نۇرسۇلتان نازارباەۆتىڭ «بەرەكە-بىرلىكتىڭ المايتىن قامالى, باعىندىرمايتىن بيىگى بولمايدى», دەپ ەلىمىزدى بىرلىككە شاقىرعان سوزدەرى, تەك ەلىمىز عانا ەمەس, بارشا الەم داعدارىسقا ۇشىراعان قيىن-قىستاۋ كەزەڭدە بويىمىزعا رۋحاني كۇش دارىتىپ, جۇرەگىمىزگە سەنىم ۇيالاتتى. ۇلت كوشباسشىسىنىڭ قولداۋ كورسەتكەن اق تىلەۋلى سوزدەرى, ءوز حالقىنا جانە ونىڭ ۇزدىك قادىر-قاسيەتتەرىنە دەگەن سەنىمى قازاقستاندىقتارعا رۋحاني دەمەۋ بولىپ, قۋات بەرەدى. وسىناۋ قىسىلتاياڭ كەزەڭدە ءبىر-بىرىمىزگە قامقور بولىپ, ءبىر جاعادان باس, ءبىر جەڭنەن قول شىعارىپ, اۋىزبىرشىلىك كورسەتۋدىڭ قانشالىقتى ماڭىزدى ەكەنىنە كوزىمىز تاعى دا جەتىپ وتىر. ەگەمەندىككە قول جەتكىزگەن جاس مەملەكەتىمىزدىڭ قالىپتاسۋ جولىندا بىرلىك پەن ىنتىماقتىڭ ارقاسىندا تالاي بيىكتەردى باعىندىردىق, قازىر, مىنە قيىندىقتاردى جەڭىپ شىعۋ ءۇشىن بار كۇش-جىگەرىمىزدى بىرىكتىرۋ قاجەت.
ەلباسىنىڭ جۇرەكجاردى ۇندەۋى بىزگە سەنىمدىلىك ۇيالاتىپ, توزىمدىلىگىمىزدى نىعايتادى. ءبىز ءوز كۇشىمىزگە سەنەمىز جانە وسى اۋىرتپاشىلىقتاردان مويىماي وتۋگە ۇمتىلامىز. جاھاندىق الەمنىڭ ەرتەڭگى كۇنىنە ۇمىتپەن قارايمىز, سەبەبى بارىمىزگە تونگەن ورتاق قاۋىپتى بىرىگىپ ەڭسەرۋگە بارلىق مۇمكىندىك بار, الەمنىڭ الپاۋىت مەملەكەتتەرى, سايىپ كەلگەندە ءبىر-ءبىرىن جاۋ ساناماي, سەنىمدى سەرىكتەس رەتىندە تانيتىنى ءسوزسىز.
تۇڭعىش پرەزيدەنتتىڭ ماقالاسى بەيبىتشىلىك پەن كەلىسىمنىڭ قۇندىلىعى, تۋعان ەلىمىزدىڭ اماندىعى مەن تىنىشتىعى - وسى ۇلى سىيدى كوزىمىزدىڭ قاراشىعىنداي ساقتاۋ قاجەتتىلىگى تۋرالى ويىمىزدى بەكىتە ءتۇستى.
ۇرەيگە بوي الدىرىپ, بايبالام سالۋدان اۋلاق بولۋىمىز كەرەك. تۋعان حالقىمىزعا دەگەن ەلدىگىمىزدى دالەلدەۋدىڭ سەنىمدى جولى – وتانداستارىمىزدىڭ يگىلىگى ءۇشىن ناقتى يگى ىستەر اتقارۋ.
كەز كەلگەن داعدارىس ءبىر ساتكە توقتاپ, باعا جەتپەس قازىنا – ءوز ءومىرىمىزدى نەگە جۇمساپ جۇرگەنىمىز تۋرالى ويلانۋعا مۇمكىندىك بەرەدى. بۇل - جاڭعىرۋ كەزەڭى. ەلباسىنىڭ سوزدەرى ويىمىزدى تۇبەگەيلى وزگەرتۋگە, جاڭا سىندارعا بەيىمدەلىپ, تىعىرىقتان شىعاتىن جول ىزدەۋگە سىلتەيدى.
ونەر قاشاندا الەمدەگى ەلدەردى, ءارتۇرلى ۇلتتار مەن ءدىن وكىلدەرىن بىرىكتىرۋشى كۇش رەتىندە الەمدى تانىپ ءبىلۋ قۇرالى بولىپ كەلەدى. شىعارماشىلىق وكىلدەرى رەتىندە, ءبىز بولىپ جاتقان وقيعالاردى ءجىتى سەزىنىپ, وزىمىزگە جۇكتەلگەن ونەردىڭ ىزگى مىندەتىن بارىنشا سەزىنەمىز. الەمدىك كلاسسيكالىق بالەت داستۇرلەرىن ساقتاپ, حالقىمىزدىڭ ۇلتتىق-مادەني مۇراسىن نەگىزگە العان قازاق ۇلتتىق حورەوگرافيا اكادەمياسىنىڭ ۇجىمى, وتانعا دەگەن ريزاشىلىعى مەن سۇيىسپەنشىلىگىن بىلدىرە وتىرىپ, قوعامنىڭ رۋحاني-ەستەتيكالىق دامۋى ءۇشىن ەڭبەك ەتەدى.
جاس مەملەكەتىمىزدىڭ قالىپتاسۋ تاريحىندا قازاقستان حالقى بەرەكە-بىرلىك پەن توزىمدىلىكتىڭ ارقاسىندا تالاي دۇربەلەڭ كەزەڭدەردى باستان وتكەرگەن مىسالدار از ەمەس. بۇگىنگى تاڭدا ەل باسشىلىعى حالقىمىزدىڭ اماندىعى مەن يگىلىگى ءۇشىن جان-جاقتى شارالار قابىلداۋدا, سونىمەن بىرگە ءاربىر ازاماتتىڭ جەكە جاۋاپكەرشىلىگى دە ماڭىزدى بولىپ وتىر. ەلباسى مەن مەملەكەت باسشىسىنىڭ جول كورسەتۋىمەن ءبىر-ءبىرىمىزدى ءوزارا قولداپ, اۋىزبىرشىلىك تانىتۋ وسى اۋىر سىناقتاردى ەڭسەرۋگە جانە ەلىمىزدىڭ جاڭا جەتىستىكتەرگە جەتىپ, ءوسىپ وركەندەۋىنە سەپتىگىن تيگىزەتىنى ءسوزسىز.
بيبىگۇل ءنۇسىپجانوۆا,
قازاق ۇلتتىق حورەوگرافيا اكادەمياسىنىڭ
ءبىرىنشى پرورەكتورى
