جالپى, بيىل جەتىسۋ توپىراعىندا جايقالىپ وسەتىن ەگىستىك كولەمى جىلداعىدان ۇلعايدى. ياعني, ءداندى داقىلدار القابى وتكەن جىلمەن سالىستىرعاندا 4,9 مىڭ گەكتارعا كوبەيىپ, 966,5 مىڭ گەكتارعا جەتۋى ءتيىس. قازىر وبلىس شارۋالارى وسىعان كۇش سالىپ وتىر. بيىل ايماقتاعى كوكتەمگى دالا جۇمىستارى 10 ناۋرىزدا باستالدى. بۇگىنگە دەيىن 157,4 مىڭ گەكتار جەر جىرتىلىپ, بارلىعى 51,0 مىڭ گەكتارعا ءدان ەگىلگەن. ونىڭ ىشىندە 21,5 مىڭ گا ارپا مەن بيداي, 15,1 مىڭ گا جازدىق داقىل سەبۋ جۇمىسى اياقتالىپ, جالپى كولەمى 36,6 مىڭ گەكتارداعى جۇمىس تياناقتالعان. سونداي-اق, 3,3 مىڭ گەكتارعا ماقسارى, 2,3 مىڭ گەكتارعا كارتوپ, 4,7 مىڭ گەكتارعا كوكونىستىڭ بارلىق ءتۇرى, 2 مىڭ گەكتارعا باقشا داقىلدارى جانە 4,9 مىڭ گەكتارعا مال ازىعى ءۇشىن شابىلاتىن ءبىر جىلدىق, كوپجىلدىق ءشوپ ەگىلگەن ەكەن. ديقاندار كۇزدىك داقىلدىڭ دا قامىن كۇيتتەپ قويعان. مىسالى, جالپى 109,6 مىڭ گەكتار جەر جىرتىلىپ, وعان 97 مىڭ گەكتار بيداي, 12,4 مىڭ گەكتار ارپا ەگىلگەن. ال ديقاندار وسى كۇزدىك داقىلدارعا 223,2 مىڭ توننا تۇقىم جۇمساپتى.
تۇقىم دەمەكشى, وبلىس شارۋالارىنا قاجەتتى تۇقىمدى «جەتىسۋ» الەۋمەتتىك كاسىپكەرلىك كورپوراتسياسى ساتىپ الىپ وتىر ەكەن. بيىل وبلىستاعى 548 شارۋا قوجالىعىنا قاجەتتى قانت قىزىلشاسىنىڭ جوعارى سۇرىپتى تۇقىمى ءبىرىنشى كەزەكتە الىنىپتى. بۇل تۇقىم 14,2 مىڭ گەكتار ەگىس القابىنا جەتۋى ءتيىس. جالپى, «جەتىسۋ» كورپوراتسياسى كوكتەمگى دالا جۇمىستارىن جۇرگىزۋ ءۇشىن سۇرانىس بەرگەن شارۋالارعا 167,1 ملن تەڭگەنىڭ جەڭىلدەتىلگەن نەسيەسىن بەرگەن.
ايتپاقشى, قازىر وبلىستىڭ اۋىلشارۋاشىلىعى القاپتارىنداعى كوكتەمگى دالا جۇمىسىن 33,8 مىڭ بىرلىك تەحنيكااتقارىپ ءجۇر ەكەن. ياعني, ديقانداردى قاجەتتى تراكتور مەن قوسالقى تەحنيكامەن قامتۋ دەڭگەيى 97 پايىزعا جەتكەن. وسى قارقىنمەن ەگىستىكتەگى قاۋىر تىرلىكتى 25 مامىرعا دەيىن تولىق اياقتاۋ مىندەتى تۇر.
الماتى وبلىسى
