كەزدەسۋگە پارلامەنت دەپۋتاتتارى, دەنساۋلىق ساقتاۋ, ۇلتتىق ەكونوميكا, قارجى مينيسترلىكتەرىنىڭ باسشىلارى, «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامى مەن «اتامەكەن» ۇلتتىق كاسىپكەرلەر پالاتاسىنىڭ, نۇر-سۇلتان قالالىق ەمحاناسى مەن قاراعاندى وبلىسى, وساكاروۆ اۋدانىنىڭ ورتالىق اۋداندىق اۋرۋحاناسىنىڭ, «مەديكەر استانا» سەرىكتەستىگىنىڭ جانە سەنات اپپاراتىنىڭ قىزمەتكەرلەرى قاتىستى.
كوميتەت توراعاسى مۇرات باقتيار ۇلىنىڭ ايتۋىنشا, مەديتسينالىق قىزمەت كورسەتۋدىڭ ساپاسى مەن قولجەتىمدىلىگىن جاقسارتۋ, ونىڭ باسەكەلەستىك قابىلەتىن ارتتىرۋ مەديتسينالىق قىزمەتتەردىڭ تاريفتەرىنە تىكەلەي بايلانىستى. «وسى تاريفتەردى قالىپتاستىرۋدا بىزدەردى تولعاندىراتىن ماسەلەلەر جەتكىلىكتى. قارجىلاندىرۋدىڭ جوعارىدا اتالعان كوزدەرى بويىنشا مەديتسينالىق قىزمەتتەرگە تاريفتەر قالىپتاستىرۋ قالاي جۇزەگە اسۋدا جانە ول مەديتسينالىق قىزمەت كورسەتۋدىڭ ساپاسى مەن قولجەتىمدىلىگىن جاقسارتۋعا مۇمكىندىك بەرە مە؟ بۇگىنگى كەزدەسۋىمىز وسى سۇراقتاردى تالقىلاۋعا جانە ولاردىڭ شەشۋ جولدارىن انىقتاۋعا ارنالىپ وتىر», - دەدى م.باقتيار ۇلى.
دەنساۋلىق ساقتاۋ مينيسترلىگىنىڭ جاۋاپتى حاتشىسى بوتاگوز جاقسەلەكوۆا مەديتسينالىق قىزمەتتەردىڭ ءتاريفى مەملەكەتتەن بولىنەتىن بيۋدجەت قاراجاتى مەن مىندەتتى الەۋمەتتىك مەديتسينالىق ساقتاندىرۋ قورىنداعى قارجىنى باسشىلىققا الا وتىرىپ بەلگىلەنەتىنىن ايتتى. «قولدانىستاعى تاريفكە سايكەس, مەديتسينالىق قىزمەتتىك تولەم ونىڭ تۇرىنە قاراي تولەنەدى. جان باسىنا شاققاندا امبۋلاتورلىق-ەمحانالىق كومەك ەرەجەگە سايكەس 1024,78 تەڭگەنى قۇرايدى. بيىلدان باستاپ حالىقتىڭ تىعىز ورنالاسۋ ايماعىنا قاراي تولەم وزگەردى. سونداي-اق, جەدەل مەديتسينالىق كومەكتىڭ ءتاريفى دە جان باسىنا وراي ەرەجە بويىنشا تولەنەدى. ال ستاتسيونارلىق قىزمەت كورسەتەتىن مەديتسينالىق قىزمەت كلينيكالىق شىعىندار توبىنا قاراي تولەم جۇرگىزىلەدى», - دەدى ب. جاقسەلەكوۆا.
