«مەملەكەت باسشىسىنىڭ ۇلتىمىزدىڭ ۇلى اقىنى, اعارتۋشى اباي قۇنانباي ۇلى تۋرالى ەلىمىزدىڭ باس باسىلىمى «Egemen Qazaqstan» گازەتىندە جاريالانعان ماقالاسىمەن تانىستىم. ماقالادا حاكىمنىڭ مەرەيتويىن جوعارى دەڭگەيدە اتاپ ءوتۋدىڭ باعىتتارى مەن تەتىكتەرى ايقىن كورسەتىلگەن. پرەزيدەنت جوسپارلانعان شارالاردىڭ بارلىعى «توي تويلاۋ ءۇشىن ەمەس, وي-ءورىسىمىزدى كەڭەيتىپ, رۋحاني تۇرعىدان دامۋىمىز ءۇشىن وتكىزىلمەك» ەكەنىن ەرەكشە اتاپ وتكەن. راسىندا دا, دارا, دانا ابايدىڭ تويى ويدىڭ تويى بولۋى قاجەت. ۇلى ابايدىڭ تويى تاعىلىمنىڭ تويى بولۋى ءتيىس», – دەيدى قىزدار ۋنيۆەرسيتەتىنىڭ رەكتورى.
سونىمەن قاتار گاۋحار الدامبەرگەنوۆا ۇلتتىق سانانى جاڭعىرتۋداعى پرەزيدەنت ماقالاسىنىڭ ىقپالى جايىندا ايتتى.
«مەنىڭ پايىمداۋىمشا, قاسىم-جومارت كەمەل ۇلىنىڭ ماقالاسى ەلباسى نۇرسۇلتان ءابىش ۇلى نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ جالعاسى ىسپەتتەس. قازاقستاننىڭ تۇڭعىش پرەزيدەنتى باعدارلامالىق ماقالاسىندا قوعامدىق سانانى قايتا تۇلەتۋدىڭ ماڭىزدىلىعى تۋرالى ايتقان بولاتىن. بۇگىندە ۇلتتىق سانانى ساقتاۋ جانە ونى زامان تالابىنا بەيىمدەۋ مەملەكەتتىك ماڭىزى بار ماسەلەگە اينالدى. سانانى جاڭعىرتۋعا ابايدىڭ ومىرشەڭ شىعارمالارى زور ىقپال ەتەدى. بۇل تۋرالى ماقالادا ەگجەي-تەگجەيلى جازىلعان. « ۇلى اقىننىڭ شىعارمالارى بۇگىن دە وزەكتىلىگىن جوعالتقان جوق. ابايدىڭ وي-تۇجىرىمدارى بارشامىزعا قاشاندا رۋحاني ازىق بولا الادى. سوندىقتان ۇلتىمىزدى جاڭعىرتۋ ىسىندە ونىڭ ەڭبەكتەرىن باسشىلىققا الىپ, ۇتىمدى پايدالانۋ جايىن تاعى ءبىر مارتە وي ەلەگىنەن وتكىزگەن ءجون» دەپ اتاپ ءوتتى پرەزيدەنت. شىندىعىندا دا «ادامزاتتىڭ ابايى» اتانعان اقىننىڭ ادەبي مۇراسى بۇگىنگى كۇندە دە, بولاشاقتا دا ءوزىنىڭ ءمانى مەن ماڭىزىن جويمايدى. ول – ۇلتىمىزدىڭ رۋحاني جاڭعىرۋ جولىنداعى تەمىرقازىعى ءھام شامشىراعى ىسپەتتى», – دەدى ءوز سوزىندە گاۋحار تورەمۇراتقىزى.
ۋنيۆەرسيتەت باسشىسىنىڭ ايتۋىنشا, بۇگىندە قازاق قىزدارىنىڭ پاراسات مەكتەبىنە اينالعان قىزدار ۋنيۆەرسيتەتىندە اباي قۇنانباي ۇلىنىڭ 175 جىلدىعىنا ارنالعان دايىندىق جۇمىستارى باستالىپ كەتكەن. حاكىمنىڭ مەرەيتويىنا وراي وقۋ ورنىندا «ولەڭ – ءسوزدىڭ پاتشاسى...» اتتى رەسپۋبليكالىق جاس اقىندار ايتىسى وتەدى. شاراعا ەلىمىزدىڭ جوعارى وقۋ ورىندارىنىڭ ستۋدەنتتەرى قاتىسادى. ايتىس بارىسىندا اقىندار «اباي – دانا, اباي – دارا», «رۋحاني جاڭعىرۋ – باستى باعدار», «تۋعان جەر تۇرعان جەرمەن ولشەنبەيدى», «انا ءتىلىم – ارداعىم», «تاۋەلسىزدىك – تۇعىرىم» تاقىرىپتارى بويىنشا ءسوز جارىستىرادى.
ء«بىر بۇل عانا ەمەس, بىلتىرعى وقۋ جىلىنان باستاپ ۋنيۆەرسيتەتتە «ابايتانۋ» كۋرسى ەنگىزىلدى. بۇگىندە ستۋدەنتتەرگە ابايتانۋدىڭ باستاۋلارى, اقىننىڭ ءومىرى مەن شىعارماشىلىق جولى وقىتىلۋدا. بولاشاق پەداگوگتار كۋرس بارىسىندا ابايتانۋ ماسەلەلەرىنىڭ دامۋ باعىتتارىمەن, ونىڭ اقىندىق مەكتەبىمەن جانە حاكىمنىڭ «تولىق ادام» فيلوسوفياسىمەن تانىسادى. وسى ورايدا قىزدار ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى رۋدا زايكەنوۆانىڭ «ابايتانۋ» اتتى وقۋلىعى دا جارىق كوردى», – دەپ اتاپ ءوتتى پەداگوگيكالىق وقۋ ورنىنىڭ باسشىسى.
گاۋحار الدامبەرگەنوۆا,
قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى, پەداگوگيكا عىلىمدارىنىڭ دوكتورى,
پروفەسسور
