قوعام • 05 ءساۋىر، 2020

بەتپەردە كيگەن كوكتەم - 5

201 رەتكورسەتىلدى

كۇشەيتىلگەن كارانتين. اۋەلدە تاڭسىق بولدى، ءتىپتى سەنى شەكتەيتىن الەۋمەتتىك دوگما سەكىلدى سەزىلەتىن، ۋاقىت وتە كەلە ءومىر ءسۇرۋ وبرازىنا اينالىپ بارادى. از ۋاقىت ىشىندە ءبىز سوعان بەيىمدەلىپ كەلەمىز. ال تەرەزە سىرتىنداعى كوكتەم ەشتەڭەگە كونەر ەمەس.

سەبەبى، كوكتەم مەزگىل عانا ەمەس، جاننىڭ كۇيى عوي. ويلار مەن سەزىمدەر گوتيكاسىنىڭ كۇيەلەش قابىرعالارىن قيراتۋ. جۇرەك رەنەسسانسى.

كوڭىل كۇيىم – كۆانتتى. اتومدار ءبىر ساتتە بىرنەشە جەردە بولا الادى. ادام دا – اتومدار جيىنتىعى. سوعان سايكەس، مەن دە قازىر ۇيدە نەمەسە رەداكتسيادا عانا ەمەس، بىرنەشە جەردە ءومىر ءسۇرىپ جاتىرمىن. بارسحان باۋلارىندا ءجاۋدىر كوزدى جىكىل سۇلۋىنا جىر وقىپ تۇرمىن. سانسىز سايراميلەرمەن بىرگە وتىرار كىتاپحاناسىندامىن. مۇحاممەد حايدار مىرزانىڭ جانىندا ءبىر ساتتە جوق بولىپ كەتكەن قالاعا قارايمىن. جوشى مازارىنىڭ الدىنداعى بالبال تاستاردىڭ ءتورتىنشىسىمىن. سارىارقا پيراميداسىن سالىپ جاتىرمىن. دجومولۋنگمادا الەمگە كوز سالىپ تۇرمىن. امەريكا جاعالاۋىندا كولۋمبتى قارسى الۋدامىن. ۇيدە بالالاردى ويناتىپ وتىرمىن. ەكى تاريحشىنىڭ داۋلاسقانىنان قاجىپ، ولاردان جىراق كەتىپ، قىرعا قاراپ وتىرمىن. ءراشيد ءاد-دين قورقىت اتانى قايى تايپاسىنان دەسە، ابىلعازى باياتتان دەيدى. تەڭىز جاعالاۋىندا تۇرىك اقىنى پارماقسىز بەن ازەربايجان شايىرى حايال رزامەن اڭگىمەلەسىپ تۇرمىن. تاعى دا قورقىت جايلى. اۋليەنىڭ مازارى قارماقشىدا دەسەم، ءبىرى دەربەنتتە، تاعى ءبىرى ماساتتا دەيدى.

بۇرىنعى اۋليەلەر اتومدار حيكمەتىن مەڭگەرگەن. جو-جوق، بۇل تەلەپورتاتسيا ەمەس، ولار شىن مانىندە ءبىر ساتتە بىرنەشە جەردە بولا العان. ءدادام قورقىت بۇكىل تۇركى حالىقتارىنىڭ كەڭىستىگىندە كوشىپ جۇرگەن. اتوم حيكمەتىن مەڭگەرگەن جان اجالدى دا جەڭگىسى كەلگەن. قورقىت ءبىر ساتتە بىرنەشە جەردە قازا تاپقان. «قايدا بارساڭ، قورقىتتىڭ كورى» دەگەندە اتالارمىز وسى ونىڭ جەرلەنگەن بىرنەشە مازارىن ايتتى ەمەس پە؟!.

كوشپەلى وركەنيەت – تاريحتىڭ كۆانتتى كوڭىل كۇيى. قولا داۋىرىندە بىرنەشە قالا سالعان حالىقتىڭ پەرزەنتى رەتىندە، اتا-بابامىز كوشىپ-قونىپ قانا جۇرگەن دەۋدەن مەنىڭ تاريحي كوڭىل كۇيىم جاپا شەگەدى. تەھراندا شاتىرعا شىققان مىسىق تارازعا دەيىن جەرگە تۇسپەي كەلەدى. جىبەك جولىنداعى كەرۋەندەر ءبىر سىزىق بويىندا قازاق دالاسىنداعى ونداعان قالاعا كىرەدى.

بەتپەردە كيگەن كوكتەم. ءبىزدىڭ كۆانتتى كوڭىل كۇيىمىز. ادام ءوزىن شەكتەگەندە عانا شەكتەلەدى. اتومدار ءۇش ولشەمنىڭ شەكاراسىندا عانا ءومىر سۇرمەيدى.

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار