وبلىستا بولۋى مۇمكىن توتەنشە جاعدايلاردىڭ الدىن الۋ ءىس-شارالارى دەر كەزىندە جانە ساپالى ورىندالۋدا. سۋ قويمالارى مەن وزەندەرگە كۇندەلىكتى مونيتورينگ جۇرگىزىلۋدە. «بۇگىنگى كۇنگە شاردارا سۋ قويماسىندا - 4185 ملن م3 سۋ بار, تولۋى - 80%, شىعىپ جاتقان سۋ كولەمى - 400,5 م3/سەك. ال, كوكساراي سۋ رەتتەگىشىندە جينالعان سۋ قورى - 1061,88 ملن م3 تولۋى 35%-دى قۇراپ وتىر», - دەدى نۇرعالي سىرلىباي ۇلى وڭىرلىك كوممۋنيكاتسيالار قىزمەتىندە وتكەن بريفينگتە.
وڭىردە ورنالاسقان 40 سۋ قويماسىنىڭ 18-ءى رەسپۋبليكالىق, 17-ءسى قالا, اۋداندىق كوممۋنالدىق مەنشىكتە بولسا, 5-ءۋى جەكەمەنشىك يەلىگىندە. ياعني قاراۋسىز قالعان سۋ قويمالارى جوق. «وبلىس اۋماعىندا سۋ تاسقىنى جاعدايى سىرداريا باسسەيىندىك وزەنىمەن تىكەلەي بايلانىستى بولعاندىقتان قاتاڭ باقىلاۋعا الىنعان. سىرداريا وزەنىنىڭ تومەنگى اعىسىنا 66 م3/سەك سۋ جىبەرىلۋدە. جالپى وبلىس بويىنشا سۋ قويمالارىنىڭ ورتاشا تولۋى 45-50%-دى قۇرايدى. بۇگىنگى تاڭدا وزەننىڭ ارناسىندا سۋدىڭ اعىسى قالىپتى, جاعالاۋداعى ەلدى مەكەندەرگە قاۋىپ جوق», دەدى دەپارتامەنت باستىعى.
سىرداريا وزەنىنەن باستاۋ الاتىن كانالداردىڭ باس توسپاسى بەكىتىلگەن. قاپتالعان 53 توننا قۇم, 584 - شاتىر, 4622 - كەرۋەت, 36 مىڭ ادامعا ارنالعان توسەك - ورىن دايىندالعان. سونداي-اق وبلىس اۋماعىنداعى 26,9 شاقىرىم وزەندەردە جاعا بەكىتۋ جانە ارنا تۇزەۋ جۇمىستارى جۇرگىزىلسە, 29,9 شاقىرىم قورعانىس دامباسى تۇرعىزىلىپتى. ارىق-اتىزداردىڭ ارناسى, كانالدار دا تازارتىلعان.
تۇركىستان وبلىسى
