كەشە ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ وسىنداي ءبىر توسىن جاڭالىقتىڭ شەتىن شىعاردى. ونىڭ ايتۋىنشا, جاقىن كۇندەردە الكوگولدى جانە تەمەكى ونىمدەرىنە اكتسيزدەردىڭ باعاسى كۇرت كوتەرىلىپ كەتكەلى تۇر.
كەشە ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ وسىنداي ءبىر توسىن جاڭالىقتىڭ شەتىن شىعاردى. ونىڭ ايتۋىنشا, جاقىن كۇندەردە الكوگولدى جانە تەمەكى ونىمدەرىنە اكتسيزدەردىڭ باعاسى كۇرت كوتەرىلىپ كەتكەلى تۇر.
«بۇگىنگى تاڭعا سيگارەتتىڭ اكتسيزى ونىڭ مىڭ داناسىنا 1550 تەڭگەنى قۇرايدى. ءبىز 2014 جىلدان باستاپ بۇل مولشەردى 3 مىڭ تەڭگەگە دەيىن ۇلعايتىپ, ءوسىمدى 100 پايىزعا جۋىق دەڭگەيگە ارتتىرامىز. جانە ءبارى مۇنىمەن توقتالىپ قالمايدى. جىل ساناپ بىرتىندەپ كوتەرىلەتىن اكتسيز قۇنى 2020 جىلعا قاراي تەمەكىنىڭ ءاربىر مىڭ داناسىنا 45 ەۋروعا دەيىن جەتەدى», – دەدى مينيستر.
ۆەدومستۆونىڭ ءباسپاسوز قىزمەتى سونداي-اق ءمينيستردىڭ سوزىنە سىلتەمە جاساي وتىرىپ, الكوگول ونىمدەرىنىڭ بۇگىنگى تاڭداعى باعاسى ليترىنە 2,5 ەۋرونى قۇراپ وتىرعانىن ءمالىم ەتەدى. ال 2014 جىلدان باستاپ ول بىردەن 5 ەۋروعا كوتەرىلسە, 2016 جىلعا قاراي 8 ەۋروعا جەتەدى.
«الكوگول مەن سيگارەت اكتسيزىن ۇلعايتۋ قازاقستان ءۇشىن قاجەتتىلىك بولىپ تابىلادى, – دەپ ەسەپتەيدى ە.دوساەۆ. – مۇنداعى ماسەلە تەك ەكونوميكاعا عانا قاتىستى ەمەس. سەبەبى, ءبىزدىڭ ەلىمىزدە تەمەكى مەن ءسپيرتتى ىشىمدىكتەردىڭ باعالارى وتە ارزان. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا, قازاقستان ءبىر ادامعا شاققانداعى ءسپيرتتى ىشىمدىكتى ءىشۋ كورسەتكىشى بويىنشا الەمدەگى الدىڭعى وتىز ەلدىڭ قاتارىنا كىرەدى. ول بىزدە 7-8 ءليتردى قۇرايدى».
«مەن, ارينە, باعالارىنىڭ كۇرت ارتىپ كەتۋىنە بايلانىستى تەمەكى شەگۋشىلەر مەن ءسپيرتتى ىشىمدىك ىشۋشىلەر قاتارى بىردەن ازايا قالادى دەپ سانايتىن قۇرعاق قيالدىڭ ادامى ەمەسپىن, – دەدى مينيستر بۇدان ءارى. – بىراق, وسىدان كەيىن ولاردىڭ بۇرىنعى تۇتىنۋشىلارى قاتارىنا جاڭادان قوسىلاتىندار سانىنىڭ ازايىپ سالا بەرەتىنىنە سەنىمدىمىن. ويتكەنى, ءاربىر ادام ەندى ونى باستار الدىندا قورابىنىڭ باعاسى 5-10 دوللار تۇراتىن تەمەكىنى تارتۋعا بولاتىنىن, ياكي بولمايتىنىن وي ەلەگىنەن وتكىزىپ الاتىنى انىق».
قۇرىش نۇرىمبەت.
