ايماقتار • 28 ناۋرىز، 2020

باتىس قازاقستان ەرىكتىلەرى 437 وتباسىنا كومەكتەستى

16 رەتكورسەتىلدى

ەلىمىزدەگى توتەنشە جاعداي رەجيمىندە ءتىلسىز جاۋ – قاتەرلى ىندەتپەن بەلسەنىپ كۇرەسىپ جۇرگەن توپتىڭ ءبىرى – ەرىكتىلەر. بۇگىندە باتىس قازاقستان وبلىسىنىڭ volunteer07.kz سايتىنا 8955 ادام تىركەلگەن. ولار قازىر نەگىزگى 3 باعىت بويىنشا جۇمىس ىستەپ جاتىر.

- ءبىز العاشقى كۇننەن-اق ۇلى وتان سوعىسى ارداگەرلەرىنە، جالعىزباستى قاريالارعا، مۇمكىندىگى شەكتەۋلى جاندارعا، كوپ بالالى اتا-انالارعا ازىق-ت ۇلىك، ءدارى-دارمەك جانە وزگە دە قاجەتتى ونىمدەردى جەتكىزۋگە جاردەمدەسىپ جاتىرمىز، - دەيدى باتىس قازاقستان وبلىستىق جاستار ساياساتى ماسەلەلەرى باسقارماسى باسشىسىنىڭ مىندەتىن اتقارۋشى نۇرحات وراش.

قازىرگى تاڭدا اقجايىقتىق ۆولونتەرلەر 437 وتباسىعا كومەك كورسەتكەن. «بۇل جۇمىستى توقتاتپاي، جالعاستىرا بەرەمىز» دەيدى ەرىكتىلەر.

ۆولونتەرلەردىڭ كومەگىمەن قولعا الىنعان تاعى ءبىر باستاما - بىرنەشە مارتە قولدانۋعا ارنالعان بەتپەردە تىگۋ ءىسى. وسىلايشا ءبىر اپتادا جەرگىلىكتى ەرىكتىلەر 4000-نان استام بەتپەردە تىگىپ، وبلىس تۇرعىندارىنا تەگىن تاراتقان.

ارينە، سىن ساتتە مەملەكەت تاراپىنان كەشەندى شارالار ۇيىمداستىرىلىپ، تۇرعىندارعا بارىنشا قولاۋ كورسەتىلۋدە. ماسەلەن، الەۋمەتتىك ماڭىزى بار ازىق-ت ۇلىك باعاسى قاتاڭ قاداعالانۋدا. الايدا تاۋار قۇنىن نەگىزسىز ءوسىرىپ، قالتاسىن قامپايتقىسى كەلەتىن پايداكۇنەمدەر دە كەزدەسىپ قالادى. وسى جەردە ەرىكتىلەردىڭ كومەگى قاجەت-اق. باتىسقازاقستاندىق ۆولونتەرلەر بۇگىندە ءتۇرلى مونيتورينگ توپتاردىڭ قۇرامىنا كىرىپ، كۇن سايىن بازارلار مەن دۇكەندەردە باعانىڭ ءوسىپ كەتپەۋىن، ساتۋشىلاردىڭ بەتپەردە، قولعاپ، انتيسەپيك قۇرالدارىن قولدانۋىن، ويىن-ساۋىق ورىندارى، كافەلەر مەن دۇكەندەردىڭ كەشكى ساعات 10.00-نان كەيىن جۇمىس جاساماۋىن قاداعالاپ ءجۇر.

- بۇل ءۇش باعىتتان بولەك وبلىس تۇرعىندارىن ۇيدە بولۋعا ۇگىتتەپ – #ۇيدەبول، مەديتسينا قىزمەتكەرلەرىن قولداۋعا ارنالعان – #بىزدىڭدارىگەرلەرگەراحمەت حەشتەگتەرىن الەۋمەتتىك جەلىدە تاراتىپ جاتىرمىز، - دەيدى نۇرحات سەرىكقالي ۇلى.

ايتا كەتەيىك، باتىسقازاقستاندىق ەرىكتىلەردىڭ كومەگىنە مۇقتاج جاندار volunteer07.kz سايتىندا نەمەسە 87051430606 نومەرىنە حابارلاسىپ، ءوتىنىم قالدىرا الادى.

 

سۋرەتتى تۇسىرگەن رافحات حالەلوۆ

باتىس قازاقستان

سوڭعى جاڭالىقتار

ەلدىك نىشاندار تاريحى

قازاقستان • كەشە

ۇقساس جاڭالىقتار