جۋىردا پارلامەنت ءماجىلىسىنىڭ دەپۋتاتتارى دارحان مىڭباي مەن نۇرجان التاەۆپەن كەزدەسكەن تۇرعىندار تالاپ-تىلەكتەرىن اشىنا ايتتى.
«اكىمدەر جارتى جىل سايىن اۋىسادى. جاڭا كەلگەندەرى قۇرعاق ۋادەمەن قارىق قىلىپ تاستايدى. وسىندا تۇرىپ كەلە جاتقانىمىزعا 20 جىلدان استى. ءالى كوشەدە بەلۋاردان لاي كەشىپ ءجۇرمىز. اۋىلداعى جاعدايدى بۇكپەسىز ايتار بولسام, تۇرعىندار اۋىز سۋدى اۋلادان كەزەككە تۇرىپ, تاسىپ ءىشىپ, تاماقتى باللونداعى گازعا جاساپ ءجۇر. ال قىستىگۇنى جىلىتقىشتى قوسۋعا ءماجبۇر. وسىلايشا, ءبىر پاتەردە ءبىر بولمە عانا جىلىپ, تۇرعىندارى سىرتقى كيىممەن بۇرسەڭدەپ ءجۇر», دەيدى التىنشاش ەسەنگەلديەۆا.
انىعىندا, اباي اۋدانىنا قاراستى بۇل ەلدى مەكەننىڭ قالا قاتارىنا قوسىلعانىنا 4 جىل بولسا دا ينفراقۇرىلىم جۇيەسى ءالى رەتتەلمەگەن.
تۇرعىندارمەن تەك دەپۋتاتتار كەلگەندە عانا كەزدەسكەن اۋدان اكىمى عالىمجان تولەپوۆ جاڭاتالاپقا اۋىز سۋ تارتۋ ءۇشىن بيۋدجەتتەن 2,5 ملرد تەڭگە بولىنگەنىن جەتكىزدى. سونداي-اق جىل سوڭىنا دەيىن اۋىز سۋ ءار ۇيگە تارتىلىپ, ماسەلە وڭدى شەشىم تاباتىنىنا سەندىرمەك بولدى.
ءۇشىنشى مەگاپوليسكە قوسىلعان ەلدى مەكەندە كارىز جۇيەسى قاراستىرىلماعاندىقتان اۋىلدىڭ ىشكى اتموسفەراسى دا بۇزىلا باستاعان. وركەنيەتتەن الشاقتاپ قالعان ەلدى مەكەنگە كارىز جۇيەسى تارتىلمايىنشا جاڭاتالاپ كۇلىمسى يىستەن ارىلا قويماسى انىق.
ەستەرىڭىزگە سالار بولساق, شىمكەنت قالاسىنىڭ اكىمى ەرلان ايتاحانوۆ بىلتىر كۇز ايىندا قالاعا قوسىلعان ەلدى مەكەندەردى ارالاپ, «قالانىڭ شەتكى اۋداندارىن شىمكەنتتىڭ ورتالىعىنداعىداي ەتۋگە قىزمەت ەتەمىن», دەگەن ەدى. ءتىپتى رەسپۋبليكالىق, جەرگىلىكتى بيۋدجەتتەن بولىنگەن قارجىنىڭ قوماقتى بولىگىن وسى ەلدى مەكەندەردەگى اۋىز سۋ, اۆتوجول, جارىق, كوگىلدىر وتىن, قوعامدىق كولىك, كارىز جۇيەسىن رەتتەۋگە جۇمسايتىنىن حابارلاعان بولاتىن.
«وزدەرىڭىزگە ءمالىم, شىمكەنت قالاسىنىڭ الەۋمەتتىك-ەكونوميكالىق دامۋىنا مەملەكەت باسشىسى قاسىم-جومارت توقاەۆتىڭ ءوزى ايرىقشا نازار اۋدارىپ وتىر. حالىقتىڭ تۇرمىسىن جاقسارتۋ بويىنشا ناقتى تاپسىرمالار بەردى. مەنىڭ باستى ماقساتىم – شالعايدا ورنالاسقان ەلدىمەكەندەردىڭ تۇرعىندارىنا قولايلى جاعداي جاساۋ», دەگەن-ءدى ءۇشىنشى مەگاپوليس باسشىسى.
الايدا, ازىرگە جارىعى جايناپ, جولى داڭعىراپ, قوعامدىق كولىگى ءۇزىلىسسىز قاتىناپ جاتقان ەلدى مەكەن كورمەدىك. سول باياعى ءجۇنجىپ وتىرعان كونبىس قارا حالىق. مىڭ سان شارۋاسى شەشىلمەي قالاعا قوسىلعان جۇپىنى اۋىلدار جەتەرلىك.
قالانىڭ شالعاي ەلدى مەكەنى تۇگىلى شاھاردىڭ قاق ورتاسىنداعى «تۇران» شاعىن اۋدانىندا دا الەۋمەتتىك تۇيتكىلدى ماسەلە شاش-ەتەكتەن...
نۇرشات توكەن,
«Egemen Qazaqstan»
شىمكەنت
