31 606 ادام ەۆاكۋاتسيالاندى
الدىمەن وزبەكستانداعى بۇزىلعان دامبانىڭ سالدارىنان تۇركىستان وبلىسى ماقتاارال اۋدانىنداعى ەلدى مەكەندەردى سۋ باسۋىنا بايلانىستى تۇركىستان وبلىسىنىڭ اكىمى ومىرزاق شوكەەۆ بايانداما جاسادى. بەلگىلى بولعانداي, بۇگىنگى تاڭدا 14 ەلدى مەكەننەن 31 606 تۇرعىن ەۆاكۋاتسيالاندى. تۇرعىندار سانى 6 127 ادامدى قۇرايتىن 5 ەلدى مەكەن – جاڭاتۇرمىس, جەڭىس, فيردوۋسي, ورگەباس, دوستىق اۋىلدارى تولىعىمەن سۋ استىندا قالعان.
– 7 ەلدى مەكەننىڭ ءالى دە سۋ استىندا قالۋ قاۋپى بار, ال ەكى اۋىلدا – مىرزاكەنت پەن اقجولدا قاۋىپ سەيىلگەندىكتەن, حالىق ۇيلەرىنە ورالدى. 15 مىڭ ادام تۇراتىن مىرزاكەنت كەنتىندە سۋ باسۋ قاۋپىن بولدىرماۋ ءۇشىن اۋقىمدى جۇمىستار جۇرگىزىلدى. اتاكەنت جانە ماقتاارال كەنتتەرىنىڭ, جامبىل اۋىلدىق وكرۋگىندەگى مەكتەپتەردىڭ بازاسىندا 14 ەۆاكۋاتسيالىق قابىلداۋ پۋنكتى ۇيىمداستىرىلدى, وندا بۇگىنگى تاڭدا 3 200 ادام ورنالاستىرىلعان. قالعان ادامدار تۋىسقاندارىن پانالادى. ەۆاكۋاتسيالىق قابىلداۋ پۋنكتتەرى بارلىق قاجەتتى جابدىقتارمەن جاراقتالعان. كارانتينگە بايلانىستى جاعدايدى ەسكەرە وتىرىپ, 120 مەديتسينا قىزمەتكەرى كومەك كورسەتۋدە, – دەدى ءو.شوكەەۆ.
ونىڭ ايتۋىنشا, 845 تۇرعىن ءۇي, 3 مەكتەپ, 5 بالاباقشا, 4 مەديتسينا ۇيىمى, 1 مادەنيەت ءۇيى مەن 10 دۇكەن سۋ استىندا قالعان. سونىمەن قاتار جەڭىس اۋىلىنداعى كوپىر مەن رەسپۋبليكالىق جانە وبلىستىق ماڭىزى بار 54,7 شاقىرىم اۆتوجولدى سۋ باستى. 7 639 گەكتار ەگىس القابى زارداپ شەكتى. سونداي-اق سۋ باسقان اۋماقتاعى ءولىپ قالعان مال سانى ناقتىلاندى. بۇگىندە كەلتىرىلگەن زالالدى ەسەپتەۋ جالعاسىپ جاتىر.
– نۇرلى جول, ورگەباس, ىرىستى, جانتاقساي ەلدى مەكەندەرىن سۋ باسپاۋى ءۇشىن بوگەتتەر سالىندى, فيردوۋسي ەلدى مەكەنىنىڭ ماڭىندا مىرزاكەنت باعىتىندا كوللەكتور قويىلدى. سونىمەن قاتار ماقتاارال اۋدانىنان سۋدى جىلدام شىعارۋ ءۇشىن وزبەكستان تاراپى كانال قازدى. وزبەكستاندىق ماماندارمەن تىعىز ارەكەتتەسىپ وتىرمىز. كورشى ەلدەگى جاعداي تۇراقتاندى. سوندىقتان ولار ءوز تەحنيكاسىمەن كەلىپ, ءبىزدىڭ كوللەكتورلاردى تازارتىپ بەرۋگە ءازىر, – دەدى ءو.شوكەەۆ.
وبلىس باسشىلىعى سۋ استىندا قالعان ەلدى مەكەندەردى سۋ كەتكەن سوڭ ارالاپ, ءاربىر زارداپ شەككەن وتباسىنا وتەماقى تولەۋ مۇمكىندىگىن قاراستىراتىنىن جەتكىزدى.
بۇل ماسەلەگە بايلانىستى پرەمەر-ءمينيستردىڭ ورىنباسارى ر.سكلياردىڭ توراعالىعىمەن ۇكىمەتتىك كوميسسيا قۇرىلعان بولاتىن. پرەمەر-مينيستر ا.مامين بەس اۋىلعا – جاڭاتۇرمىس, جەڭىس, فيردوۋسي, ورگەباس, دوستىق اۋىلدارىنا كەلتىرىلگەن زالال شۇعىل ەسەپتەلىپ, ودان سوڭ ينجەنەرلىك, كولىك, الەۋمەتتىك ينفراقۇرىلىم مەن تۇرعىن ءۇيدى قالپىنا كەلتىرۋ جۇمىستارى باستالاتىنىن ايتتى. ۇكىمەت زارداپ شەككەندەرگە بارلىق قاجەتتى كومەكتى كورسەتەتىن بولادى.
