يران سيريا وپپوزيتسياسىنىڭ حيميالىق قارۋ قولدانعانىنا دالەل بار ەكەنىن, جانە بۇل تۋرالى بارشاعا حابارلايتىنىن مالىمدەدى. بۇل تۋرالى Al Arabiya باسىلىمىنا سىلتەمە جاساعان «گازەتا.رۋ» حابارلادى.
دەگەنمەن, يران سىرتقى ىستەر مينيسترلىگى «بارلىق مۇددەلى كۇشتەردى سيرياعا شابۋىل جاساۋدان» ساقتاپ قالدى. بۇعان دەيىن يران پرەزيدەنتى حاسان روۋحاني سيريانىڭ حيميالىق قارۋ قولدانعانىن دالەلدەيتىنىن ايتقان بولاتىن, بىراق ناقتى كىمنىڭ قولدانعانىن ايتقان جوق. ەندى ول حيميالىق قارۋدى سيريا وپپوزيتسياسى پايدالاندى دەپ وتىر. سول ۋاقىتتا اقش جەرورتا تەڭىزىندەگى اسكەري كۇشىن كوبەيتىپ, باراك وباما اق ۇيدە سيريا بويىنشا جەدەل جينالىس وتكىزۋدە. اقش اسكەري-تەڭىز كۇشتەرىنىڭ سيريا جاعالاۋىنا زىمىراندارى بار ءتورتىنشى اسكەري كەمەنى جىبەرىپ وتىرعاندىعى بەلگىلى بولدى.
جاقىندا اقش پرەزيدەنتى باراك وباما ەگەر سيريانىڭ حيميالىق قارۋ قولدانعانى تۋرالى اقپارات راستالسا, وندا «امەريكا مۇنى نازارسىز قالدىرمايدى», دەدى.
سيريانىڭ باستى وداقتاسى رەسەيدىڭ مالىمدەۋىنشە, حيميالىق قارۋدى ۇكىمەتتىك كۇشتەر ەمەس كوتەرىلىسشىلەر پايدالانۋى مۇمكىن.
سيريا مەملەكەتتىك باق-تىڭ حابارلاۋىنشا, سەنبى كۇنى كوتەرىلىسشىلەر باقىلايتىن اۋماقتا ۋلى زاتتاردىڭ قورى تابىلعان. سيريالىق تەلەۆيدەنيەنىڭ اقپاراتى بويىنشا, جاۋىنگەرلەر دجوبار قالاسىنا كىرمەك بولعاندا تۇنشىققان. بولجام بويىنشا, دجوبار - سارسەنبى كۇنى حيميالىق قارۋ قولدانىلعان شاعىن قالا. سيريا وپپوزيتسياسى بولسا, سارسەنبى كۇنى ۇكىمەتتىك اسكەرلەردىڭ داماسك ماڭىنداعى اسكەري وپەراتسيا كەزىندە حيميالىق قارۋ قولدانعاننان كەيىن جۇزدەگەن ادامنىڭ قازا بولعاندىعى تۋرالى مالىمدەدى.
سۇلتان بوزايعىر.
