بۇل جوبانى «كامەدا» قوعامدىق قورى ىسكە اسىردى. ورتالىقتىڭ اۋماعى 300 شارشى مەتردى قۇرايدى. وندا ترەنينگ زالى, شەبەرلىك-كلاسستارعا ارنالعان بولمە, ۇەۇ وكىلدەرى ءۇشىن جۇمىس كابينەتتەرى بار. قوعامدىق بىرلەستىكتەر ءۇشىن وتەۋسىز نەگىزدە الەۋمەتتىك ءىس-شارالار وتكىزۋگە زال ۇسىنىلادى. ورتالىقتىڭ باستى مىندەتى – ازاماتتىق باستامالاردى, الەۋمەتتىك باعدارلانعان كوممەرتسيالىق ەمەس ۇيىمدار جۇمىسىن قولداۋ. مەكەمەدە قوعامدىق ۇيىمداردىڭ وكىلدەرىنە ادىستەمەلىك, كونسۋلتاتسيالىق كومەك كورسەتىلەتىن بولادى.
ورتالىق ەلوردالىق ۇەۇ وكىلدەرى تاراپىنان تۇسەتىن وتىنىمدەر سانىن ارتتىرۋدى كوزدەيدى. سونداي-اق مەكەمە ۇكىمەتتىك ەمەس ۇيىمدارعا جوبالاردى قارجىلاندىرۋ مەن راسىمدەۋگە قولداۋ كورسەتۋ ءۇشىن گرانتتار مەن مەملەكەتتىك الەۋمەتتىك تاپسىرىستى الۋعا جاردەمدەسەدى. ورتالىقتى ارالاۋ كەزىندە باقتيار ماكەن ۇكىمەتتىك ەمەس ۇيىمداردى دامىتۋ ءۇشىن جاعداي جاساۋدىڭ ماڭىزدى ەكەندىگىن اتاپ ءوتتى.
«ورتالىق ۇكىمەتتىك ەمەس ۇيىمداردىڭ دامۋى مەن نىعايۋىنا ىقپال ەتەدى. بۇل ءوز كەزەگىندە, ەلوردا تۇرعىندارىن قوعامنىڭ الەۋمەتتىك ماڭىزدى ماسەلەلەرىنە بەيجاي قاراماۋىنا الىپ كەلەدى. قالا اكىمىنىڭ تاپسىرماسى بويىنشا جىل سايىن ءبىز وزەكتى جوبالاردىڭ سانى مەن مەملەكەتتىك الەۋمەتتىك تاپسىرىستى قارجىلاندىرۋ كولەمىن ۇلعايتاتىن بولامىز» دەدى اكىم ورىنباسارى.