2 410 جوبا قارجىلاندىرىلادى
جۇمىسپەن قامتۋدىڭ جول كارتاسىن ىسكە اسىرۋ ماسەلەسى بويىنشا ەڭبەك جانە حالىقتى الەۋمەتتىك قورعاۋ ءمينيسترى ب.نۇرىمبەتوۆ, الماتى وبلىسىنىڭ اكىمى ا.باتالوۆ, تۇركىستان وبلىسىنىڭ اكىمى ءو.شوكەەۆ, قاراعاندى وبلىسىنىڭ اكىمى ج.قاسىمبەك, جامبىل وبلىسىنىڭ اكىمى ب.ساپارباەۆ بايانداما جاسادى.
ەڭبەك جانە حالىقتى الەۋمەتتىك قورعاۋ ءمينيسترى ب.نۇرىمبەتوۆتىڭ ايتۋىنشا, كوروناۆيرۋس پاندەمياسى ەكونوميكاعا جانە ەڭبەك نارىعىنا تەرىس اسەر ەتۋدە. وسىعان بايلانىستى ۇكىمەت قابىلداپ جاتقان ماڭىزدى شارالاردىڭ ءبىرى – جاڭا «جۇمىسپەن قامتۋدىڭ جول كارتاسى».
– باعدارلامانىڭ نەگىزگى شارتتارى – قىزمەت كورسەتۋشىلەردىڭ جانە پايدالاناتىن قۇرىلىس ماتەريالدارىنىڭ كەم دەگەندە 90%-ى وتاندىق وندىرۋشىلەر مەن مەردىگەرلەردەن بولۋى ءتيىس. قۇرىلىپ جاتقان جۇمىس ورىندارىنا جۇمىسسىز جۇرگەندەردىڭ, اسىرەسە جاستاردىڭ كەم دەگەندە 50%-ى جۇمىسپەن قامتۋ ورتالىقتارى ارقىلى تارتىلۋى كەرەك, – دەدى مينيستر.
اتالعان جوبالاردى ىسكە اسىرۋ اياسىندا بارلىعى 255 مىڭ جۇمىس ورنى قۇرىلادى. سونىمەن قاتار ىسكە اسىرىلعان جوبالار ەكونوميكانىڭ ءتۇرلى سالالارىندا 100 مىڭنان استام تۇراقتى جۇمىس ورىندارىنىڭ اشىلۋىنا ىقپال ەتەدى.
– جول كارتاسىندا ىرىكتەلگەن جوبالار ۋاقىتشا جۇمىس اشۋمەن قاتار, الەۋمەتتىك ماڭىزدى ماسەلەلەردى شەشۋگە, ەكونوميكالىق تيىمدىلىكتى ارتتىرۋعا, ارالاس سالالاردى دامىتۋعا, تۇراقتى جۇمىس ورىندارىن قۇرۋعا ىقپال ەتەدى, – دەپ اتاپ ءوتتى ب.نۇرىمبەتوۆ.
بەلگىلى بولعانداي, وبلىس اكىمدەرى «جۇمىسپەن قامتۋدىڭ جول كارتاسى» اياسىندا 6 506 جوبا ۇسىنعان. ونىڭ ىشىندە 2 703 جوبا – الەۋمەتتىك ينفراقۇرىلىمعا, 1 039 جوبا – تۇرعىن ءۇي شارۋاشىلىعىنا, 1 799 جوبا – ينجەنەرلىك-كولىك ينفراقۇرىلىمىنا, 695 جوبا ەلدى مەكەندەردى اباتتاندىرۋعا ارنالىپ وتىر. اتالعان جوبالاردى ىسكە اسىرۋ اياسىندا بارلىعى 255 مىڭ جۇمىس ورنى قۇرىلادى دەپ كۇتىلۋدە.
ەڭبەك جانە حالىقتى الەۋمەتتىك قورعاۋ ءمينيسترىنىڭ ايتۋىنشا, «جول كارتاسى» اياسىندا 80 جاڭا ءبىلىم بەرۋ مەكەمەسى سالىنادى. ءوز كەزەگىندە, بۇل اپاتتى جانە ءۇش اۋىسىمدى مەكتەپتەردىڭ پروبلەماسىن شەشۋگە, اۋىلداعى بالالاردىڭ ءبىلىم الۋىن قامتاماسىز ەتۋگە, پەداگوگ ماماندارعا ارنالعان 7 مىڭ جاڭا جۇمىس ورنىن اشۋعا مۇمكىندىك بەرەدى. جاڭا وتباسىلىق دارىگەرلىك امبۋلاتوريالار اۋىلدىق جەرلەردەگى حالىقتىڭ دەنساۋلىعىن جاقسارتۋعا, مەديتسينالىق ساقتاندىرۋ جۇيەسىن جەتىلدىرۋگە, اۋىلدىق ەلدى مەكەندەردە دارىگەر-مامانداردىڭ تۇراقتى جۇمىسپەن قامتىلۋىن قامتاماسىز ەتۋگە جول اشادى.
