بۇگىن مەملەكەتتىك كوميسسيانىڭ كەزەكتى وتىرىسى ءوتىپ, كارانتين شارالارىن كۇشەيتۋ بويىنشا بىرقاتار تاپسىرمالار بەرىلدى. وسى نەگىزدە مينيستر كوشەدە ءجۇرۋ تالاپتارىنا توقتالدى. ونىڭ ايتۋىنشا قوعامدىق كولىككە, تاكسي, تاماق جەتكىزۋ قىزمەتتەرىنە سانيتارلىق تالاپتاردى قاتاڭ ساقتاۋ ءۇشىن تسيركۋليار جاسالادى. 28 ناۋرىز تۇنگى 00:00-دەن باستاپ ۇيدەن شىعۋعا شەكتەۋ قويىلاتىنىن تاعى دا ەسكە سالعان د.اباەۆ تەك ازىق-ت ۇلىك, ءدارى الۋعا نەمەسە جۇمىسقا بارۋ ءۇشىن عانا شىعۋعا بولاتىنىن ايتتى. سونداي-اق 30 ناۋرىزدان باستاپ مەكەمەلەردىڭ باسىم كوپشىلىگى جۇمىسىن توقتاتادى.
«كوشەدە پوليتسيا قىزمەتكەرلەرى توقتاتىپ, قايدا بارا جاتقانىڭىزدى سۇراسا, وعان تۇسىنىستىك تانىتىپ, جاۋاپ بەرۋ كەرەك. جۇمىسقا شاقىرعاندى راستاۋ ءۇشىن سىزدە تىكەلەي باسشىنىڭ نەمەسە كادر ءبولىمى قىزمەتكەرىنىڭ تەلەفون نومەرى بولعان ءجون. ازىق-ت ۇلىك دۇكەندەرى مەن ءدارىحانالار, ادەتتە, تۇرعىن ۇيلەرگە جاقىن ورنالاسادى. سوندىقتان, پوليتسيا قىزمەتكەرلەرى تۇرعىنداردىڭ قاجەتتى زاتىن ساتىپ الىپ, ۇيگە قايتقانىن باقىلاۋى مۇمكىن. وعان دا تۇسىنىستىك تانىتۋ قاجەت», دەدى ۆەدومستۆو باسشىسى.
ءمينيستردىڭ ايتۋىنشا, قوعامدىق كولىك جۇمىسىن رەتتەۋدى دە اكىمدىكتەر قايتا قاراپ جاتىر. جاعدايعا قاراي قوعامدىق كولىككە قوسىمشا جۇكتەمە بولىپ, قوزعالىسى شەكتەلۋى مۇمكىن.
«ازاماتتار ءۇي جانۋارلارىن ءۇيدىڭ جانىندا سەرۋەندەتە الادى. ال ەگەر ازاماتتار, باسقا سەبەپتەرمەن شىققان بولسا, وندا الدىمەن ەسكەرتۋ, ودان كەيىن 26 مىڭ 500 تەڭگە مولشەرىندە ايىپپۇل سالىنۋى نەمەسە 15 تاۋلىككە دەيىن اكىمشىلىك قاماۋعا الىنۋى مۇمكىن. پوليتسيا قىزمەتكەرلەرى حاتتاما تولتىرىپ, ءىستى سوت قارايدى», دەگەن داۋرەن اباەۆ توتەنشە جاعداي كەزىندە بيلىك وكىلىنىڭ زاڭدى تالابىنا باعىنباعانداردىڭ قىلمىستىق جاۋاپكەرشىلىككە تارتىلاتىنىن ەسكەرتتى.
COVID-19 ۆيرۋسىن جۇقتىرىپ قايتىس بولعان ازاماتتىڭ قالاي جەرلەنەتىنى تۋرالى سۇراقتارعا جاۋاپ بەرگەن مينيستر بۇگىن كەشكە نەمەسە ەرتەڭ تاڭەرتەڭ باس سانيتارلىق دارىگەردىڭ رەسمي قاۋلىسى شىعاتىنىن, ول جەردە قاتاڭ ساقتالۋى كەرەك ەرەجەلەر كورسەتىلەتىنىن ايتتى. «دارىگەرلەر ايتقان سانيتارلىق تالاپتاردى قاتاڭ ساقتاۋ قاجەتتىگى تۋرالى قازاقستان مۇسىلماندار ءدىني باسقارماسى مەن پراۆوسلاۆيە شىركەۋى ءتيىستى ءپاتۋا مەن ەسكەرتپەلەر ازىرلەدى», دەدى ول.
