كەشە, 22 قىركۇيەكتە ءتۇس اۋا قىزىلوردا وبلىسىنا جۇمىس ساپارىمەن كەلگەن قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ بۇگىنگى جۇمىس كۇنىن وبلىس ورتالىعىندا جاڭادان سالىنعان بىرقاتار نىسانداردى ارالاپ كورۋدەن باستادى. بۇل تۋرالى Egmenenews.kz ءتىلشىسى حابارلادى.
پرەزيدەنت الدىمەن «مۇز ايدىنى» سپورتتىق- ساۋىقتىرۋ كەشەنىنە باردى. جالپى كولەمى 7985 شارشى مەترلىك كەشەن 3 بولىكتەن تۇرادى. قازىرگى زامان تالابىنا ساي سالىنعان ورتالىقتا حوككەي, مانەرلەپ سىرعاناۋ, شورت-ترەك سىندى قىسقى سپورت تۇرلەرىن دامىتۋعا بولادى. وندا مۇز ايدىنىنان بولەك, گاندبول, ۆولەيبول, باسكەتبول, كۇرەس جانە كوركەم گيمناستيكاعا سەكتسيالارى ءۇشىن جابدىقتار مەن زالدار قاراستىرىلعان. كەشەندە بولعان مەملەكەت باسشىسى ەكى دۇركىن وليمپيادا چەمپيونى يليا يلين باستاعان وبلىس سپورتشىلارىمەن كەزدەستى.
ەلباسى بۇدان كەيىن «باستاۋ» بيزنەس ورتالىعىنا توقتادى. وندا ساعاتىنا 250 جولاۋشىعا قىزمەت كورسەتەتىن حالىقارالىق جولاۋشىلار تەرمينالىنىڭ جوباسى تانىستىرىلدى. جالپى اۋماعى 9200 شارشى مەتر بولاتىن جاڭا اۋەجاي حالىقارالىق ستاندارتتارعا سايكەس سالىنىپ, جولاۋشىلارعا كورسەتىلەتىن قىزمەت ساپاسى ارتادى. جوسپار بويىنشا قۇرىلىس جۇمىستارىن 2014 جىلدىڭ كۇزىنە دەيىن اياقتاۋ كوزدەلگەن. بۇل اۋەجايداعى ۇشاقتاردىڭ ۇشىپ قونۋ الاڭى 3 جىل بۇرىن قايتا جاڭعىرتۋدان ءوتىپ, حالىقارالىق تالاپتارعا سايكەستەندىرىلگەن.
پرەزيدەنتتىڭ جۇرتشىلىق وكىلدەرىمەن وتكەن جيىنىندا وبلىس اكىمى قىرىمبەك كوشەرباەۆ ءوڭىردىڭ وزەكتى ماسەلەلەرىنە توقتالىپ, «قىزىلوردا وبلىسىنىڭ 2020 جىلعا دەيىنگى الەۋمەتتىك-ەكونوميكالىق دامۋى ستراتەگياسى» قۇجاتىنىڭ نەگىزگى باعىتتارىمەن تانىستىردى.
كەزدەسۋدە«رزا» اكتسيونەرلىك قوعامىنىڭ پرەزيدەنتى س. يماندوسوۆ, «اتامەكەن وداعى» ۇەپ جانىنداعى وبلىستىق كاسىپكەرلەر كەڭەسىنىڭ توراعاسى ا. ماحامبەتوۆ, «قازگەرمۇناي» بىرلەسكەن كاسىپورىننىڭ باس ديرەكتورى م. كارىم, «بايقوڭىر» اكك» ۇك» اق باسقارما ءتورايىمىنىڭ ورىنباسارى ي. سەيداحانوۆ, بالىق شارۋاشىلىعىن دامىتۋ جونىندەگى وبلىستىق كونسورتسيۋم توراعاسى ءا.ايىمبەتوۆ جانە قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ رەكتورى ق. بيسەنوۆ ءسوز الىپ, مەملەكەتتىك, اسىرەسە ينفراقۇرىلىمدىق باعىتتاعى باعدارلامالاردىڭ ايماق ەكونوميكاسىنا وڭ ىقپالى تۋراسىندا, قازاقستان پرەزيدەنتىنىڭ تاپسىرماسى بويىنشا جۇزەگە اسقان جوبالار جونىندە وي پىكىرلەرىن ءبىلدىردى.
ەرجان بايتىلەس,
«ەگەمەن قازاقستان».
قىزىلوردا.
