جۇمىستى ۇيىمداستىرۋشىلاردىڭ ءبىرى, «بەلسەندى ازامات» جوباسىنىڭ جەتەكشىسى سابير نيازوۆ سۋرەتتى سالۋ يدەياسىنىڭ بىلتىر پايدا بولعانىن ايتادى.
– بۇل – قالالارعا ءتان زاماناۋي ونەر. كوركەمسۋرەتتەگى جانردىڭ مۇنداي ءتۇرىن مۋرال دەپ اتايدى. مۇنىڭ ەسكيزىن جاساۋعا جانە دەمەۋشى تابۋعا وبلىس پەن قالا اكىمدەرى كومەكتەستى, – دەيدى ول.
قالاداعى ورتالىق كوشەلەردىڭ ءبىرى – نۇركەن ءابدىروۆ داڭعىلىنداعى №4 ءۇيدىڭ قاسبەتىنە قولىنا اقبوكەننىڭ لاعىن ۇستاپ تۇرعان قورىقشىنىڭ سۋرەتىن قىلقالام شەبەرى شىڭعىس قاسىموۆ سالىپ جاتىر. سۋرەتشى جۇمىستى ەكى اپتانىڭ ىشىندە اياقتايتىنىن ايتادى.
مۋرال تولىق بىتكەن سوڭ, ونىڭ استىڭعى جاعىنا ەرلان نۇرعاليەۆتىڭ ءومىربايانى مەن قىزمەتى جانە ەرلىك ءىسى تۋرالى قىسقاشا اقپارات جازىلعان تاقتايشا قاعىلادى.
جوبانى ۇيىمداستىرۋشىلاردىڭ ايتۋىنشا, وبلىس ورتالىعىندا الداعى ۋاقىتتا باتىر ۇشقىش نۇركەن ءابدىروۆتىڭ بەينەسى كەسكىندەلگەن تاعى ءبىر مۋرال سالىنباقشى.
«وسىلايشا بۇل جۇمىس اعارتۋشىلىق, ولكەتانۋشىلىق قىزمەتتەرىن دە اتقارادى», دەيدى جارقىن يدەيا, جاقسى ءىستىڭ جۋان ىشىندە جۇرگەن «بەلسەندى ازامات» جوباسىنىڭ جەتەكشىسى.
ەسكە سالساق, قورىقشى ەرلان نۇرعاليەۆ اقبوكەندەردى قورعاۋ جولىندا براكونەرلەردىڭ قولىنان بىلتىر قازا تاپقان بولاتىن.
