سەناتور ن.وستروۆسكي اتىنداعى مەكتەپ-ليتسەيدە كەزدەسۋ وتكىزدى. مەكتەپ ديرەكتورى كۇلشات مۇقاشەۆا دەپۋتاتقا مەكتەپتىڭ جەتىستىكتەرى تۋرالى ايتىپ, بىرقاتار پروبلەمالىق ماسەلەلەرگە توقتالدى. بۇگىنگى كۇنى 670 وقۋشىعا ەسەپتەلگەن مەكتەپتە 900 بالا وقيدى. دەگەنمەن, بالالاردى نورمادان تىس قابىلداعانى ءۇشىن ديرەكتورعا زاڭ جۇزىندە ايىپپۇل سالىنادى. ديرەكتور وسىعان بايلانىستى زاڭناماعا وزگەرىستەر ەنگىزۋ ماسەلەسىن كوتەردى.
سەناتور ساپارى اۋداندىق ورتالىق اۋرۋحانانىڭ عيماراتىندا جالعاستى. ونىڭ قۇرىلىسى 30 جىلعا سوزىلعان بولاتىن, بۇگىنگى كۇنى بارلىق جوندەۋ جۇمىستارى اياقتالدى.
سارقان پوليتەحنيكالىق كوللەدجىندە بولعان كەزدە وقۋ ورنىنىڭ ديرەكتورى نۇراحمەت ماتكارىموۆ سەناتورعا اپاتتى جاعدايداعى ستۋدەنتتىك جاتاقحانانى كورسەتىپ, ونى كۇردەلى جوندەۋگە قاراجات بولۋگە كومەكتەسۋدى سۇرادى. سەنات دەپۋتاتى ءلاززات سۇلەيمەن ايتىلعان بارلىق وزەكتى ماسەلەلەردى باقىلاۋعا الاتىنىن جەتكىزدى.
سەناتور جۇمىس ساپارى اياسىندا اۋداندىق قۇقىق قورعاۋ ورگاندارىنىڭ باسشىلارىمەن, كاسىبي جانە كاسىبي ەمەس مەدياتورلارمەن كەزدەستى. جۇزدەسۋ بارىسىندا زاڭنامالىق اكتىلەرگە ەنگىزىلگەن سوڭعى وزگەرىستەر مەن تولىقتىرۋلار تالقىلاندى.
ءلاززات سۇلەيمەن ساپار سوڭىندا ازاماتتاردى جەكە ماسەلەلەر بويىنشا قابىلدادى. قوعامدىق قابىلداۋعا 3 ادام ءوتىنىش بىلدىرگەن بولاتىن. سارقان اۋدانىنىڭ تۇرعىنى نيكولاي نيكونوۆ نوسەر جاۋىنعا ارنالعان كارىز جۇيەسىن رەتكە كەلتىرۋ تۋرالى ماسەلەنى كوتەردى. ارىستانبەك سماحانوۆ سارقان قالاسىندا دەنەشىنىقتىرۋ-ساۋىقتىرۋ كەشەنىن سالۋ قاجەتتىگىن جەتكىزدى. ەكىاشا مەكتەبىنىڭ ديرەكتورى نازگۇل بەيىسوۆا مەكتەپ عيماراتى كۇردەلى جاعدايدا ەكەنىن ايتىپ, جوندەۋگە كومەك كورسەتۋدى سۇرادى. دەپۋتات ازاماتتاردى مۇقيات تىڭداپ, ءوز ويلارىن ايتتى.