– بارلىق 6 506 جوبانىڭ 2 410-ى رەسپۋبليكالىق بيۋدجەتتە قاراستىرىلعان قاراجات ەسەبىنەن ىسكە اسىرىلۋدا. 1 مامىرداعى جاعداي بويىنشا مەملەكەتتىك ساتىپ الۋ كونكۋرستارى اياقتالدى, 1 779 جوبا بويىنشا (نەمەسە 73,8%) مەردىگەرلەر انىقتالدى, – دەدى ب.نۇرىمبەتوۆ. ونىڭ ايتۋىنشا, بۇل باعىتتا جامبىل, شىعىس قازاقستان, پاۆلودار, قاراعاندى, الماتى, تۇركىستان وبلىستارى الدا كەلەدى. بىرقاتار وڭىرلەردە 1 265 جوبا بويىنشا جۇمىس باستالدى.
بۇعان قوسا ەڭبەك جانە حالىقتى الەۋمەتتىك قورعاۋ مينيسترلىگى «جول كارتاسىن» ىسكە اسىرۋدى مونيتورينگىلەۋ تەتىگىن ازىرلەگەن. ءاربىر وبلىس, قالا, اۋدان جانە اۋىل بويىنشا ەسەپ جۇرگىزىلەدى, ءاربىر جوبا بويىنشا ونىڭ «پاسپورتى» ازىرلەندى. «پاسپورتتا» جوبانىڭ اتاۋىنان باستاپ, ونىڭ ماقساتى, قول جەتكىزۋى ءتيىستى تۇپكىلىكتى جوسپارلى كورسەتكىشى, ورىندالۋ مەرزىمى, مەردىگەر تۋرالى مالىمەتتەر, قۇرىلاتىن جۇمىس ورىندارىنىڭ سانى, جۇمىسپەن قامتۋ ورتالىعى ارقىلى قابىلدانعانداردىڭ جالاقى مولشەرى كورسەتىلەدى. بارلىق باعدارلامالاردىڭ الەۋەتىن ەسكەرە وتىرىپ, 2020 جىلى 1 ملن 220 مىڭ ادامدى جۇمىسقا تارتۋعا مۇمكىندىك بار.
تاقىرىپتى قورىتىندىلاۋ بارىسىندا پرەمەر-مينيستر ۇكىمەت بۇگىنگى تاڭدا تۇرعىنداردىڭ جۇمىسىن ساقتاۋعا باسىمدىق بەرەتىنىن اتاپ ءوتتى. بۇل رەتتە جۇمىسپەن قامتۋ جانە حالىقتىڭ ەكونوميكالىق بەلسەندىلىگىن ساقتاۋمەن قاتار, ينفراقۇرىلىمدى جاقسارتۋ ەل ەكونوميكاسىن قالپىنا كەلتىرۋدە جاقسى ناتيجە بەرەدى.
ۇكىمەت باسشىسى شىعىس قازاقستان, الماتى, جامبىل, قاراعاندى, تۇركىستان جانە پاۆلودار وبلىستارىندا جوبالاردى باستاۋ قارقىنى جاقسى ەكەنىن اتاپ ءوتىپ, كەرىسىنشە قىزىلوردا وبلىسى, الماتى جانە شىمكەنت قالالارى ارتتا قالىپ كەلە جاتقانىن تىلگە تيەك ەتتى.
– وڭىرلەردىڭ اكىمدىكتەرىنە ينفراقۇرىلىمدىق جوبالاردى تولىق ىسكە اسىرۋدى باستاۋدى تاپسىرامىن. سونىمەن قاتار كورسەتىلەتىن قىزمەتتەر مەن تاۋارلاردىڭ وتاندىق بولۋىن قاداعالاۋ كەرەك. بارلىق بولىنگەن قاراجات ەكونوميكاعا جۇمىس ىستەۋى ءتيىس, – دەدى ا.مامين.
ۇكىمەت باسشىسى بارلىق مەملەكەتتىك ورگاندارعا جۇمىسپەن قامتۋ بويىنشا جوسپارلانعان كورسەتكىشتەرگە قول جەتكىزۋدى قامتاماسىز ەتۋدى, ال ەڭبەك مينيسترلىگىنە جۇمىسپەن قامتۋدىڭ جول كارتاسىنىڭ, سونداي-اق تۇراقتى جۇمىس ورىندارىن قۇرۋ, حالىقتى جۇمىسقا ورنالاستىرۋ تۇرعىسىنان باسقا دا مەملەكەتتىك باعدارلامالاردىڭ ىسكە اسىرىلۋ بارىسىنا كۇن سايىن مونيتورينگ جۇرگىزۋدى تاپسىردى.
