كوروناۆيرۋس • 31 ناۋرىز، 2020

كوروناۆيرۋسپەن كۇرەس: وڭتايلى تاجىريبە – وڭتۇستىك كورەيادا

49 رەتكورسەتىلدى

الەمدى جايلاعان ىندەتپەن كۇرەسۋ جاعىنان وڭتۇستىك كورەيا بارىنەن وزدى.  باسىندا ۆيرۋس جۇقتىرۋ كورسەتكىشى جاعىنان قىتايدان كەيىنگى ورىندا تۇرعان كورەيانى  قازىر العاشقى وندىقتان دا تاپپايسىز.  ولاردىڭ  تاجىريبەسىنە الپاۋىت ەلدەر دە ءۇڭىلىپ، ۇتىمدى تاسىلدەرىن وزدەرىنە ەنگىزىپ جاتىر.

وڭتۇستىكتە كورەيا – قىتايدان كەين SARS-CoV-2 ۆيرۋسى العاش رەت تىركەلگەن ەلدەردىڭ ءبىرى. مۇندا ىندەت ءبىرىنشى رەت 20 قاڭتاردا بەلگىلى بولدى. العاشىندا ۋحاننان كەلگەن قىتاي ازاماتىنان تابىلعان. كەيىن ينفەكتسيانى ەلگە اكەلىپ، جاپپاي تاراتقان سينچحوندجي ءدىني سەكتانىڭ وكىلدەرى بولدى. ولار ۆيرۋس ءورشىپ تۇرعان كەزدە ۋحانعا بارىپ، سونداعى سەكتا وكىلدەرىمەن جيىن وتكىزگەن. سودان كەيىن وڭتۇستىك كورەيانىڭ تەگۋ قالاسىنا ورالىپ، وزدەرىنىڭ ءدىني راسىمدەرىن جاساعان. وسىلايشا، ىندەت ءبىر مەزگىلدە كوپ ادامنان انىقتالىپ، ەل ىشىنە تارالىپ كەتتى. بۇكىل ءبىر ەلدى ابىگەرگە سالعانىن مويىنداعان سينچحوندجي ءدىني سەكتانىڭ باسشىسى كەيىن كورەيالىقتاردان تىزەرلەپ تۇرىپ كەشىرىم سۇرادى...

بۇگىندە وڭتۇستىك كورەيادا ۆيرۋس جۇقتىرعانداردىڭ سانى 9 مىڭنان استى. دەگەنمەن دە، بۇل ەل از ۋاقىتتىڭ ىشىندە ۆيرۋستىڭ ءورشۋىن باسىپ، ءولىم كورسەتكىشىن ازايتا الدى. ءدال قازىرگى تاڭدا ۆيرۋسپەن كۇرەسۋ جەتىستىكتەرى جاعىنان كورەيالىقتار الدىڭعى قاتارعا شىعىپ وتىر.

وڭتۇستىك كورەيانىڭ تاجىريبەسىنە ۇڭىلسەك، ولاردىڭ از ۋاقىتتىڭ ىشىندە جىلدام جەتىستىككە جەتۋىنە ەڭ الدىمەن مەديتسيناسىنىڭ توتەنشە جاعدايعا دايىندىعى بولسا كەرەك.  ەلدە ىندەت تىركەلىسىمەن كورەيا بيلىگى 20 مەديتسينالىق كومپانيانىڭ وكىلدەرىمەن كەزدەسىپ، ەكسپرەسس-تەستتەردى جاپپاي وندىرۋگە نۇسقاۋ بەردى. ءسويتىپ، دارىگەرلەر ۋاقىت وزدىرماي، ازاماتتاردى جاپپاي تەستىلەۋگە كىرىستى. ناقتىراق ايتساق، مەديتسينالىق قىزمەتكەرلەر ۆيرۋس جۇقتىرعاندارمەن بايلانىستا بولعان ادامداردى عانا ەمەس، تەستتەن وتكىسى كەلگەن تۇرعىنداردىڭ ءبارىن تەگىن تەكسەردى. حالىققا ىڭعايلى بولۋ ءۇشىن كوپتەگەن ورىنداردا تەستىلەۋ پۋنكتتەرى اشىلدى.  ءتىپتى ازاماتتار كولىكتەن شىقپاي-اق، ۆيرۋسقا تەكسەرىلۋ مۇمكىندىگىنە يە بولدى. قازىر مۇندا كۇنىنە شامامەن 20 مىڭعا جۋىق ادام تەستتەن وتەدى. مۇنداي كورسەتكىشكە تەستىلەۋ جۇرگىزۋدى قولعا العان امەريكانىڭ ءوزى جەتە العان جوق.

