ماسەلەن, بريتانيالىق OneWeb كومپانياسى بانكروتقا ۇشىرادى.كومپانيا وكىلدەرى جاعدايدىڭ بۇلاي وربۋىنە كوروناۆيرۋستىڭ پاندەمياسىن ايىپتاپ وتىر.
OneWeb نيۋ-يورك شتاتىنىڭ سوتىنا بانكروت تۋرالى ءوتىنىش تۇسىرگەن. جىل باسىنان بەرى كومپانيا كەلىسسوزدەر جۇرگىزىپ, عارىشقا جەر سەرىگىن شىعارۋدى جوسپارلاعان بولاتىن. اتالعان سپۋتنيكتەر الەمنىڭ الىس تۇكپىرلەرىن جوعارى جىلدامدىقتى ينتەرنەتپەن قامتاماسىز ەتۋ كەرەك ەدى.
الايدا كومپانيا SoftBank بانكىمەن كەلىسىمگە كەلە الماي, قۇيىلۋى ءتيىس 2 ميلليارد دوللارعا قول جەتكىزە الماي قالدى. باستى سەبەپ – قىتايدان شىققان كوروناۆيرۋستىڭ جاپپاي تارالۋىنان نارىقتىڭ قۇلدىراۋى. كەلىسسوزدەردىڭ ءساتسىز اياقتالۋى كومپانياعا وڭايعا تيگەن جوق.
جوسپارعا سايكەس, OneWeb-ءتىڭ 34 سپۋتنيگى 21 ناۋرىزدا «بايقوڭىر» عارىش ايلاعىنان «سويۋز-2.1ب» زىمىران تاسىعىشى ارقىلى كوككە كوتەرىلدى. بۇل ۋاقىتتا SoftBank ءبىر ساعات بۇرىن عانا مامىلەگە كەلۋدەن باس تارتقان-دى. ەندى, ينۆەستيتسياسىز قالعان OneWeb-ءتىڭ سپۋتنيكتەرىنىڭ الداعى تاعدىرى بەيمالىم بولىپ تۇر.
OneWeb جوباسى 2027 جىلى الەمنىڭ الىس تۇكپىرلەرىنە جوعارى جىلدامدىقتى ينتەرنەت جەتكىزۋدى جوسپارلاعان-تۇعىن. سوعان سايكەس, 684 سپۋتنيك عارىشقا شىعارىلۋى ءتيىس ەدى. جوبا اۆتورى – گۋگلدىڭ بۇرىنعى قىزمەتكەرى گرەگ ۋايلەر.
