وتكەن جىلدىڭ جەلتوقسانىندا ەلىمىزدىڭ بارلىق وڭىرىنەن جينالعان جاس شاقىرىلىم ساربازدارى 45 كۇندىك ارنايى دايىندىقتان ءوتىپ, وتان قورعاۋشىلار قاتارىن تولىقتىرىپ وتىر.
جاۋىنگەرلەردى قۇتتىقتاۋعا استانا اكىمىنىڭ ورىنباسارى, قۇقىقتىق ءتارتىپ اسكەرىنىڭ ارداگەرلەرى مەن ساربازداردىڭ 2800-دەن اسا اتا-انا, جاقىندارى كەلدى.
ۇلتتىق ۇلاننىڭ جەدەل قۇراماسى ەلوردا تۇرعىندارى مەن قوناقتارىنىڭ سەنىمدى قالقانىنا اينالدى. اسكەري ءبولىمنىڭ جەكە قۇرامى كۇندەلىكتى قىزمەتىمەن باس قالامىزدىڭ تىنىشتىعى مەن تۇراقتىلىعىن قامتاماسىز ەتىپ كەلەدى, - دەدى نۇر-سۇلتان قالاسى اكىمنىڭ ورىنباسارى نۇرلان نۇركەنوۆ.
اسكەر ارداگەرى زاپاستاعى گەنەرال-مايور داۋلەت سالحانوۆ ۇلاندىقتاردى ماڭىزدى قاداممەن قۇتتىقتاسا, قۇراما كومانديرى پولكوۆنيك ساكەنتاي شەكاربەكوۆ جاس ساربازدارعا قىزمەتتە قىراعى ءارى جاۋاپتى بولۋ كەرەكتىگىن باسا ايتتى. ال بارشا اتا-انالار اتىنان قوستاناي وبلىسىنان كەلگەن قاتارداعى دياس جاناحمەتوۆتىڭ اناسى داناگۇل عالىمجانقىزى اقجولتاي تىلەگىن ارنادى.
- پەرزەنتتەرىمىزدى ەلىمىزدىڭ جۇرەگى سانالاتىن اسەم قالا تورىنەن كورگەنىمىزگە وتە قۋانىشتىمىز. كەشە عانا شاڭىراقتان شىعارىپ سالعان بوزبالالار از عانا ۋاقىت ىشىندە سىمداي تارتىلىپ, ساپ تۇزەپ, ەل قورعاۋعا بەل بۋىنىپ تۇر. جاۋاپكەرشىلىك پەن سەنىمدىلىك كورىپ تۇرمىز جانارلارىنان. ۇلىمنىڭ العا شىعىپ, وتان الدىنداعى بورىشىن وتەۋگە بەرگەن سەرتىن ەستىگەندەگى سەزىمىمدى سوزبەن ايتىپ جەتكىزە المايمىن. قۋانىش پەن تولقۋ ارپالاسىپ كەتكەندەي. ازاماتتارىمىزدىڭ قالاي ەل قورعايتىنىنا ءبىز, ياعني انالار دا جاۋاپتىمىز! – دەيدى ساربازدىڭ اناسى.
انت قابىلداعان ساربازدار اتىنان ورال قالاسىنان كەلگەن قاتارداعى تالانت جۇماگەلدى ءسوز سويلەپ, كوپشىلىك الدىندا بەرگەن انتتارىنا ادال بولاتىندارىن جەتكىزدى.
زاڭدى تۇردە وتان قورعاۋشى اتانعان ولار ەندى جاۋىنگەرلىك قىزمەتتىڭ قىر-سىرىن مەڭگەرىپ, الەمدىك, حالىقارالىق, رەسپۋبليكالىق ماڭىزى بار ساياسي-قوعامدىق, مادەني-كوپشىلىك, سپورتتىق شارالار مەن رەسميك كەزدەسۋلەر كەزىندە قاۋىپسىزدىكتى قامتاماسىز ەتىپ, كۇن سايىن قالا تىنىشتىعىن قاداعالايتىن بولادى.
