بۇل – وتاندىق فۋتبولدىڭ جارقىن جەڭىسى
كەشە تۇندە «استانا-ارەنا» سپورت كەشەنىندە چەمپيوندار ليگاسىنىڭ پلەي-وفف كەزەڭىنىڭ ءبىرىنشى ويىنىندا قاراعاندىنىڭ «شاحتەرى» شوتلانديانىڭ «سەلتيگىن» قابىلدادى. تارتىستى دا, قىزىقتى وتكەن ماتچ 2:0 ەسەبىمەن جەرلەستەرىمىزدىڭ پايداسىنا شەشىلدى.
بۇل – وتاندىق فۋتبولدىڭ جارقىن جەڭىسى
كەشە تۇندە «استانا-ارەنا» سپورت كەشەنىندە چەمپيوندار ليگاسىنىڭ پلەي-وفف كەزەڭىنىڭ ءبىرىنشى ويىنىندا قاراعاندىنىڭ «شاحتەرى» شوتلانديانىڭ «سەلتيگىن» قابىلدادى. تارتىستى دا, قىزىقتى وتكەن ماتچ 2:0 ەسەبىمەن جەرلەستەرىمىزدىڭ پايداسىنا شەشىلدى.
بۇل ناعىز «كورگەن دە ارماندا, كورمەگەن دە ارماندا» دەيتىندەي ويىن بولدى. ولاي بولاتىن دا ءجونى بار. «سەلتيك» – ەۋروپاداعى ەڭ بەلدى دە بەدەلدى كوماندالاردىڭ ءبىرى. بۇعان دەيىن قازاقستان كلۋبتارىنا مۇنداي دەڭگەيدەگى ۇجىممەن ۇشىراسۋدىڭ رەتى كەلە قويعان جوق ەدى. وسى جىلى العاش رەت چەمپيوندار ليگاسىنىڭ ەكى كەزەڭىنەن ءساتتى وتكەن كەنشىلەر جاساعى ءۇشىن مۇنداي قارسىلاسپەن كۇش سىناسۋ تاعدىردىڭ بەرگەن سىيى ىسپەتتەس-ءتىن. سوندىقتان قاراعاندىلىقتار وسى مۇمكىندىكتى ءتيىمدى پايدالانىپ, شايقاسقا بارىن سالۋعا ۇمتىلدى.
بىراق ويىن ءبىزدىڭ قاۋىپ ەتكەنىمىزدەي, ءا دەگەننەن «سەلتيكتىڭ» شابۋىلىمەن باستالدى. گلازگونىڭ سايىپقىران ساربازدارى ماتچتىڭ 3-مينۋتىندا ءبىزدىڭ قاقپاعا ەكى بىردەي بۇرىشتاما بەرىپ, ايتارلىقتاي قاتەر تۋعىزدى. ارادا 3-مينۋت وتكەندە وسى جاعداي تاعى قايتالاندى. ءبىزدىڭ فۋتبولشىلار وسىدان كەيىن عانا باۋىرلارىن جازىپ, العا قاراي جوڭكىلە شاپتى. سونىڭ ناتيجەسىندە 12-مينۋتتا كوماندا كاپيتانى اندرەي فينونچەنكو قاقپا الدىنداعى قاربالاستى ۇتىمدى پايدالانىپ, ەسەپ اشىپ ۇلگەردى. وسىدان كەيىن ويىن نەگىزىنەن تەڭ جاعدايدا ءوتىپ جاتتى.
مەيماندار ەكىنشى تايمنىڭ باسىن دا ءوز ىقپالىندا وتكىزدى. الايدا, كوپ ۇزاماي شاحتەرلىكتەر ويىنداعى تەپە-تەڭدىكتى قالپىنا كەلتىرىپ, قايتادان شابۋىلعا كوتەرىلە باستادى. شابۋىلدىڭ ىڭعايلى ساتىندە شابۋىلشى سەرگەي حيجنيچەنكو تاعى ءبىر گول سوعىپ, جەرلەستەرىمىزدىڭ ايبىنىن اسىرا ءتۇستى. بۇدان كەيىن دە ەكى كوماندانىڭ ءبىر-بىرلەرىنە گول سوعاتىنداي مۇمكىندىكتەرى بولدى. دەگەنمەن, ۋاقىت ۇزاعان سايىن سەنىمدىلىكتەرى بەكي بەرگەن ءبىزدىڭ فۋتبولشىلار الاڭدا وزدەرىن بارىنشا ىجداعاتتى ۇستاپ, وسى ەسەپتى ماتچتىڭ سوڭىنا دەيىن جەتكىزدى.
قارىمتا ويىن تامىزدىڭ 28-ءى كۇنى گلازگو قالاسىندا وتەدى.
سەرىك ءپىرنازار,
«ەگەمەن قازاقستان».