سەناتور نۇرتورە ءجۇسىپتى مىندەتتى الەۋمەتتىك مەديتسينالىق ساقتاندىرۋ قورىنا كىرمەي قالعان ازاماتتاردىڭ جاعدايى تولعاندىردى. ء«مامس قورىنا كىرمەگەن ازاماتتار بار. وعان سەبەپ جۇمىس بەرۋشىلەردىڭ ءوز قىزمەتكەرلىرىنە ۋاقىتىلى تولەمەۋى. وسى ولقىلىقتى جويۋ ماقساتىندا ءبىز قارجى مينيسترلىگى مەملەكەتتىك كىرىستەر كوميتەتىمەن بىرلەسىپ جۇمىستار اتقارىلۋدا. ءبىز ولارعا مامق قورىنا جارنا تولەمەي وتىرعان ۇيىمدار مەن ازاماتتاردىڭ ءتىزىمىن بەرەمىز. ودان ءارى كىرىس كوميتەتى جۇمىس جاسايدى. ايدىڭ باسىندا ءتىزىم بەرىپ, ايدىڭ سوڭىندا جاۋاپ الىپ وتىرمىز. بۇل ۇكىمەتتىڭ باقىلاۋىنداعى ماسەلە», - دەدى «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامىنىڭ باسقارما توراعاسى ايباتىر جۇماعۇلوۆ.
دەپۋتات ناريمان تورەعاليەۆ ەلىمىزدەگى قىمبات مەديتسينالىق قۇرال-جابدىقتاردىڭ قولجەتىمدىلىگى ماسەلەسىن كوتەردى. «بۇگىندە قىمبات مەديتسينالىق-دياگنوستيكالىق قۇرال-جابدىقتار بىرەن-ساران اۋدانداردى ەسەپتەمەگەندە, كوبىنەسە ءىرى قالالار مەن وبلىس ورتالىقتارىندا عانا قولجەتىمدى. ال قالعان اۋدان جانە اۋىل تۇرعىندارى ءىرى قالالارعا بارىپ ەمدەلۋىنە تۋرا كەلەدى. ەندى قاراپ وتىرساق, تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە جانە مىندەتتى الەۋمەتتىك مەديتسينالىق ساقتاندىرۋ جۇيەسىندە مەديتسينالىق قىزمەتتەرگە باعا بەلگىلەۋ تاريفىندە بۇل ماسەلە ايتىلماعان», - دەدى ن.تورەعاليەۆ.
دەنساۋلىق ساقتاۋ مينيسترلىگىنىڭ وكىلى ءوز كەزەگىندە اۋداندىق جانە اۋىلدىق وڭىرلەردە اتالعان پروبلەمالاردىڭ بارىن ايتا كەلىپ, بۇل ماسەلەنى شەشۋدە مينيسترلىكپەن قاتار جەرگىلىكتى اتقارۋشى ورگاندار تاراپىنان مۇددەلى بولۋى كەرەكتىگىن العا تارتتى.
الەۋمەتتىك-مادەني دامۋ جانە عىلىم كوميتەتىنىڭ توراعاسى مۇرات باقتيار ۇلى كەزدەسۋدى قورىتىندىلاي كەلىپ, مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋدى شەشىلۋى ءتيىس بىرقاتار سۇراقتاردى اتاپ ءوتتى. ء«بىز نەگە بۇل ماسەلەنى بۇگىن قاراپ وتىرمىز, سەبەبى مەديتسينالىق قىزمەتتەردىڭ تاريفىنە قاتىستى سۇراقتار كوپ. ەرتەڭگى كۇنى قور جۇمىسىنا قاتىستى ءتۇرلى تاۋەكەلدەر تۋىنداۋى مۇمكىن. مىسالى, بىزدە ءوزىن-ءوزى قامتاماسىز ەتىپ وتىرعان ازاماتتار بار, ولار ءمامس قورىنا جارنا تولەمەيدى, ەرتەڭ ولاردى جارنانى تولەمەگەن ءۇشىن اۋرۋحانالار مەن ەمحانالار قابىلداماۋى مۇمكىن. بۇل ۇلكەن ماسەلە. سوندىقتان دا مينيسترلىكتىڭ الدىندا اتقاراتىن ءالى دە بىرقاتار جۇمىستار بار», - دەدى م.باقتيار ۇلى.
