تيىسىنشە, وتىمدىلىكتى بەرۋ بويىنشا تۇراقتى قولجەتىمدى وپەراتسيالار مولشەرلەمەسى 11,5%, وتىمدىلىكتى الۋ بويىنشا تۇراقتى قولجەتىمدى وپەراتسيالار 7,5% بولدى. وسى شەشىم 6 ساۋىردەن باستاپ كۇشىنە ەنەدى. مۇناي باعاسىنىڭ ەكى ەسە قۇلدىراۋى, OPEC+ كەلىسىمىنە قاتىستى بۇدان بىلايعى پەرسپەكتيۆالاردىڭ بەلگىسىزدىگى جانە COVID-19 كوروناۆيرۋسىنىڭ پاندەمياسى اياسىندا 2020 جىلعى ناۋرىزدا قابىلداعان ۇلتتىق بانكتىڭ بازالىق مولشەرلەمەنى 12,0%-عا دەيىن ارتتىرۋ جانە تەڭگەنىڭ ايىرباستاۋ باعامىن تەپە-تەڭ دەڭگەيدە قالىپتاستىرۋ تۋرالى شەشىمدەرى ينفلياتسيالىق كۇتۋلەردى تۇراقتاندىرۋعا جانە سىرتقى كۇتپەگەن وزگەرىستەر ىقپالىنىڭ قارجى نارىعىنا تارالۋىن شەكتەۋگە باعىتتالدى.
سىرتقى كۇتپەگەن وزگەرىستەر ىقپالىنىڭ تەرىس سالدارىن جەڭىلدەتۋ ءۇشىن پرەزيدەنت ق. توقاەۆ ەلدىڭ الەۋمەتتىك-ەكونوميكالىق تۇراقتىلىعىن قامتاماسىز ەتۋ بويىنشا 4,4 ترلن تەڭگە كولەمىندە داعدارىسقا قارسى شارالاردىڭ 2 توپتاماسىنا باستاما جاسادى. وسى باستامالاردى ىسكە اسىرۋ ءۇشىن ۇكىمەت بيۋدجەت ساياساتىنىڭ نەگىزگى پارامەترلەرىن قايتا قاراپ, داعدارىسقا قارسى شارالاردى قارجىلاندىرۋعا قوماقتى شىعىستار كوزدەدى. وسىعان بايلانىستى ۇلتتىق بانك بازالىق مولشەرلەمەنى اعىمداعى دەڭگەيدە بۇدان ءارى ۇزاق ۇستاپ تۇرۋ ەكونوميكالىق بەلسەندىلىككە شەكتەۋ اسەرىن كورسەتۋى مۇمكىن دەپ سانايدى. سوعان قاراماستان, COVID-19 كوروناۆيرۋسى پاندەمياسىنىڭ كەڭەيۋىنە نەگىزدەلگەن سىرتقى سەكتور تاراپىنان سۇرانىس پەن ۇسىنىستىڭ ءبىر ۋاقىتتاعى كۇتپەگەن وزگەرىستەرى جانە مۇناي باعاسىنىڭ كوپ جىلعى مينيمۋمعا دەيىن كۇرت تومەندەۋى, سونداي-اق ىشكى ۇسىنىستىڭ شەكتەلۋى ينفلياتسيا دەڭگەيىن ارتتىرۋعا الىپ كەلدى. 2020 جىلعى ناۋرىزدىڭ قورىتىندىسى بويىنشا ينفلياتسيا جىلدىق كورسەتۋدە بەلگىلەنگەن 4-6% نىسانالى دالىزدەن اسىپ, 6,4% بولدى. اعىمداعى جىلدىڭ قورىتىندىسى بويىنشا جىلدىق ينفلياتسيا 2021 جىلى كەيىننەن باسەڭدەي وتىرىپ, 9-11% شەگىندە قالىپتاسادى دەپ كۇتىلۋدە.
ۇلتتىق بانكتىڭ باعالاۋى قازىرگى جاعدايلار ساقتالعان كەزدە اعىمداعى جىلى ەكونوميكالىق ءوسۋ تەرىس بولاتىنىن كورسەتىپ وتىر. بۇل شەشىم ۇلتتىق بانكتىڭ قارجىلىق تۇراقتىلىقتى قامتاماسىز ەتۋگە, وتاندىق ەكونوميكا ءۇشىن تاۋەكەلدەردى شەكتەۋگە جانە ونى سىرتقى جانە ىشكى ورتانىڭ وزگەرگەن جاعدايلارىنا بەيىمدەۋگە باعىتتالعان بىرقاتار شارالارىنىڭ ءبىرى. «قاراپايىم زاتتار ەكونوميكاسى» باعدارلاماسىن 1 ترلن تەڭگەگە دەيىن كەڭەيتۋدى جانە 600 ملرد تەڭگە سوماسىنا شاعىن جانە ورتا كاسىپكەرلىك سۋبەكتىلەرىن جەڭىلدىكپەن كرەديتتەۋ باعدارلاماسىن قابىلداۋدى قوسا العاندا, ۇلتتىق بانكتىڭ باسقا شارالارىمەن بىرگە بازالىق مولشەرلەمەنى تومەندەتۋى كوروناۆيرۋس سالدارىنىڭ قازاقستان ەكونوميكاسىنا اسەرىن جەڭىلدەتۋگە مۇمكىندىك بەرەدى جانە ەكونوميكالىق بەلسەندىلىككە قولداۋ كورسەتەدى. ۇلتتىق بانك سىرتقى جانە ىشكى جاعدايعا ۇزدىكسىز مونيتورينگ جۇرگىزىپ وتىرادى جانە قاجەت بولعان جاعدايدا ءوزىنىڭ مونەتارلىق ساياساتىن يكەمدەپ تۇزەتىپ وتىرادى. ۇلتتىق بانكتىڭ قارجىلىق تۇراقتىلىقتى قامتاماسىز ەتۋگە ارنالعان بارلىق قاجەتتى مۇمكىندىكتەرى مەن قۇرالدارى بار جانە الەمدىك ەكونوميكاداعى احۋال ايتارلىقتاي ناشارلاعان جاعدايدا تيىمدى شەشىمدەر قابىلداۋعا دايىن. ۇلتتىق بانكتڭ بازالىق مولشەرلەمە بويىنشا كەزەكتى جوسپارلى شەشىمى 27 ساۋىردە نۇر-سۇلتان قالاسىنىڭ ۋاقىتى بويىنشا ساعات 15:00-دە جاريالاناتىن بولادى.
