كارانتين تالاپتارىنا سايكەس ترانزيتتىك جۇك كولىكتەرى مەن تاماق ونىمدەرى بار كولىك قۇرالدارىن قوسپاعاندا, بارلىق كولىك قۇرالدارى مەن ازاماتتاردىڭ اقمولا وبلىسىنا كىرىپ-شىعۋىنا تىيىم سالىنادى. ازىق-ت ۇلىك دۇكەندەرى مەن ءدارىحانالاردان باسقا ءىرى ساۋدا ورتالىقتارى, ساياباقتار, مونشا كەشەندەرى, ساناتوريالىق-كۋرورتتىق مەكەمەلەر, سۇلۋلىق سالوندارى, شاشتارازدار, اۆتوموبيل, تۇرمىستىق زاتتار مەن قۇرىلىس بازارلارى, سونداي-اق ادامدار جاپپاي جينالاتىن باسقا دا وبەكتىلەر ءوز قىزمەتتەرىن توقتاتادى.
تاۋلىك بويعى رەجيمدە قىزمەت كورسەتەتىن وبەكتىلەردى قوسپاعاندا, قوعامدىق تاماقتاندىرۋ ورىندارى دا جۇمىس ىستەمەيدى. ءدارىحانالار مەن ءدارىحانا كيوسكىلەرى جۇمىسىن شتاتتىق رەجيمدە جالعاستىرادى. وبلىس تۇرعىندارى اسا ماڭىزدى شارۋالارى بولماسا ۇيلەرىنەن شىقپاۋى كەرەك. ازاماتتار ماسكا مەن بىرجولعى قولعاپ كيىپ, قولدارىن انتيسەپتيكپەن تازالاپ وتىرۋى ءتيىس. 65 جاستان اسقان ازاماتتار ءوزىن-ءوزى وقشاۋلاۋ ارقىلى رەجيمدى ساقتاسىن.
جالپى, وبلىستا ءتيىستى قىزمەتتەردىڭ كارانتين رەجيمىندە جۇمىس ىستەۋ دايىندىعى قامتاماسىز ەتىلدى. جەرگىلىكتى اتقارۋشى ورگانداردىڭ, اۋماقتىق قورعانىس بريگاداسىنىڭ جانە جەرگىلىكتى اسكەري باسقارۋ ورگاندارىنىڭ اسكەري مىندەتتىلەردى شاقىرۋعا دايىندىعى قامتاماسىز ەتىلدى.
وبلىس شەكاراسىنا كىرەبەرىس جولداردا 8 بلوك-پوست, ال وبلىس ورتالىعىنىڭ شەكاراسىنا 12 بلوك-پوست ورناتۋ جوسپارلانۋدا. كريمينوگەندىك جانە قوعامدىق-ساياسي جاعداي كۇردەلەنگەن جاعدايعا ارنايى جەدەل جوسپارلار, سونداي-اق پوليتسيا دەپارتامەنتىنىڭ جيىنتىق جاساعى مەن ۇلتتىق ۇلاننىڭ 5510 اسكەري ءبولىمى قىزمەتشىلەرى دايىندىققا كەلتىرىلدى. ارينە, وسى شارالاردىڭ بارلىعى توسىن. كەي جاعدايدا ازاماتتارىمىزدىڭ قۇقىقتارىن شەكتەلەتىندىگى ءسوزسىز. الايدا قازىر ىندەتتىڭ جىلدام تارالۋى وسىنداي جايعا ءماجبۇر ەتىپ وتىر. بۇگىنگى ءىس-قيمىلداردىڭ بارلىعى كوروناۆيرۋس ينفەكتسياسىنىڭ تارالۋىنا جول بەرمەۋگە جانە وبلىس تۇرعىندارىنىڭ دەنساۋلىعىن ساقتاۋعا باعىتتالعان.
مامانداردىڭ مالىمدەۋىنە قاراعاندا, ەلوردا ماڭى, اتاپ ايتقاندا وبلىس اۋماعىنا ينفەكتسيا تاراتۋدىڭ وشاعى بولىپ تابىلاتىن تسەلينوگراد اۋدانى ەرەكشە الاڭداتۋشىلىق تۋعىزۋدا.
