودەلىن جاسادى, دەدى ول.
ءوز كەزەگىندە سەنات توراعاسى ۆاتيكان باسشىلىعىنا قازاقستاندىق باستامانى قولداعانى, استانا سەزىنىڭ بارىنە دە كورنەكتى وكىلدەرىمەن جوعارى دەڭگەيدە قاتىسقانى ءۇشىن ريزاشىلىعىن ءبىلدىردى.
ۆاتيكان قازاقستاننىڭ ماڭىزدى ساياسي ارىپتەسى ەكەنى اتاپ ءوتىلدى. ەكى ەلدىڭ بەلسەندى بايلانىستارى قازاقستان مەن ۆاتيكان اراسىنداعى قارىم-قاتىناس تۋرالى كەلىسىمنەن كورىنىس تاپتى. قازاقستان – تمد ەلدەرى مەن ورتالىق ازياداعى كيەلى تاقپەن وسىنداي قۇجاتقا قول قويعان ءبىرىنشى ەل.
تاراپتار سونداي-اق 2012 جىلى مامىردا وتكەن IV سەزد بارىسىندا قۇرىلعان ءدىن كوشباسشىلارى كەڭەسى تۋرالى دا اڭگىمە قوزعادى. سەنات توراعاسى ءوز سوزىندە استانا فورۋمى ون جىلدا ءوزىنىڭ قاجەتتىلىگىن دالەلدەي وتىرىپ, جاھاندىق ۇنقاتىسۋدى ىلگەرىلەتۋدەگى ماڭىزدى الاڭعا اينالعانىن اتاپ ءوتتى.
