تۇتقيىلدان كەلگەن جامان ىندەتتەن تۋىنداعان قيىنشىلىقتار جانعا باتىپ, قولعا قالام الىپ, ءبىر اي تولماي جاتىپ ەكى دۇركىن ماقالا جازىپ, اعا ۇرپاق پەن زيالى قاۋىم وكىلدەرىنە, جاستار مەن كاسىپكەرلەرگە بار اقىلىن ايتىپ, سابىرلىق پەن بىرلىككە شاقىرىپ,ولارعا اق تىلەۋىن جەتكىزىپ وتىر.
ماقالالاردا ايتىلعان ماسەلەلەر, ەلىمىزدە ورىن الىپ وتىرعان توتەنشە جاعداي كەزىندە, حالقىڭىزدىڭ قام كوڭىلىنە جول تاۋىپ, دەمەۋ بولىپ, ونىڭ ەرتەڭگى كۇنگە دەگەن سەنىمىن وياتتى.
وسىنداي قيىن-قىستاۋ كەزەڭدەردە حالىقتىڭ ويىنان شىعاتىن اقىل-كەڭەس ايتۋ, ولاردىڭ كوكەيىنە نىق سەنىم ۇيالاتۋ قازىرگى كەزدە تەك ەلباسىنىڭ عانا قولىنان كەلەدى جانە سول كىسىگە عانا لايىق. ويتكەنى تۇڭعىش پرەزيدەنت بيلىككە كەلگەن كۇننەن باستاپ بىرلىك تۋرالى ايتىپ كەلەدى, وسىدان 30 جىل بۇرىن ەلىمىزدىڭ تىزگىنىن قولىنا الىپ, قىسقا مەرزىم ىشىندە قازاق دەگەن حالىقتى الەم جۇرتىنا تانىتىپ, وركەنيەتتى 50 ەلدىڭ قاتارىنا قوسىپ, ونىڭ رۋحىن جاڭعىرتىپ, الەمدىك باسەكەلەستىك پەن جاھاندانۋ زامانىنىڭ تالاپتارىنا ساي جاڭا مەملەكەتتى قالىپتاستىردى. ونىڭ جەمىسىن حالىق كورىپ وتىر. سوندىقتان ولار ەلباسىنا سەنەدى, ايتقاندارىن قۇلاق قويىپ تىڭدايدى.
وسىدان ءبىر جىل بۇرىن, ەلباسى ءوز ەركىمەن جانە قالاۋىمەن ەلىمىزدىڭ تىزگىنىن تالاي سىناقتان سۇرىنبەي وتكەن ءوزىنىڭ سەنىمدى سەرىگى قاسىم-جومارت كەمەل ۇلىنا تاپسىردى. 2001 جىلى تاعدىرشەشتى كەزەڭدە قاسىم-جومارت كەمەل ۇلىنىڭ جانىنان تابىلىپ, قايسارلىق تانىتقانى حالقىمىزدىڭ جادىندا. سوندىقتان ەلباسىنىڭ ەلىمىزدىڭ ەڭ جوعارعى لاۋازىمىنا ونى ۇسىنىپ, سايلاۋ كەزىندە وعان قولداۋ كورسەتكەنىن ەشكىم ۇمىتا قويعان جوق. وتكەن ءبىر جىلدىڭ ىشىندە, قاراپ وتىرماي, ەلىمىزدىڭ تۇراقتىلىعى مەن بىرلىگىن ساقتاۋ ءۇشىن ايانباي قىزمەت ەتىپ, قاسىم-جومارت كەمەل ۇلىنا دەر كەزىندە قولداۋ كورسەتىپ وتىرعانىن حالقىڭىز كورىپ, ءبىلىپ وتىر.
ءسىزدىڭ تاڭداۋىڭىزدىڭ دۇرىس ەكەندىگىن بۇگىنگى ءومىر كورسەتىپ جاتىر.
قاسىم-جومارت كەمەل ۇلى ەلىمىزدىڭ ەڭ جوعارعى لاۋازىمىنا بارعان كۇننەن باستاپ ساباقتاستىقتى تۋ ەتىپ ۇستاپ, ەلباسى ايقىنداپ بەرگەن سارا جولداردان اينىماي, ەلىمىزدى باسقارۋعا بەل شەشە كىرىستى.
بۇكىل دۇنيە ءجۇزى ەلدەرىن دۇرلىكتىرىپ وتىرعان كوروناۆيرۋس ىندەتىنىڭ الدىن الىپ, حالىقتىڭ دەنساۋلىعى مەن الەۋمەتتىك جاعدايىن قورعاۋعا قاجەتتى اۋقىمدى ءىس-شارالاردى اتقارىپ, ىندەتتىڭ سالدارىنان تۋىندايتىن قيىنشىلىقتاردى الدىن الا بولجاپ, مەملەكەتتىك ورگاندار مەن دەنساۋلىق ساقتاۋ مەكەمەلەرىندە ارناۋلى جاتتىعۋلار وتكىزىپ, دەر كەزىندە توتەنشە جاعداي جاريالاپ, سونىڭ سالدارىنان تۋىنداعان اۋىرتپالىقتى جەڭىلدەتۋ ءۇشىن قىرۋار قارجى ءبولىپ, ازىق-ت ۇلىك پەن ءدارى-دارمەكتەردى ۋاقتىلى جەتكىزىپ, وسىنداي قيىن-قىستاۋ كەزدەردە حالىققا كەرەكتى بارلىق جاعداي جاسالىپ جاتىر.
سوندىقتان حالقىڭىز كارانتيننىڭ سالدارىنان تۋىنداعان بارلىق قيىنشىلىقتارعا توزىمدىلىك كورسەتىپ, سابىرلىق تانىتىپ وتىر.
ەلباسى ايتقانداي, ەلىمىز بۇل قيىنشىلىقتان دا امان-ەسەن شىعادى. قۇداي قالاسا ىندەتتىڭ ەمى دە تابىلادى, سالدارى دا جويىلادى.
بىراق ءبىزدى الدا بۇدان دا باسقا قيىنشىلىقتار مەن اۋىرتپالىقتار كۇتىپ تۇرعانى بەلگىلى. ولاردى جەڭىپ شىعۋ ءۇشىن تۇڭعىش پرەزيدەنتتىڭ اقىل-كەڭەسى مەن قولداۋى الداعى ۋاقىتتاردا دا اسا قاجەت بولادى دەپ ويلايمىن.
سوندىقتان ارانداتۋشىلار مەن «سىبىرلاعىشتاردىڭ» ىشتەرىن كۇيدىرىپ, ەلباسىنىڭ دارا ساياساتىن جالعاستىرىپ كەلە جاتقان قاسىم-جومارت كەمەل ۇلىمەن الداعى ۋاقىتتاردا دا ءبىر جاعادان باس, ءبىر جەڭنەن قول شىعارىپ, حالقىمىزدى قانداي دا بولماسىن تىعىرىقتاردان شىعارىپ, تۇراقتى جانە باقىتتى ومىرگە جەتكىزەتىندەرىڭىزگە سەنەمىن. اللادان سىزدەرگە سابىرلىق پەن زور دەنساۋلىق تىلەيمىن!
ەرجان يساقۇلوۆ,
ۇلتتىق قاۋىپسىزدىك ورگاندارىنىڭ ارداگەرى, گەنەرال-مايور, ساياسات عىلىمدارىنىڭ دوكتورى
