«ەڭ باستى تالاپ – مەملەكەت باسشىسىنىڭ تاپسىرمالارىن ساپالى جانە ۋاقىتىلى ورىنداۋ. وتكەن جىلدىڭ قورىتىندىسى بويىنشا وبلىس جاقسى الەۋمەتتىك-ەكونوميكالىق كورسەتكىشتەرگە قول جەتكىزدى. وسى قارقىندى تومەندەتپەۋ كەرەك», دەدى اكىم.
قازىرگى كەزدە وبلىستىڭ الەۋەتى ايتارلىقتاي جوعارى. الايدا, اعىمداعى جىلدىڭ ءبىرىنشى ايىندا ونەركاسىپ, قايتا وڭدەۋ, ينۆەستيتسيا تارتۋ سياقتى سالالاردا تومەندەۋگە جول بەرىلگەن. يگەرىلگەن قاراجاتتىڭ كولەمى بويىنشا ايتارلىقتاي ارتتا قالۋى بايقالعان. بەردىبەك ساپارباەۆ وسى باعىتتا بيۋدجەتتىك باعدارلامالاردىڭ ورىندالۋ بويىنشا جۇمىستاردى كۇشەيتۋ قاجەتتىگىن جانە ءبىرىنشى توقساننىڭ قورىتىندىسى وتكەن جىلدىڭ ناتيجەسىنەن كەم بولماۋى ءتيىس ەكەنىن باسا ايتتى.
جامبىل وبلىسىندا جۇمىسسىزدىق دەڭگەيى 4,8 پايىزدى قۇراسا, ول رەسپۋبليكالىق ورتاشا ءماننىڭ دەڭگەيىندە. بىراق بۇل رەتتە وبلىستا ءوزىن-ءوزى جۇمىسپەن قامتىماعانداردىڭ سانى ءالى دە كوپ. سوندىقتان اكىم «قازفوسفات» جانە «ەۆروحيم» سياقتى جەرگىلىكتى ونەركاسىپتىڭ الىپتارىمەن تىعىز جۇمىس ىستەۋ, وڭىرگە ءىرى وتاندىق جانە شەتەلدىك ينۆەستورلاردى تارتۋ قاجەتتىگىن دە ەسكەرتتى. سونىمەن قاتار, وبلىس اۋماعى ارقىلى ءۇش ءىرى گاز قۇبىرى وتەدى دەسەك, بۇل وڭىردەگى ەلدى مەكەندەردى گازداندارۋعا زور مۇمكىندىك بەرەدى. جيىندا وسى ماسەلەلەردى ايتا كەلە, بەردىبەك ساپارباەۆ «امانگەلدى» گاز كەن ورنىنىڭ دا قارقىندىلىعىن ارتتىرۋ ءۇشىن سالالىق مينيسترلىكتىڭ كومەگىمەن اۋقىمدى گەولوگيالىق بارلاۋ جۇمىستارىن جۇرگىزۋ قاجەتتىگىن جەتكىزدى. سونداي-اق, اكىم سۋارمالى جەرلەردىڭ كولەمىن ۇلعايتۋ بويىنشا مەملەكەتتىك قولداۋدىڭ از ەمەس ەكەنىن, سونى كەڭىنەن پايدالانۋ جانە ولاردى پايدالانۋ تيىمدىلىگىن ارتتىرۋ قاجەتتىگىن دە ايتتى. باسقوسۋ بارىسىندا ەگىستىكتەردى ءارتاراپتاندىرۋ, رەنتابەلدى داقىلدارعا, مايلى داقىلدارعا كوبىرەك كوڭىل ءبولۋ, جەرگىلىكتى قانت زاۋىتتارىن ودان ءارى جۇكتەمەسىن ارتتىرۋ ءۇشىن قانت قىزىلشاسىنىڭ كولەمىن ۇلعايتۋ ماڭىزدىلىعى دا ايتىلدى. كۇن تارتىبىندە كوتەرىلگەن ماسەلەلەردىڭ ءبىرى – كوكتەمگى ەگىس جۇمىستارىنا دايىندىق, اۋىل شارۋاشىلىعى تەحنيكاسىن ۋاقىتىندا دايىنداۋ, جوعارى ساپالى تۇقىم ساتىپ الۋ جانە وتىرعىزۋ بولدى.
