رۋحانيات • 27 اقپان، 2020

ولار ەشكىمنەن كەم ەمەس

21 رەتكورسەتىلدى

نۇر-سۇلتان قالاسىندا ەرەكشە «دارىگەرلەردىڭ» قابىلداۋى ءوتتى. حالىقارالىق الەۋمەتتىك تەڭدىك كۇنىنە وراي ء«بىز تەڭبىز» دەگەن اتپەن ۇيىمداستىرىلعان اشىق ەسىك كۇنىندە «قاسيەتتى جول» وڭالتۋ ورتالىعىندا ەم الىپ جاتقان بالالار بەيىندى مامان رەتىندە قوناقتاردى قابىلدادى.

«قاسيەتتى جول» قوعامدىق قايى­رىم­دىلىق قورى 2011 جىلدان باس­تاپ سال اۋرۋىنا شالدىققان بالا­لار­عا وڭالتۋ قىزمەتىن كورسەتىپ كە­لەدى. العاشىندا قور بالالار ۇيىن­دەگى ەرەكشە قاجەتتىلىكتەرى بار جاسوسپى­رىمدەردى شەتەلگە ەمگە جىبەرىپ وتىر­عان. 2014 جىلدان باستاپ وڭالتۋ ورتالىقتارىن اشىپ، بۇگىنگە دەيىن 4974 بالاعا تەگىن وڭالتۋ قىزمەتىن ۇسىنعان. ەلورداداعى №2 قالالىق بالالار اۋرۋحاناسىندا ورنالاسقان «قاسيەتتى جول» وڭالتۋ ورتالىعىندا 50 بالا ەم الۋدا. 

1

«قاسيەتتى جول» وڭالتۋ ورتا­لى­عى­نىڭ ديرەكتورى اينۇر نۇرقو­جاە­ۆانىڭ ايتۋىنشا، ەلىمىزدە 3 ايدان 15 جاس ارالىعىندا سال اۋرۋى­نا شالدىققان 26 مىڭنان استام بالا بار. بۇل تەك تىركەلگەندەرى. «رەسپۋبليكا بويىنشا ءۇش وڭالتۋ ورتالىعى بار. 2 جاستان 15 جاسقا دەيىنگى بالالاردى ەمدەيتىن «قا­سيەت­تى جول» وڭالتۋ ورتالىعى مەن  3 ايدان 2 جاسقا دەيىنگى بالا­لار­دى قابىلدايتىن «بالاپان» ەرتە ارالاسۋ ورتالىعى استانادا ورنا­لاس­قان. ەلىمىزدە سال اۋرۋىنا ەڭ كوپ شالدىققان بالالار وڭتۇستىك ايماقتا تىركەلگەندىكتەن، شىمكەنت قالاسىندا «Kzhol Shymkent» وڭالتۋ ورتالىعى جۇمىس ىستەيدى. وندا 3 ايدان 15 جاسقا دەيىنگى بالالار ەم قا­بىل­دايدى. وڭالتۋ ۋاقىتى 21 كۇنگە سوزىلادى. جىلىنا ءۇش ورتا­لىق­تا 1560 بالا وڭالتۋدان وتەدى»، دەيدى ول.

«Samruk-Kazyna Trust» الەۋ­مەت­تىك جوبالاردى دامىتۋ قورى دەمەۋشىلىك ەتەتىن قايىرىمدىلىق قورى بۇدان بولەك «قازاقستان جاق­سىلىق جاساي­دى» دەگەن جوبانى جۇزەگە اسىرىپ كەلەدى.  وندا ءاربىر بەل­سەندى تۇر­عىن 365 تەڭگەنى قا­يى­رىم­دىلىققا جۇم­ساۋ ارقىلى بالالاردى وڭالتۋعا مۇمكىندىك بەرەدى. ء«بىز نەگىزىنەن از قامتىلعان وتباسى، كوپ بالالى وتباسى جانە وتباسىندا ەكى مۇگەدەك بالا بولعان جاعدايدا قۇجاتتارىن قابىلدايمىز. بۇدان بولەك بالالار ۇيىنەن 10 شاقتى بالا كەلەدى. سال اۋرۋىنا شالدىققان بالالار دا قوعام­نىڭ ءبىر مۇشەسى، ءبىز ىستەي الاتىن نارسە­لەر ولاردىڭ دا قولىنان كەلەدى. سوندىقتان ولاردى كەمسىتپەۋىمىز كەرەك. بۇگىن ءبىزدىڭ كىشكەنتاي ەمدەلۋ­شى­لەرىمىزدىڭ بىرەۋى لوگوپەد، بىرەۋى پسيحولوگ، بىرەۋى دەفەكتولوگ، لوگوپەد بولىپ قوناقتاردى قابىلداپ جاتىر»، دەيدى اينۇر نۇرقوجاەۆا.

ءىس-شارا سوڭىندا وڭالتۋ ورتا­لىع­ىندا ەمدەلىپ جاتقان بالالار وزدە­رى­نىڭ ونەرىن كورسەتتى.

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار