اتاپ ايتقاندا, نۇر-سۇلتان قالاسىندا – 238, الماتى قالاسىندا – 145, شىمكەنت قالاسىندا 38 جاعداي تىركەلسە, وبلىستاردىڭ ىشىندە ىندەتتى ەڭ كوپ جۇقتىرعان قىزىلوردا وبلىسى (116 ادام) بولىپ تۇر. ال اقمولا وبلىسىندا – 71, قاراعاندى وبلىسىندا – 65, اتىراۋ وبلىسىندا – 59, جامبىل وبلىسىندا 46 ادام ۆيرۋس جۇقتىرسا, تۇركىستان وبلىسىندا – 36, سولتۇستىك قازاقستان وبلىسىندا – 25, اقتوبە مەن الماتى وبلىستارىندا 11 ناۋقاستان تىركەلدى. اۋرۋعا شالدىققانداردىڭ سانى ماڭعىستاۋ وبلىسىندا – 10, پاۆلودار وبلىسىندا – 9, باتىس قازاقستان وبلىسى – 8, شىعىس قازاقستان وبلىسىندا – 6, قوستاناي وبلىسىندا 3 ادامعا جەتىپ وتىر. رەسپۋبليكا بويىنشا COVID-19 ۆيرۋسىن جۇقتىرعانداردىڭ 86-سى جازىلىپ شىقسا, 10 ادام كوز جۇمدى.
كەشە اتىراۋ وبلىسىنىڭ اكىمدىگى جۇقپالى اۋرۋلار ستاتسيونارىنان كوروناۆيرۋس جۇقتىرعان العاشقى پاتسيەنتتەردىڭ جازىلىپ شىققانىن حابارلادى. ولار – 27 ناۋرىزدا اۋرۋحاناعا جاتقىزىلعان 14 جاستاعى قىز بەن 19 جاستاعى جىگىت. ەكەۋى دە 14 كۇن بويى مەديتسينالىق قىزمەتكەرلەردىڭ باقىلاۋىمەن ءۇي كارانتينىندە بولادى.
سونداي-اق نۇر-سۇلتان قالاسى اكىمدىگىنىڭ جانىنداعى توتەنشە جاعداي رەجىمىن قامتاماسىز ەتۋ جونىندەگى قالالىق شتاب مەملەكەت باسشىسىنىڭ تاپسىرماسىنا سايكەس كارانتين ءساۋىر ايىنىڭ سوڭىنا دەيىن ۇزارتىلاتىنىن حابارلادى. بۇگىن توتەنشە جاعدايلار جونىندەگى مەملەكەتتىك كوميسسيانىڭ وتىرىسىندا جۇمىسىن قايتا باستاي الاتىن كاسىپورىنداردىڭ ناقتى ءتىزىمى قارالماق. الايدا, جۇمىسىن قايتا باستايتىن نىساندار قاتاڭ سانيتارلىق-ەپيدەميالىق رەجىمدى قامتاماسىز ەتۋگە مىندەتتى.
