قازاقستان پرەزيدەنتى نۇرسۇلتان نازارباەۆ «ۇلكەن جيىرمالىقتىڭ» سامميتىنە قاتىسۋ ءۇشىن سانكت-پەتەربۋرگكە كەلدى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
ساپار بارىسىندا مەملەكەت باسشىسىنىڭ G20 ءسامميتىنىڭ جۇمىسىنا قاتىسۋى, شەت مەملەكەتتەر جانە حالىقارالىق ۇيىمدار باسشىلارىمەن ەكىجاقتى كەزدەسۋلەر وتكىزۋى جوسپارلانعان.
داعدارىسپەن بىرلەسىپ كۇرەسۋ قاجەت
قازاقستان پرەزيدەنتى نۇرسۇلتان نازارباەۆ سانكت-پەتەربۋرگتەگى G20 ءسامميتىنىڭ سەسسياسىندا ءسوز سويلەدى, دەپ حابارلادى پرەزيدەنتتىڭ ءباسپاسوز قىزمەتى.
نۇرسۇلتان نازارباەۆ شاقىرۋعا ريزاشىلىعىن ءبىلدىرىپ, جاھاندىق داعدارىستىڭ ءبىر سەبەبى ەكونوميكانىڭ ناقتى سەكتورىمەن بايلانىسسىز «سابىندى كوبىك» تۇرىندەگى قارجىلىق قۇرىلىمداردىڭ قارقىندى دامۋى بولىپ تابىلاتىنىن اتاپ ءوتتى.
مەملەكەت باسشىسى ماڭىزدى الەمدىك شەشىمدەردى قابىلداۋ كەزىندە كوپتەگەن دامۋشى ەلدەردىڭ ۇستانىمى ءىس جۇزىندە نازارعا الىنبايتىنىن ايتتى.
– قازاقستان ءتارىزدى ەلدەردىڭ دە پىكىرى ەلەنۋى ءۇشىن بۇدان ەكى جىل بۇرىن مەنىڭ تاراپىمنان G-GLOBAL جوباسى باستاما رەتىندە كوتەرىلدى. ول G8-گە جانە G20-عا بالاما ەمەس, قازىرگى كەزدە اقپاراتتىق-كوممۋنيكاتيۆتىك الاڭ رەتىندە ىسكە اسىرىلىپ جاتقان جاھاندىق ديالوگتىڭ قوسىمشا قۇرالى عانا, – دەدى قازاقستان پرەزيدەنتى.
G-GLOBAL-دان بولەك قازاقستاننىڭ باستاماسى بويىنشا بۇۇ باس اسسامبلەياسىنىڭ قولداۋىمەن استانادا 104 ەلدىڭ ەكونوميكالىق ۆەدومستۆولارى جەتەكشىلەرىنىڭ قاتىسۋىمەن داعدارىسقا قارسى بۇكىلالەمدىك كونفەرەنتسيا وتكىزىلدى. وسى يننوۆاتسيالىق جاھاندىق ديالوگ پىشىنىنە باسا نازار اۋدارعان نۇرسۇلتان نازارباەۆ مەيلىنشە وزەكتى پروبلەمالاردى شەشۋگە قاتىستى ءوز كوزقاراسىن ورتاعا سالدى. وسىلايشا الەمدىك قارجىۆاليۋتالىق ارحيتەكتۋراسى بارلىق ەلدىڭ مۇددەسىن ساقتاۋعا ەۆوليۋتسيالىق جولمەن كەلۋگە ءتيىس.
مەملەكەت باسشىسىنىڭ كەلەسى ۇسىنىسى الەمدىك ەكونوميكاداعى بورىشكەرلىك قاتىناستاردى تەڭدەستىرۋگە بايلانىستى بولدى.
– مەملەكەتتىك جانە كورپوراتيۆتىك قارىز الۋ كولەمىن رەتتەۋدىڭ جانە باقىلاۋ جاساۋدىڭ جاڭا ەلەمەنتتەرىن ازىرلەۋ ءارى ەنگىزۋ ۇسىنىلادى, – دەدى قازاقستان پرەزيدەنتى.
نۇرسۇلتان نازارباەۆ داعدارىسقا قارسى كۇرەستە وڭىرلىك ىقپالداستىقتىڭ ماڭىزدى ءرول اتقاراتىنىن ايتا وتىرىپ, قازاقستان, رەسەي جانە بەلارۋس قۇرعان كەدەن وداعىن مىسالعا كەلتىردى.
– قازاقستان دا دۇنيەجۇزىلىك ساۋدا ۇيىمىنا كىرۋدىڭ قورىتىندى كەزەڭىندە تۇر. بۇل ورايدا وسىندا وتىرعان مەملەكەتتەر مەن ۇكىمەتتەر باسشىلارىنان 2013 جىلدىڭ سوڭىنا دەيىن قازاقستاننىڭ دسۇ-عا كىرۋىنە قولداۋ كورسەتۋدى سۇرايمىن, – دەدى مەملەكەت باسشىسى.
بۇعان قوسا, قازاقستان پرەزيدەنتى ءبىزدىڭ ەلىمىز G20-نىڭ «جاسىل كليمات قورى» جونىندەگى باستاماسىن قولدايتىنىن مالىمدەي كەلە, «بولاشاقتىڭ ەنەرگياسى» تاقىرىبىندا ەكسپو-2017 حالىقارالىق كورمەسىنىڭ استانادا وتەتىنى قازاقستاننىڭ «جاسىل ەكونوميكانى» جاڭعىرتۋىنىڭ ايعاعى ەكەنىنە توقتالدى.
ءسوزىنىڭ سوڭىندا نۇرسۇلتان نازارباەۆ ايتىلعان ۇسىنىستاردىڭ نازارعا الىنىپ, اتالعان سالالارداعى قىزمەتتىڭ جاندانا تۇسەتىنىنە سەنىم ءبىلدىردى.
