فوتو moa.gov.kz
جەرگىلىكتى اتقارۋشى ورگاندار تاراپىنان كەلىپ تۇسكەن سۇرانىستارعا سايكەس 2019 جىلى ءىرى قارا مالداردى سىرعالاندىرۋ ءۇشىن – 2, 8 ملن دانا, ۇساق ءمۇيىزدى مالدارعا – 6,8 ملن دانا, شوشقاعا – 223, 5 مىڭ دانا, تۇيە مالىنا – 44, 8 مىڭ دانا قۇلاق سىرعالارى بەرىلدى.
جالپى رەسپۋبليكا بويىنشا 2019 جىلدىڭ 31 جەلتوقسانداعى مالىمەتتەرگە سايكەس اۋىل شارۋاشىلىعى جانۋارلارىن سايكەستەندىرۋ دەرەكتەر قورىندا 7 696 606 باس ءىرى قارا, 19 871 460 باس ۇساق مال, 716 070 باس شوشقا, 2 708 609 باس جىلقى, 214 434 باس تۇيە تىركەلگەن. بۇعان دەيىن حابارلاعانىمىزداي, بۇگىنگى كۇنى قازاقستاندا 31 ملن استام اۋىل شارۋاشىلىعى جانۋارلارى بار.
ايتا كەتەيىك, قازاقستان رەسپۋبليكاسىنىڭ «ۆەتەريناريا تۋرالى» زاڭىنا سايكەس - اۋىل شارۋاشىلىعى جانۋارلارى مىندەتتى تۇردە سايكەستەندىرىلۋى قاجەت. جانۋارلاردى سايكەستەندىرۋ اياسىندا جانۋارلارعا ەسەپتىك ءنومىر جانە ۆەتەريناريالىق تولقۇجات بەرىلەدى. سونداي-اق جايىلاتىن جەرى, تۇقىمى, جاسى, ءتۇسى, مالدىڭ يەسى تۋرالى مالىمەتتەر ەسەپكە الۋدىڭ ارنايى دەرەكقورىنا ەنگىزىلەدى.
«اۋىل شارۋاشىلىعى جانۋارلارىن سايكەستەندىرۋ» اقپاراتتىق جۇيەسى اۋىل شارۋاشىلىعى جانۋارلارىن ەسەپكە قويۋ جانە ەسەپتەن شىعارۋ, الدىن الۋ شارالاردى تىركەۋ, كەپىلدىكتى تىركەۋ جانە ت.ب. قىزمەتتەردى اتقارادى. اقپاراتتىق جۇيە ناقتى ۋاقىت رەجيمىندە جۇمىس ىستەيدى جانە ەنگىزىلگەن بارلىق وزگەرىستەر مەن تولىقتىرۋلار دەرەكتەر ساقتالعاننان كەيىن بىردەن كورسەتىلەدى.
كەز كەلگەن ازامات اتالعان جۇيەدەن جانۋارلاردىڭ ەسەپكە قويىلعانى نەمەسە شىعارىلعانى تۋرالى, جۇرگىزىلگەن ۆەتەريناريالىق-پروفيلاكتيكالىق ءىس-شارالار (ۆاكتسيناتسيا, دياگنوستيكا) جانە ت. ب. اقپاراتتاردى سۇراۋ جولداۋ ارقىلى الا الادى.
