ايماقتار • 29 ناۋرىز، 2020

ماڭعىستاۋدا «جەر ساعاتى - 2020» حالىقارالىق اكتسياسى ءوتتى

56 رەتكورسەتىلدى

عالامدىق باستاماعا اينالعان شارا اقتاۋ جانە جاڭاوزەن قالالارى، سونىمەن قاتار تۇپقاراعان، بەينەۋ، ماڭعىستاۋ، قاراقيا مەن مۇنايلى اۋداندارىندا ءوتتى. وسىلايشا ماڭعىستاۋ ءوڭىرى بۇكىل الەممەن بىرگە «جەر ساعاتى - 2020» حالىقارالىق اكتسياسىنا بەلسەندى تۇردە قاتىسىپ، تۇرعىنداردى كليماتتىڭ وزگەرۋ پروبلەماسىنا نازار اۋدارتۋعا ۇلەس قوستى.

ماڭعىستاۋ وبلىسى تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ەسەنقوس ادىلباەۆتىڭ ايتۋىنشا، دۇنيەجۇزىلىك جابايى تابيعات قورىنىڭ باستاماسىمەن العاش رەت 2007 جىلى اۋستراليانىڭ سيدنەي قالاسىندا باستاۋ العان عالامدىق شارا «جەر ساعاتى» دەگەن اتاۋعا يە بولعان. اكتسيا بارىسىندا WWF پلانەتانىڭ بولاشاعىنا بەيجايسىزدىق بەلگىسى رەتىندە جارىقتى جانە تۇرمىستىق تەحنيكانى ءبىر ساعاتقا وشىرۋگە شاقىرادى.

سەنبى كۇنى جەرگىلىكتى ۋاقىتپەن 20:30 – 21:30 ارالىعىندا بىرقاتار ءىرى جانە ورتا بيزنەس سۋبەكتىلەرىندە، سونىمەن قاتار اقتاۋ قالاسى بويىنشا 3 ورتالىق كوشەدە جارىق ۋاقىتشا ءسوندىرىلدى. اتاپ ايتقاندا 1 ش/ا باستاپ 15 ش/ا «ازاماتتارعا ارنالعان ۇكىمەت» ماڭعىسىتاۋ وبلىستىق فيليالى عيماراتىنا دەيىن، وبلىس اكىمدىگىنەن باسقۇدىق اۋىلىنىڭ 18-ءشى شاقىرىمى جانە «سامال» ش/ا باستاپ «اقبوتا» ساياباعىنا دەيىن.

- اتالمىش شاراعا اقتاۋ مەن جاڭاوزەن قالالارىنان بولەك، اۋداندار دا بەلسەندى قاتىستى. بىرقاتار كوشەلەردە جارىق ءوشىرىلدى. ماسەلەن، جاڭاوزەن قالاسىندا 300-گە جۋىق جارىق شامدارى 1 ساعاتقا ءسوندىرىلىپ، 137 كۆت ەلەكتر ەنەرگياسى ۇنەمدەلگەن. جالپى بارلىعى قانشا ەلەكتر ەنەرگياسىنىڭ ۇنەمدەلگەندىگى تۋرالى قورىتىندى الداعى كۇندەرى بەلگىلى بولادى، - دەيدى ەسەنقوس ادىلباەۆ.

ماڭعىستاۋ وبلىسى ەكولوگيا دەپارتامەنتىنىڭ باسشىسى رۋسلان توكەنوۆتىڭ ايتۋىنشا، وسىمەن 14-ءشى رەت ۇيىمداستىرىلىپ وتىرعان دۇنيەجۇزىلىك اكتسيانى ماڭعىستاۋ وڭىرىندە جۇمىس جاساپ جاتقان 16 ءىرى جانە ورتا بيزنەس سۋبەكتىلەرى قولداعان.

-بىرقاتار عيماراتتار جارىقتى ۋاقىتشا سوندىرۋگە كەلىسىم بەرىپ، اتالمىش اكتسياعا قولداۋ ءبىلدىردى. اتاپ ايتقاندا «ماڭعىستاۋمۇنايگاز» اق، «قازترانسويل» اق، «قازتەڭىزكولىكفلوتى» جشس جانە ت.ب. بۇل وتە ماڭىزدى شارا. ەنەرگيانى ۇنەمدەۋ ارقىلى قورشاعان ورتانى جاقسارتۋ بارشامىزعا ورتاق مىندەت ەكەندىگىن ءاربىر تۇرعىن سەزىنۋى ءتيىس. اكتسيانى وتكىزۋ جەرگىلىكتى اتقارۋشى ورگاندار تاراپىنان قولداۋ تاپقانىن ايتا كەتكەن دۇرىس. ناۋرىز ايىنىڭ سوڭعى سەنبىسىندە جارىقتى ءوشىرۋ جونىندەگى ۇسىنىس جەردە قالمادى جانە بۇل شارا ءداستۇرلى تۇردە جىلدا وتكىزىلىپ كەلەدى، دەيدى رۋسلان توكەنوۆ.

عالامشار تابيعاتى مەن رەسۋرستارىنا ۇقىپتى جانە جاۋاپتى قاراۋعا نازار اۋداراتىن دۇنيەجۇزىلىك ەكولوگيالىق اكتسيانىڭ قولداعانداردىڭ ءبىرى – اقتاۋ قالاسىنىڭ تۇرعىنى قايىرجان امانتۇرليەۆ. ول بىرنەشە جىل قاتارىنان «جەر ساعاتى» حالىقارالىق ەكولوگيالىق اكتسياسىنا قاتىسىپ كەلەدى جانە ادەتتەگىدەي اكتسيانىڭ وتەتىندىگى تۋرالى حاباردى ەستىگەن بويدا، سەنبى كۇنى كەشكى مەزگىلدە 20:30 – 21:30 ارالىعىندا تۋرا ءبىر ساعاتقا ۇيىندەگى جارىق پەن ەلەكتر جابدىقتارىن سوندىرگەن.

ونىڭ ايتۋىنشا، ءاربىر تۇرعىن قورشاعان ورتانى قورعاۋ جانە ەنەرگيانى ۇنەمدەۋ ماسەلەسىنە كوبىرەك كوڭىل اۋدارۋى ءتيىس. جالپى ەلەكتر قۋاتىن اجىراتىپ تۇرعان ارتىق ەتپەيدى. وسىلايشا جەر رەسۋرسى مەن تابيعاتقا ۇقىپتى قاراۋ ورتاق مىندەت ەكەندىگىن ەستەن شىعارماۋعا شاقىرادى.

- مۇنداي شارالارعا بارشامىز ءبىر كىسىدەي اتسالىسۋىمىز قاجەت دەپ سانايمىن. سەبەبى بۇل ءاربىر ازاماتقا قاتىستى ماسەلە. وسىلايشا ەنەرگيانى ۇنەمدەۋگە جانە قورشاعان ورتانى جاقسارتۋعا باعىتتالعان شاراعا بەلسەندى قاتىسىپ، از دا بولسا ءوز ۇلەسىمدى قوسىپ جاتقانىما قۋانامىن. جىل سايىن تەك «جەر ساعاتى» اكتسياسىن كۇتپەي، باسقا كۇندەرى دە ەنەرگيانى ۇنەمدەۋىمىز كەرەك دەپ سانايمىن. ۇيدەگى شامدار بوسقا جانىپ تۇرماسا دەگەن تىلەگىم بار، - دەيدى ول.

 

 

ماڭعىستاۋ وبلىسى

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار