سپورت • 18 اقپان، 2020

سەرگەي ۆەرتيانكين: باتۋتتاعى گيمناستيكادان وليمپياداعا جولداما الۋىمىز مۇمكىن

33 رەتكورسەتىلدى

ازەربايجان استاناسى باكۋدە باتۋتتاعى گيمناستيكادان ليتسەنزيالىق الەم كۋبوگى كەزەڭى اياقتالدى. اتالعان سىندا قازاقستاندىق پيرمامماد اليەۆ پەن دانيل مۇساباەۆ سينحروندى سەكىرۋدەن قولا جۇلدەگەر اتاندى. ال جەكەلەي جارىستا مۇساباەۆ 15-ءشى، اليەۆ 46-شى ساتىدان كورىنگەن بولاتىن. بۇل جايىندا ۇلتتىق وليمپيادالىق كوميتەتتىڭ ءباسپاسوز قىزمەتى حابارلادى.

«باكۋدەگى الەم كۋبوگى قارساڭىندا ازەربايجاندا وقۋ-جاتتىعۋ جيىندارىن وتكىزگەن ەدىك. بۇل جيىننىڭ پايداسى ءتيدى. بىزبەن بىرگە ماسساجشى مەن دارىگەر دە باردى. جالپى العاندا، گيمناستاردىڭ كورسەتكىشى جامان ەمەس. دانيل مۇساباەۆ جەكەلەي سىندا 15-ءشى ورىننان كورىندى. وعان فينالعا ءوتۋ ءۇشىن ءسال عانا ۇپاي جەتپەي قالعانىن ايتا كەتۋ كەرەك. بىراق جالپى ەسەپتە جاقسى ۇپاي جينادىق. ەندى ليتسەنزيا ءۇشىن تالاستى ودان ءارى جالعاستىرامىز. الدىمىزدا يتاليادا وتەتىن الەم كۋبوگى كەزەڭى بار. بۇل باسەكەدە ۇپايدى مولايتۋعا تىرىساتىنىمىز انىق. دانيل مۇساباەۆتىڭ ليتسەنزياعا قول جەتكىزەتىن مۇمكىندىگى بار.  ول تىزەسىنەن العان جاراقاتىنا بايلانىستى ءبىراز تۋرنيردەن سىرت قالدى. بۇگىندە سپورتتىق بابىنا ەنىپ كەلەدى. جاڭا ءارى قيىن كومبيناتسيالار قوستى. جوعارى ورىنداردان كورىنۋگە بولاتىنىن باكۋدە ءتۇسىنىپ، وزىنە دەگەن سەنىمىن ارتتىرىپ كەلەدى. يتالياداعى كۋبوكتىك كەزەڭدە مۇساباەۆ جاقسى ناتيجە كورسەتەدى دەپ ۇمىتتەنەمىن»، - دەيدى باس باپكەر. 

گيمناست دانيل مۇساباەۆتىڭ ايتۋىنشا، الەم كۋبوگى كەزەڭدەرىندە العاشقى وتىزدىققا ەنگەن سپورتشىلار ۇپاي جينايدى. ال سينحروندى سەكىرۋ وليمپيادا باعدارلاماسىنا ەنبەگەندىكتەن، رەيتينگىلىك ۇپايلار قوسىلمايدى.

«باكۋدەگى الەم كۋبوگى كەزەڭىن مەن ءۇشىن ءساتتى ءوتتى دەسەم بولادى. ويتكەنى، سينحروندى سەكىرۋدە پيرمامماد اليەۆ ەكەۋمىز قولا جۇلدەگەر اتانساق، جەكەلەي سىندا 15-ءشى ساتىعا تۇراقتادىم. كۋبوكتىك كەزەڭدەردە العاشقى وتىزدىققا ەنگەن گيمناستارعا رەيتينگىلىك ۇپاي بەرىلەدى. الەم چەمپيوناتى ارقىلى وليمپياداعا جولداما العان ءتورت سپورتشىنى ەسەپكە الماساق، ۇپاي سانىنىڭ جوعارى ەكەنىن انىق. الەم كۋبوگىنىڭ بەس كەزەڭى اياقتالعان سوڭ، رەيتينگ بويىنشا ليتسەزيالار ۇلەستىرىلەدى. ەندى يتالياداعى الەم كۋبوگى قارساڭىندا گرۋزيادا دايىندالامىز. مەنىڭشە، توكيو ويىندارىنا جولداما الاتىن جاقسى مۇمكىندىك بار. تەك قاتەسىز جۇمىس ىستەپ، العا باسۋ قاجەت»، - دەيدى دانيل. 

يتالياداعى كۋبوكتىك كەزەڭ ءساۋىر ايىنا جوسپارلانعان. 

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار