«كەشە ەل پرەزيدەنتى توتەنشە جاعداي كەزىندە مەملەكەتتىك ورگانداردىڭ جانە كۆازيمەملەكەتتىك سەكتورداعى قىزمەتكەرلەردىڭ 70 پايىزىن قاشىقتان جۇمىس ىستەۋگە كوشىرۋگە تاپسىرما بەردى. باسقا مەملەكەتتىك ەمەس جەكە كاسىپورىندار دا وسى تارتىپكە كوشۋى قاجەت. جۇمىس بارىسى ەڭبەك كودەكسىنىڭ 138-ءشى بابىمەن رەتتەلەتىن بولادى. مەكەمەنىڭ, ۇيىمنىڭ باسشىسى بۇيرىق شىعارادى جانە جالاقى تولەۋ ءتىرتىبىن وزگەرتپەيدى. بۇرىنعىداي اتقارىلعان جۇمىس ءۇشىن جالاقى تولەنەدى. جەكەمەنشىك ۇيىمداردىڭ باسشىلارى وزدەرى بۇيرىق شىعارادى, ءارى ەڭبەك كودەكسىنە سايكەس اپتاداعى جۇمىس كۇنىنىڭ سانىن ازايتۋعا نەمەسە ءبىر جۇمىس كۇنىنىڭ ىشىندەگى ساعاتىن ازايتۋعا قۇقىعى بار. ەگەر جۇمىسشىلاردى قاشىقتان جۇمىس ىستەۋگە اۋىستىرۋ مۇمكىندىگى بولماسا, جۇمىس بەرۋشى ءوز تاراپىنان قىسقارتىلعان جۇمىس ۋاقىتىن بەلگىلەۋگە قۇقىلى. مۇنداي جاعدايدا ول ەڭبەك كودەكسىنىڭ 70-ءشى بابىمەن رەتتەلەدى», - دەدى ول.
