قازاقستان رەسپۋبليكاسىنىڭ پرەزيدەنتى ن.ءا.نازارباەۆتىڭ اۋداندىق ماڭىزداعى قالالار, سەلولىق وكرۋگتەر, سەلولىق وكرۋگتەردىڭ قۇرامىنا كىرمەيتىن پوسەلكەلەر مەن سەلولار اكىمدەرى سايلاۋىنىڭ قورىتىندىسى بويىنشا ۇندەۋى
قۇرمەتتى قازاقستاندىقتار!
قىمباتتى وتانداستار!
مەن سىزدەردىڭ ءبارىڭىزدى ەل ومىرىندەگى ماڭىزدى قوعامدىق-ساياسي وقيعامەن قۇتتىقتايمىن!
2013 جىلعى تامىزدىڭ 5-ىنەن 9-نا دەيىن تاۋەلسىز قازاقستان تاريحىندا العاش رەت جەرگىلىكتى بيلىك ورگاندارى باسشىلارىنىڭ سايلاۋى تابىستى ءوتتى. بالامالى نەگىزدە ءماسليحاتتار اۋداندىق ماڭىزداعى قالالاردىڭ, سەلولىق وكرۋگتەردىڭ, سەلولىق وكرۋگ قۇرامىنا كىرمەيتىن پوسەلكەلەر مەن سەلولاردىڭ اكىمدەرىن سايلادى. بۇل ەلدەگى بۇكىل اكىمدەردىڭ 91 %-دان استامى. بارلىعى 7 ميلليون 632 مىڭ قازاقستاندىق تۇراتىن اۋداندىق ماڭىزداعى قالالاردىڭ, سەلولىق وكرۋگتەردىڭ, پوسەلكەلەر مەن سەلولاردىڭ 2454 اكىمى سايلاندى.
وزدەرىڭىز بىلەتىندەي, وسى سايلاۋدى وتكىزۋ تۋرالى باستامانى مەن «قازاقستان-2050» ستراتەگياسى تۋرالى حالىققا جولداۋىمدا كوتەردىم. سايلاۋ جاس قازاقستاندىق دەموكراتيانىڭ ماڭىزدى جەتىستىگىنە اينالدى. ولارعا شامامەن 7 مىڭداي كانديدات قاتىستى. ەگەر بۇرىن اكىمدەر تاعايىندالسا, بۇگىندە ولار العاش رەت سايلاندى. جانە ونى قازاقستاندىق سايلاۋشىلار وزدەرىنىڭ اتتارىنان ءىس-قيمىل جاساۋعا جوعارى سەنىم كورسەتكەن حالىق وكىلدەرى – ءماسليحاتتار دەپۋتاتتارى زاڭدى نەگىزدە سانالى جانە جاۋاپكەرشىلىكپەن جۇزەگە اسىردى.
وتكەن سايلاۋ بارىسىنا بەدەلدى جۇرتشىلىق وكىلدەرى باقىلاۋ جاسادى. قوعام قايراتكەرلەرىنىڭ باستاماسى بويىنشا سايلاۋدى قاداعالاۋ جونىندەگى رەسپۋبليكالىق قوعامدىق كوميسسيا قۇرىلىپ, تابىستى جۇمىس جۇرگىزدى. باقىلاۋشىلار ەلەكتورالدىق ناۋقان مەن سايلاۋ بارىسىندا ايتارلىقتاي بۇرمالاۋشىلىقتاردىڭ تىركەلمەگەنىن اتاپ كورسەتتى. سايلاۋ اشىق, ءمولدىر بولدى جانە قولدانىستاعى زاڭنامالار نورمالارى مەن قازىرگى زامانعى دەموكراتيالىق تاجىريبەگە تولىقتاي سايكەستى.
جەرگىلىكتى اكىمدەردى سايلاۋدىڭ «قازاقستان-2050» ستراتەگياسىن جۇزەگە اسىرۋدى باستاۋدىڭ ءدال ءبىرىنشى جىلىندا ءوتۋىنىڭ دە نىشاندىق ءمانى بار. بۇل ءبىزدىڭ XXI عاسىرعا ارنالعان باستى ستراتەگيالىق جوسپارلارىمىزدا بەلگىلەنگەن قازاقستان ءۇشىن تاعدىرشەشتى ماقساتتار مەن مىندەتتەردى ساتىلاپ جۇزەگە اسىرۋعا ءبىزدىڭ تەرەڭ بەرىلگەندىگىمىزدى بەينەلەيدى.
