قاراعاندىدا قالا كوشەلەرىن اۋىستىرۋعا بايلانىستى ديسكۋسسيا بولدى. ۇلت ماسەلەسىن الاڭعا, كوشەگە الىپ شىعىپ, تالقىلاۋعا بولمايدى! تاريحتىڭ تاجىريبەسى وسىنداي. بىراق ءبىزدىڭ بيلىك مۇنى دا زاڭعا كىرگىزىپ, وزىنشە شەكتەپ قويعان ەكەن, ەرىكسىز بارىپ, پىكىرتالاسقا قاتىسىپ, ءوز ويىمىزدى ايتتىق؟!
كەڭەس وكىمەتى 70 جىل سايران سالىپ, كەلمەسكە كەتكەلى قاشان؟! ونىڭ تۇبىنە ءبىز جەتكەن جوقپىز, تۇيىققا تىرەلىپ, بارار جەر, باسار تاۋى قالماي, ءبىر-اق كۇندە سەرەيىپ, ءوزى قۇلاپ ءتۇستى! مەن ءبىر نارسەگە اڭ-تاڭ بولدىم, سول كەڭەس وكىمەتى قۇلاعاندا كوشەگە بۇل قالاي بولدى دەپ, بىردە-ءبىر كوممۋنيست شىقپادى؟! قايتا, ونىڭ قۇلاعانىنا وزدەرى ءماز بولىپ, قۋانىپ, قازىناسىن پىشاق ۇستىنەن ءبولىپ الىپ, ميلليونەر-وليگارح بولىپ شىعا كەلدى. پارادوكس!
ءبىر قوعامدىق-ەكونوميكالىق فورماتسيانىڭ ورنىنا وعان مۇلدە كەراعار ەكىنشى فورماتسيا كەلدى. ء«ولىارادا ءومىر سۇرمە, وكپەڭ وشەدى» دەيدى قىتايلار. ءبىز سول ءولىارادا ءومىر ءسۇرىپ جاتىرمىز. بۇرىن يمپەرياعا بودان بولعان, مەملەكەت قۇرۋشى ۇلت جوعىن تۇگەندەي الماي جاتىر, سول يمپەريانىڭ قىزىعىن كورگەن ۇلىستار وعان جاقتىرقاپ, جاقتىرماي قاراپ وتىر؟! مىنە, بۇگىنگى داۋدىڭ تامىرى وسىندا جاتىر.
«لەنين كوشەسىن نەگە اۋىستىرادى؟!», دەيدى ولار. لەنيندى تارك قىلعان ءبىز ەمەس – رەسەي عوي. لەنينگراد – سانكت-پەتەربۋرگ بولعالى قاشان؟! بۇلار سول كەزدە قايدا قالعان؟! رەسەيدە سول لەنيننەن نە قالدى؟! رەسەي لەنين ورىس حالقىن ءيتتىڭ ەتىنەن دە جەك كورگەن ەكەن دەپ, نەبىر تاريحي قۇجاتتاردى جالعاننىڭ جارىعىنا شىعارىپ جاتىر عوي؟! وزگە ەل تۇگىلى, ءوز حالقىن جەك كورگەن لەنيندى تاريح قويناۋىنا جىبەرىپ, لەنين كوشەسىن اباي كوشەسى دەپ اتاۋ تۋرالى ەلدىڭ ۇسىنىسى تاريحي, ءادىل ۇسىنىس. قازاقستاندا كوشەسىندە ابايدىڭ اتى اتالمايتىن جالعىز قالا قاراعاندى كورىنەدى...
كريۆوگۋز دەگەن كىم؟ ونى وسى كوشەدە تۇراتىنداردىڭ وزدەرى بىلە مە ەكەن؟! بۇل كوشە سوۆەتتىك-سوتسياليستىك-توتاليتارلىق قوعامنان كورەسىسىن كورىپ, ەگەمەن ەلىنە 100 جىلدان كەيىن ازەر ورالىپ, سول كوشەدە بىزگە قاسقايا قاراپ تۇرعان قاسىم اقىننىڭ اتىمەن اتالۋعا لايىق.
ەل مەن جەردى الاڭعا شىعارىپ, داۋعا اينالدىرۋعا بولمايدى! اتىراۋ-ارقا-الاتاۋ-التايعا دەيىنگى ۇلان-عايىر ايماقتى قىزىل قانىن توگىپ, نايزانىڭ ۇشى, ارۋاقتىڭ پىسىمەن قورعاپ قالعان – قازاق, مەملەكەت قۇرۋشى تيتۋلدى ۇلت! ەل دە سونىكى, جەر دە سونىكى! يمپەريا كەلمەسكە كەتتى! ەندى قايتىپ كەلمەيدى ول!
ءبىز دە اباي مەن شوقان سىندى پۋشكين مەن تولستويدىڭ, دوستوەۆسكي مەن ءپوتانيننىڭ رەسەيىن سۇيەمىز! سۇيگەندە دە ەگىلىپ, ەمىرەنىپ سۇيەمىز!
سوباكەۆيچ پەن چيچيكوۆ, مانيلوۆتار مەن لەنين-ستاليندەردىڭ رەسەيى ەمەس, ارينە... ۇلى رەسەيدى! پروگرەسشىل رەسەيدى! وركەنيەت ورىنە بارا جاتقان رەسەيدى!
سەرىك اقسۇڭقار ۇلى,
قازاقستاننىڭ ەڭبەك سىڭىرگەن قايراتكەرى