سونداي-اق ول بۇقارالىق اقپارات قۇرالدارى وكىلدەرىنىڭ قاشىقتان جۇمىس ىستەۋگە كوشۋى كەرەكتىگىن, ءجۋرناليستىڭ قالادا جۇمىس بابىمەن ءجۇرۋى ءۇشىن قىزمەتتىك كۋالىگى جانە رەداكتسيالىق تاپسىرما تۋرالى انىقتامانى الىپ ءجۇرۋى كەرەك ەكەنىن ايتتى. ونىڭ ايتۋىنشا, انىقتامانى تەلەفوننان دا كورسەتۋگە بولادى. ال دارىگەرگە كورىنۋى كەرەك ازاماتتار اۋرۋحاناعا بارا الادى. كارانتيندىك شارالاردىڭ حالىقتىڭ اماندىعى ءۇشىن ەنگىزىلىپ جاتقانىن تۇسىندىرگەن د.اباەۆ ازاماتتاردىڭ ەنگىزىلگەن شەكتەۋلەردى جاۋاپكەرشىلىكپەن ورىنداۋى كەرەكتىگىن ايتتى.
پرەزيدەنتتىڭ بانكتەر مەن ميكروكرەديتتىك ۇيىمدارعا قارىز بويىنشا ايىپپۇلدار مەن وسىمپۇلدارعا تىيىم سالۋ تۋرالى تاپسىرماسىنا توقتالعان مينيستر: «قازىرگى ۋاقىتتا قارجى نارىعىن رەتتەۋ جانە دامىتۋ اگەنتتىگى, قازاقستان قارجىگەرلەر قاۋىمداستىعى, ەكىنشى دەڭگەيلى بانكتەر جانە ميكروقارجى ۇيىمدارى حالىقتى قولداۋ بويىنشا ءتيىستى شارالاردى ازىرلەپ, بەكىتتى. قارىز الۋشىلار ءۇشىن تولەم مەرزىمى 2020 جىلدىڭ 16 ناۋرىزى مەن 15 ماۋسىمى ارالىعىندا كەيىنگە شەگەرىلەدى. قارىز بويىنشا تولەمدەردى كەيىنگە شەگەرۋ مۇمكىندىگى وسىعان مۇقتاج ادامدارعا بەرىلمەك», دەدى.
ياعني مۇنىڭ قاتارىنا كارانتينگە بايلانىستى جۇمىسىنان ايىرىلعان, جالاقى ساقتالمايتىن دەمالىستا بولعان, جالاقىسى كەمىگەن نەمەسە توقتاتا تۇرعانداردى ەنگىزۋگە بولادى. ال شەگەرۋ شاراسى رەسمي تۇردە تىركەلگەن جۇمىسسىزدار, ااك الۋشىلار جانە حالىقتىڭ الەۋمەتتىك ءالسىز توپتارى ءۇشىن قوسىمشا قۇجاتتارسىز جۇزەگە اسادى. نەسيەلىك ۇيىمدار اتالعان تۇلعالاردىڭ تىزىمدەرىن كرەديتتىك بيۋرولاردان الادى. ءمينيستردىڭ ايتۋىنشا, ساتىلعان تاۋارلارى مەن قىزمەتتەر كولەمىنىڭ ازايۋىنان قارجىلىق جاعدايى ناشارلاسا, تۇتىنۋشىلارى تولەمدەردى كەشىكتىرسە كاسىپكەرلەر دە بۇل شارادان يگىلىكتەنە الادى.
بۇدان بولەك توتەنشە جاعداي بويىنشا قايىرىمدىلىق قاراجاتى جينالاتىن «Birgemiz» قوعامدىق قورى بارلىق شىعىندار تۋرالى ەسەپ بەرەتىنىن جەتكىزگەن مينيستر: «Birgemiz» قورىنا تۇسكەن قاراجات تۋرالى كۇن سايىن اقپارات بەرىلىپ جاتىر. قازىر كورسەتىلەتىن كومەك تۇرلەرى مەن كومەك الۋشىلاردىڭ ساناتتارىن, ازاماتتاردىڭ تىزىمدەرىن انىقتاۋ جۇمىستارى ءجۇرىپ جاتىر. سونىمەن بىرگە, قوردىڭ جاڭادان قۇرىلعان ۆەب-سايتىندا بارلىق شىعىندار مەن چەكتەر كورسەتىلىپ, تۇتاس ەسەپتىك اقپارات جاريالانادى», دەدى.
ءۇندىستاننىڭ 15 ساۋىرگە دەيىن شەكاراسىن جابۋىنا بايلانىستى 76 قازاقستان ازاماتى سول ەلدە قالىپ قويدى. د.اباەۆ ولاردى ەلگە قايتارۋدىڭ جولدارى قاراستىرىلىپ جاتقانىن دا اتاپ ءوتتى.