وڭتۇستىك كورەيا اۋرۋ جۇقتىرعان ادامدى باستاپقى كەزىندە-اق انىقتاپ، ولاردى قوعامنان دەر كەزىندە وقشاۋلاپ وتىردى. بۇعان قوسا، تەك تەستىلەۋمەن اينالىساتىن 633 ورتالىق اشىلدى، ونىڭ 50-ءى اۆتوتۇراقتاردا ورنالاستى. بۇل اۋرۋحاناعا تۇسەتىن جۇكتەمەنى ەداۋىر ازايتتى. ال كارانتيندەگى ادامدار جەكە تەلەفوندارى ارقىلى باقىلاۋعا الىندى.

وڭتۇستىك كورەيادا حالىقتى قاتاڭ كارانتيندە ۇستاۋ شاراسى دا جاسالعان جوق. دۇكەندەرى مەن ءدامحانالارى اشىق بولدى. كوپتەگەن قوعامدىق ورىندار ءالى كۇنگە جۇمىس ىستەپ تۇر. سوعان قاراماستان ۆيرۋس قاتتى ورشىمەدى. بۇعان كورەيالىقتاردىڭ تارتىپكە باعىناتىن مادەنيەتتى مىنەزى دە ءوز اسەرىن تيگىزگەنى انىق. «حالىقتى جاپپاي وقشاۋلاۋ – تىعىرىقتان شىعار جول ەمەس. ءوزىن جانە وتباسىنىڭ قاۋىپسىزدىگىن ويلاعان ءار ازامات ءوزى-اق سانالى تۇردە ساقتاناتىنى سوزسىز»دەيدى كورەيالىق ينفەكتسيونيست-دارىگەر كيم ۆۋ-دجۋ.

وڭتۇستىك كورەيا جەتىستىگىنىڭ تاعى ءبىر قۇپياسى –  اۋرۋحاناعا جاتقىزۋ جۇيەسىنىڭ دۇرىس ۇيىمداستىرىلۋىندا. بۇل ەلدىڭ دارىگەرلەرى ءبىرىنشى كەزەكتە سوزىلمالى اۋرۋى بار ادامدار مەن قارتتاردى وقشاۋلاپ، گوسپيتالدارعا جاتقىزدى. ولاردى دەرتى اسقىنباي تۇرىپ ەمدەدى.

ۆيرۋس تۋرالى دەرەكتەردىڭ دەر كەزىندە حالىققا دۇرىس جەتۋى دە اۋرۋدى اۋىزدىقتاۋدا ەرەكشە ءرول اتقاراتىنى بەلگىلى. بۇل ميسسيانى دا كورەيالىقتار جوعارى دەڭگەيدە الىپ شىقتى. كوروناۆيرۋستىڭ وتە جۇقپالى ءارى قاتەرلى دەرت ەكەنى تەلەۆيزيالىق حابارلاردا، مەترو جارنامالارىندا، سمارتفونداردا ۇزدىكسىز جاريالانىپ تۇردى.  

وسىلايشا، ۆيرۋستى ورشىتپەۋگە باعىتتالعان جۇمىستاردى جان-جاقتى كەشەندى جۇرگىزگەن وڭتۇستىك كورەيادا قازىر ىندەتتىڭ باسەڭسىگەنى بايقالىپ وتىر.

قىمبات توقتامۇرات

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

جۇزدەگەن تۇرعىنعا جۇمىس تابىلدى

ايماقتار • بۇگىن، 12:44

ۇقساس جاڭالىقتار