ەلىمىزدە مۇنداي ماقساتتى العا قويىپ, ناقتى ناتيجەلەرگە قول جەتكىزىپ جۇرگەن الەۋمەتتىك قۇرىلىمدار جوق ەمەس. سولاردىڭ ءبىرى, ءتىپتى بىرەگەيى «التىن وردا» اۆتورلىق ديزاين ءۇيىنىڭ نەگىزىن قالاۋشى, ءارى ونىڭ قازىرگى جەتەكشىسى ىرزا تۇرسىنزادا بولىپ وتىر. ول «انالار اماناتى» اتتى الەۋمەتتىك باعدارلامانىڭ بولىنبەس ءبىر بولشەگى «كورپە FEST» جوباسىن جۇزەگە اسىرۋ ءىسىنىڭ بەل ورتاسىندا كەلەدى.
– ءبىزدىڭ باستى ماقساتىمىز – كوپ بالالى جانە تۇرمىسى تومەن, سونىڭ ىشىندە ءداستۇرلى ەمەس ءدىني اعىمداردىڭ جەتەگىندە جۇرگەن ايەلدەردىڭ كاسىپ اشۋىنا قولداۋ كورسەتىپ, ءتيىستى باعىت-باعدار بەرۋ. كورپە-جاستىق تىگۋ ىسىندە ايەل زاتىنىڭ يكەمى مەن مۇمكىندىگى جوعارى ەكەنى كۇندەلىكتى تۇرمىستا الدەقاشان دالەلدەنگەن. ولاردىڭ بويىندا ەجەلدەن قالىپتاسقان وسى ءۇردىستىڭ شوعىن ۇرلەي بىلسە, ونىڭ ناتيجەسى كوپ كەشىكپەي كەلەتىنىنە ءباس تىگۋگە بولادى. سوندىقتان ءبىز «انالار اماناتى»
جوباسىنا سايكەس ەل وڭىرلەرىنە شىعىپ, تىگىن جانە قولدانبالى ونەر تۇرلەرى بويىنشا تەگىن ساباقتار مەن سەمينارلار جانە شەبەرلىك ساباقتارى مەن كورمەلەر وتكىزۋدى قاجەت دەپ تاپتىق. ءارى وسى باعدارلاما اياسىندا موتيۆاتسيالىق دەرەكتى فيلمدەر كورسەتىلەدى. بۇل باعىتتاعى كەيىنگى ءىس-شارامىز اقتوبە قالاسىندا وتكىزىلدى, – دەدى بۇل جونىندە جوبا جەتەكشىسى.
كەلەسى كەزەكتە ول بۇدان ءتورت جىل بۇرىن «التىن وردا» جشس جانە «ادامداردىڭ ەجەلگى جەتىستىكتەرى» قوعامدىق قورىنىڭ باستاماسىنا سايكەس قولعا الىنعان جوبا ەڭبەك جانە حالىقتى الەۋمەتتىك قورعاۋ مينيسترلىگى مەن بىرقاتار وبلىستىق اكىمدىكتەر تاراپىنان قولداۋ تاپقانىنا توقتالىپ ءوتتى. اتاپ ايتقاندا, كوپ بالالى انالارعا جانە حالىقتىڭ الەۋمەتتىك وسال توپتارىنداعى ايەلدەرگە ارنالعان اقىسىز شەبەرلىك ساباقتارى بۇعان دەيىن نۇر-سۇلتان مەن الماتى قالالارىندا جانە ماڭعىستاۋ, اتىراۋ, قاراعاندى وبلىستارىندا وتكىزىلگەن.
– ءوزىڭىز باستاعان وتاندىق قولونەر شەبەرلەرىنىڭ جوعارىدا اتالعان وڭىرلەردەن كەيىنگى ساپارى اقتوبەگە ءتۇسۋىنىڭ سىرى نەدە؟ – دەدىك ءبىز ىرزا تۇرسىنزاداعا.
– وڭىردەگى قىز-كەلىنشەكتەر مەن انالار ءبىزدىڭ جوبامىزعا الەۋمەتتىك جەلى ارقىلى قانىق ەكەنىن جەتكىزىپ ەدى. اقتوبەدە «كورپە FEST» مەگا فەستيۆالىن وتكىزۋ جونىندەگى وي وسىدان تۋدى. جالپى, بۇعان دەيىن دە اقتوبەگە جولىم تۇسكەن كەزدە مۇنداعى زامانداس قۇربىلارىمىز بەن سىڭلىلەرىمىزدىڭ قولونەرگە دەگەن قىزىعۋشىلىعى جوعارى ەكەنىن بايقاعانمىن. ونىڭ ۇستىنە وبلىس باسشىسى وڭداسىن ورازالين مەگا فەستيۆالدى وتكىزۋ ىسىنە قولداۋ كورسەتۋگە ءازىر ەكەنىن ءبىلدىردى, – دەپ ىرزا حانىم ىرزالىق تانىتا جاۋاپ قايتاردى.
ءۇش كۇنگە سوزىلعان «كورپە FEST» مەگا فەستيۆالى كەزىندە 300-دەن استام اقتوبەلىك ايەلدەر تىگىن ونەرىنىڭ قىر-سىرىن تەگىن ۇيرەنۋگە مۇمكىندىك العانى ايتۋعا تۇرارلىق ءىس, كوڭىل قۋانتارلىق جەتىستىك. سونداي-اق ۇلتتىق قولونەردى قايتا جاڭعىرتۋعا ارنالعان باسقوسۋدىڭ جابىلۋ ءراسىمى كەزىندە وبلىس اكىمدىگى اتىنان 35 كوپ بالالى انا مەن تۇرمىسى تومەن وتباسىنداعى التىن قازىق وكىلدەرىنە 35 تىگىن ماشيناسىنىڭ سىيعا تارتىلۋى دا اتالعان جوبانى قولداۋدىڭ كەلىستى كورىنىسى بولماق.
بۇعان قوسا «التىن وردا» اۆتورلىق ديزاين ءۇيى دە كورپە-جاستىق تىگۋگە يكەمى بار نازىك جانداردى ىنتالاندىرۋدى نازاردان تىس قالدىرمادى. ءسويتىپ ولارعا ۇلتتىق قولونەر تەحنولوگيالارى بويىنشا العاشقى كەزەڭدى اياقتاعانى جونىندەگى سەرتيفيكاتتار تاپسىرىلدى. مىنە, ۇيرەنۋگە تۇراتىن ءۇردىس دەپ وسىنى ايتىڭىز!
اقتوبە
