ناتيجەسىندە 2019 جىلدىڭ قورىتىندىسىندا قازاقستان ارقىلى تاسىمالدانعان ترانزيتتىك جۇك كولەمى 19,4 ملن تونناعا جەتتى. ونىڭ ىشىندە تەمىر جول كولىگى ارقىلى ترانزيتتىك تاسىمالداۋ كولەمى 17,5 ملن توننانى قۇرادى. كولىكتىڭ بۇل تۇرىمەن ەلىمىز اۋماعى ارقىلى وتەتىن ترانزيتتىك جۇك اعىنىنىڭ نەگىزگى ۇلەسى, ياعني 75,6% نەمەسە 11,5 ملن تونناسى ورتالىق ازيا ەلدەرىنە تيەسىلى. اتاپ ايتساق, ول كورسەتكىشتىڭ 7,1 ملن تونناسى وزبەكستانعا, 2,26 ملن تونناسى قىرعىزستانعا, 1,2 ملن تونناسى تاجىكستانعا, 0,26 ملن تونناسى اۋعانستانعا كەلەدى. رەسەيدىڭ ۇلەسى 2,8% بولسا, ترانزيتتىك جۇكتىڭ 13,8% قىتايعا, 7,1% ەۋروپا وداعى ەلدەرىنە تيەسىلى.
تەمىر جول كولىگى ارقىلى قازاقستان اۋماعىمەن قانداي جۇك تاسىمالدانادى دەگەنگە كەلسەك, 18.5%-پەن ءبىرىنشى ورىندا مۇناي تۇر. ودان كەيىن قارا مەتالدار - 10,7%, حيميكاتتار مەن سودا - 6,8%, حيميالىق جانە مينەرالدىق تىڭايتقىشتار - 2,2%, استىق - 1,7% قۇرايدى. وزگە دە جۇكتەر - 55,6%.
ال اۆتوكولىكپەن 2019 جىلى 1,93 ملن توننا ترانزيتتىك جۇك تاسىمالداندى. جانە ول جۇكتىڭ نەگىزگى باعىتتارى مىنانداي بولدى: قىتايدان ەۋروپا وداعى ەلدەرىنە – 14 مىڭ توننا, ورتالىق ازيا ەلدەرىنە 779 مىڭ توننا, رەسەيگە 61,7 مىڭ توننا جۇك جەتكىزىلدى. ورتالىق ازيا ەلدەرىنەن ەۋروپا وداعىنا 106,5 مىڭ توننا, رەسەيگە 396 مىڭ توننا, قىتايعا 5,4 مىڭ توننا جۇك اپارىلدى. رەسەيدەن ورتالىق ازيا ەلدەرىنە 9,7 مىڭ توننا, ەۋروپا وداعى ەلدەرىنەن ورتالىق ازياعا 567 مىڭ توننا, قىتايعا 2,7 مىڭ توننا ترانزيتتىك جۇك جەتكىزىلدى.
اۆتوكولىكتەر ارقىلى نەگىزىنەن ماشينالار, مەحانيزمدەر, قۇرال-جابدىقتار مەن اپپاراتۋرالار تاسىمالداندى. ونىڭ ىشىندە ەلەكتروندىق جابدىقتار - 20,1%, وسىمدىك ونىمدەرى - 17,3%, حالىق تۇتىناتىن تاۋارلار - 15%, باستاپقى ماتەريالدار, ماتالار, توقىما ماتەريالدارى مەن بۇيىمدار - 11,5% جانە ت.ب. تاۋارلار قۇرادى.
سونداي-اق 2019 جىلدىڭ قورىتىندىسىندا قازاقستان اۋماعى ارقىلى كونتەينەرلەردىڭ ترانزيتتىك تاسىمالىنىڭ جالپى كولەمى 23% ارتىپ, 664 مىڭ كونتەينەرگە جەتتى. ونىڭ ىشىندە قىتاي–ەۋروپا–قىتاي باعىتىنداعى كونتەينەرلەر سانى 11% ارتىپ, 347 مىڭ كونتەينەردى قۇرادى.
وسىلايشا قازاقستان 2019 جىلى ترانزيتتىك تاسىمالداۋلاردان 450 ملرد تەڭگەدەن استام تابىس تاپتى.
