ەلورداداعى «فوليانت» باسپاسىنان ءبىرجان سال قوجاعۇل ۇلىنىڭ ءان-ولەڭدەرى توپتاستىرىلعان «ال, دۇنيە...» اتتى كىتاپ جارىققا شىقتى. قۇراستىرۋشىسى – ەسىمى ەلىمىزگە جاقسى تانىمال ونەر جاناشىرى, اقىن, جىرشى, سازگەر بايانعالي ءالىمجانوۆ.
ءبىرجان سال – قازاقتىڭ ۇلتتىق ءارى كلاسسيكالىق ونەرىنىڭ جارىق جۇلدىزى. ونىڭ اندەرى ورىنداۋشىسى مىقتى بولسا, بۇگىنگى كۇنى دە تىڭداۋشىعا اسقاق سەزىم, شاعالا شابىت سىيلايتىن ءوز تۇعىرىنان تومەندەگەن ەمەس.
ەلورداداعى «فوليانت» باسپاسىنان ءبىرجان سال قوجاعۇل ۇلىنىڭ ءان-ولەڭدەرى توپتاستىرىلعان «ال, دۇنيە...» اتتى كىتاپ جارىققا شىقتى. قۇراستىرۋشىسى – ەسىمى ەلىمىزگە جاقسى تانىمال ونەر جاناشىرى, اقىن, جىرشى, سازگەر بايانعالي ءالىمجانوۆ.ءبىرجان سال – قازاقتىڭ ۇلتتىق ءارى كلاسسيكالىق ونەرىنىڭ جارىق جۇلدىزى. ونىڭ اندەرى ورىنداۋشىسى مىقتى بولسا, بۇگىنگى كۇنى دە تىڭداۋشىعا اسقاق سەزىم, شاعالا شابىت سىيلايتىن ءوز تۇعىرىنان تومەندەگەن ەمەس.ون توعىزىنشى عاسىردا ءومىر ءسۇرىپ, ارقادا تۇتاس انشىلىك مەكتەپ قالىپتاستىرىپ, قازاق مۋزىكاسىن جاڭا بيىككە كوتەرگەن ءبىرجان سالدىڭ شىعارماشىلىعى – تۇتاس ءبىر پوەتيكالىق الەم. بۇل تۋرالى بايانعالي ءالىمجانوۆ كىتاپتىڭ العىسوزىندە «ونىڭ اندەرى ءبىر جارىم عاسىردان استام ۋاقىت بويى كەڭ-بايتاق دالامىزدا ۇزبەي ايتىلىپ كەلەدى. راديودا, تەلەديداردا, كونتسەرتتەردە, كونكۋرس, فەستيۆالدەردە ءبىرجان اندەرى ۇدايى, كۇن سايىن شىرقالىپ, تالاي ۇرپاقتىڭ رۋحاني ازىعىنا اينالدى. ونىڭ مۇراسى ءتىرى. ول حالىقپەن بىرگە جاساي بەرەتىن باي قازىنا» دەپ جازىپتى. ول سونداي-اق, ءبىرجان سال اندەرىن قازاقتىڭ دارىندى, داڭقتى انشىلەرىنىڭ قانشاما بۋىنى اسقاقتاتا سالعانىن, ءوزىن قازاقتىڭ ءداستۇرلى انشىلىك ونەرىنىڭ زاڭدى وكىلى سانايتىن ورەلى انشىلەردىڭ بىرجانعا سوقپاعانى, ءوز مۇمكىندىكتەرىن ءبىرجان اندەرىمەن سىناپ كورمەگەنى كەمدە-كەم ەكەنىن داتتەيدى.
ءبىرجان سال اندەرى توپتاستىرىلعان بۇل جيناق كومپوزيتوردىڭ تۋعانىنا 150 جىل تولۋىنا وراي جارىق كورىپ وتىر. مۇندا سال اندەرىنىڭ ءار كەزدە ا.زاتاەۆيچ, م.تولەباەۆ, ا.جۇبانوۆ, ب.ەرزاكوۆيچ, ق.ءجۇزباسوۆ جازىپ الىپ, جاريالاعان جانە قولجازبا كۇيىندە ساقتالعان نەگىزگىلەرى توپتاستىرىلعان. جانە «جانبوتا», «بۋرىلتاي», «ءلايلىم شىراق», «تەلقوڭىر», «جامباس سيپار», ت.ب ەڭ تانىمال اندەرىنىڭ ءتۇرلى نۇسقالارى جاريالانعان. مۇنى قۇراستىرۋشى ءبىرجاننىڭ ءبىرسىپىرا اندەرى مەن سوزدەرى حالىق اراسىندا ۇزاق ۋاقىت اۋىزشا ساقتالۋىنا بايلانىستى كوپ نۇسقادا كەزدەسەتىنىمەن, وعان قوسا ءاربىر ءانشى ءوزىنىڭ ورىنداۋ بارىسىندا ازدى-كوپتى ءوزگەرىستەر ەنگىزىپ وتىراتىنىمەن تۇسىندىرەدى.
ب.ءالىمجانوۆ «جيناققا ءبىرجان اندەرىنىڭ ءبارى ەندى دەپ قاراۋعا بولمايدى. ويتكەنى حالىق اراسىندا ونىڭ ءالى دە جيناپ, جازىپ الۋىن كۇتىپ جاتقان اندەرى جوق ەمەس. ءانشى مۇراسىنىڭ بەلگىسىز بولىگىن تابۋ, جاريالاۋ – الداعى كۇندەردىڭ مىندەتى» دەيدى ەسكەرتۋ رەتىندە.
«ەگەمەن-اقپارات».