جيىندا بەردىبەك ساپارباەۆ وڭىردە باستاۋ العان اۋىل تۇرعىندارىنىڭ تۇرمىستىق تابىسىن ارتتىرۋ پيلوتتىق جوباسىنىڭ مىندەتتى تۇردە ءوز جالعاسىن تاباتىندىعىن ايتىپ, جاۋاپتى باسشىلارعا ناقتى تاپسىرمالار جۇكتەدى. «اۋىل تۇرعىندارى جىل بويى جۇمىسپەن قامتىلىپ, ەگىن شارۋاشىلىعىمەن دە, مال شارۋاشىلىعىمەن دە اينالىسۋى كەرەك. بۇل ورايدا پيلوتتىق جوباعا بولىنگەن 7,2 ميلليارد تەڭگە تولىق كولەمدە يگەرىلۋى ءتيىس. ءبىز جوبانىڭ ومىرشەڭدىگىن كورسەتۋىمىز كەرەك, بۇل الداعى ۋاقىتتا قارجىلاندىرۋ كولەمىن ۇلعايتۋعا جانە كوپ ادامداردىڭ ماتەريالدىق جاعدايىن جاقسارتۋعا مۇمكىندىك بەرەدى», دەپ اتاپ ءوتتى اكىم. سونداي-اق, الەۋمەتتىك-مادەني نىسانداردىڭ قۇرىلىسى ءتيىستى دەڭگەيدە جۇرگىزىلۋدە دەسەك, بۇل ءۇردىس ءوز دەڭگەيىندە جالعاساتىن بولادى. ءبىلىم بەرۋ سالاسىندا اپاتتى جانە ءۇش اۋىسىمدى مەكتەپتەردى جويۋ ءۇشىن 17 مەكتەپ اشۋ قاجەت.
سونىمەن قاتار تاۋار اينالىمىن ۇلعايتۋ ءۇشىن وبلىستىڭ ترانزيتتىك الەۋەتىن كەڭىنەن پايدالانعان ءجون ەكەنىن, بالامالى ەنەرگەتيكا سالاسىندا 6 ستانتسيانىڭ قۇرىلىسىن اياقتاۋ جانە كۇن جانە جەل ەلەكتر ستانتسيالارىنان الىناتىن ەلەكتر ەنەرگياسىنىڭ جيىنتىق قۋاتىن 400 مۆت-قا دەيىن جەتكىزۋ كوزدەلىپ وتىرعانىن دا جەتكىزدى. جيىندا جامبىلدىقتاردىڭ تابىس دەڭگەيىن ارتتىرۋ, سالىق سالۋ بازاسىن ۇلعايتۋ, مىندەتتى مەديتسينالىق ساقتاندىرۋ جۇيەسىن ەنگىزۋ, جالاقى بويىنشا بەرەشەكتەردى جويۋ, مەديتسينالىق قىزمەت ساپاسىن ارتتىرۋ, دەنساۋلىق ساقتاۋداعى بيۋروكراتيا دەڭگەيىن تومەندەتۋ, جاستاردى رۋحاني-ادامگەرشىلىككە تاربيەلەۋ, اتا-انالار مەن مەكتەپ اراسىنداعى بايلانىستى نىعايتۋ سياقتى وزەكتى ماسەلەلەر دە جان-جاقتى سارالاندى. كەڭەستى قورىتىندىلاي كەلە بەردىبەك ساپارباەۆ جاۋاپتى مەملەكەتتىك ورگاندار قورداي اۋدانىندا بولعان وقيعالاردان قورىتىندى شىعارۋ كەرەكتىگىن اتاپ ءوتتى. «بۇل جاعداي بىزگە ساباق بولۋى كەرەك. وسى سەكىلدى قايعىلى وقيعالار الداعى ۋاقىتتا قايتالانباس ءۇشىن ءتيىستى شەشىم شىعارا ءبىلۋىمىز قاجەت. مەملەكەتتىك ورگاندار, جۇرتشىلىق پەن ينتەلليگەنتسيا ءوز كۇش-جىگەرىن بىرىكتىرىپ, قوعامداعى بىرلىك پەن كەلىسىمدى ساقتاۋ بويىنشا جۇمىس جۇرگىزۋى ءتيىس», دەپ اتاپ ءوتتى اكىم. بۇدان كەيىن بەردىبەك ساپارباەۆ اكىمدەردىڭ ەسەپتەرىنە جاپپاي مەملەكەتتىك قىزمەتشىلەردىڭ ەمەس, قاراپايىم حالىقتىڭ قاتىسۋى كەرەكتىگىن ايتتى.
جامبىل وبلىسى