قۇرمەتتى قازاقستاندىقتار!
جەرگىلىكتى ءوزىن-ءوزى باسقارۋ – قازاقستان رەسپۋبليكاسى كونستيتۋتسيالىق قۇرىلىمىنىڭ بازالىق نەگىزدەرىنىڭ ءبىرى. ونىڭ ودان ءارى ءتيىمدى قالىپتاسۋىنداعى تاياۋداعى جانە ۇزاق مەرزىمدى مىندەتتەر مەن بەكىتكەن قازاقستان رەسپۋبليكاسىندا جەرگىلىكتى ءوزىن-ءوزى باسقارۋدى دامىتۋ تۇجىرىمداماسىندا بەلگىلەنگەن. ولاردى بىرىزدىلىكپەن شەشۋ تومەنگى دەڭگەيدەگى باسقارۋ جۇيەسىنىڭ ساپاسىن ايتارلىقتاي ارتتىرۋعا جاعداي جاسايدى. وسى تۇجىرىمدامانى جۇزەگە اسىرۋ ءۇشىن دە سايلاۋدى تابىستى وتكىزۋ قامتاماسىز ەتىلدى.
مەنىڭ بۇدان بىلاي ازاماتتارمەن بەتپە-بەت جۇمىس ىستەيتىن جانە پروبلەمالاردى جەرگىلىكتى جەرلەردە تىكەلەي شەشەتىن بارلىق اكىمدەردىڭ سايلانبالىلىقپەن قامتىلعانىن ايرىقشا اتاپ وتكىم كەلەدى. بۇل جەرگىلىكتى اكىمدەر قىزمەتىنە ازاماتتىق باقىلاۋدى كۇشەيتۋ ءۇشىن مۇمكىندىكتەردى ۇلعايتادى, سونداي-اق ءاربىر جەكەلەگەن اۋماقتىق قوعامداستىقتاعى احۋالعا ءماسليحاتتار مەن بارلىق ازاماتتاردىڭ تىكەلەي ىقپالىنىڭ ارتۋىنا جاعداي جاسايدى. وسىلايشا, ساياسي جۇيەنى جاڭعىرتۋ جولىندا, قازاقستاندىقتاردىڭ جەرگىلىكتى ءوزىن-ءوزى باسقارۋعا بەلسەندى قاتىسۋ تاجىريبەسى مەن داستۇرلەرىن كەڭەيتۋدە تاعى ءبىر ماڭىزدى قادام جاسالدى.
جاڭا اكىمدەردىڭ مەنىڭ تاپسىرمام بويىنشا ءتيىمدى جۇمىس ىستەۋى ءۇشىن بيىلعى جىلى جەرگىلىكتى بيلىك ورگاندارىنىڭ مۇمكىندىكتەرى ايتارلىقتاي كۇشەيتىلدى. بۇگىندە ولار ءتيىمدى جۇمىس جۇرگىزۋ ءۇشىن قاجەتتى بارلىق ماتەريالدىق-قارجىلىق جانە كادرلىق رەسۋرستارعا يە. اتاپ ايتقاندا, جەرگىلىكتى اكىمدەرگە الەۋمەتتىك سالادا قوسىمشا وكىلەتتىكتەر بەرىلدى. بيىلعى جىلى كۇشىنە ەنگەن جاڭارتىلعان زاڭناما بويىنشا ولارعا زاڭ جۇزىندە 67 فۋنكتسيا بەكىتىلىپ بەرىلدى, ونىڭ ءوزى ءىس جۇزىندە جەرگىلىكتى ماڭىزداعى بارلىق كوكەيكەستى ماسەلەلەردى دەربەس جانە جاۋاپكەرشىلىكپەن شەشۋگە مۇمكىندىك بەرەدى. بىراق بۇل سونىمەن ءبىر مەزگىلدە اكىمدەردىڭ وتانداستارى مەن مەملەكەت الدىنداعى اسا زور جاۋاپكەرشىلىگى دە!
ءار اكىم ونى تولىق سەزىنىپ, ءوز مىندەتتەرىن ابىرويمەن جانە لايىقتى اتقارىپ, ادال دا ش
